[1] Yî-set-lie̍t ngìn-mìn chhai Mí-sṳ̂-pâ si̍p-ha̍p ke sṳ̀, sṳt hiong Song-chú fat-sṳ kóng: “Ngài-têu chhie̍t-tui m̀-voi chiông moi-é ka-pûn Phien-ngâ-mén-ngìn.”
[2] Liá-ha, Yî-set-lie̍t ngìn-mìn to Pak-thi̍t-li, chhô chhai Song-ti mien-chhièn chhṳ̍t-to am-pû-sṳ̀, thai-sâng ôi-kieu kóng:
[3] “Song-chú — Yî-set-lie̍t ke Song-ti â, ngióng-pân voi yû liá-chúng sṳ fat-sên nè? Cho-má-ke Yî-set-lie̍t voi séu-thet Phien-ngâ-mén kî-chhu̍k nè?”
[4] Thi-ngi ngit, ngìn-mìn tá-chó hong hí-lòi, chhai ke-vi hí yit-chho chi-thàn, hien sêu-fa-chi lâu phìn-ôn-chi.
[5] Kì-têu fu-siông mun: “Yî-set-lie̍t tak kî-chhu̍k chûng, yû nai-têu ngìn mò to Mí-sṳ̂-pâ Song-chú mien-chhièn si̍p-ha̍p?” (Siên-chhièn kì-têu sṳt fat-sṳ: Mò to Mí-sṳ̂-pâ Song-chú mien-chhièn hi ke ngìn oi chhú sí-hìn.)
[6] Yî-set-lie̍t ngìn-mìn vi kì-têu ke thùng-pâu Phien-ngâ-mén-ngìn tù-tó chhie̍t-chúng ke ngùi-kî, kám-kok tông heu-fí, kóng: “Kîm-pû-ngit Yî-set-lie̍t séu-thet yit kî-chhu̍k,
[7] ngài-têu oi ngióng-pân vi chhûn-tó ke Phien-ngâ-mén-ngìn chhìm pû-ngiòng nè? Ngài-têu yí-kîn hiong Song-chú fat-sṳ m̀ chiông ngài-têu ke moi-é ka-pûn kì-têu.”
[8] Kì-têu yu chhà-mun: “Yî-set-lie̍t tak kî-chhu̍k chûng, yû nai-têu ngìn mò to Mí-sṳ̂-pâ Song-chú mien-chhièn si̍p-ha̍p?” Kiet-kó fat-hien Kî-lie̍t-thi Ngâ-pí-sàng ke ngìn mò yit-ke lòi chhâm-kâ chhi-fi;
[9] kiûn-chhui tiám miàng ke sṳ̀, mò yit-ke Ngâ-pí-ngìn chhai ke-vi.
[10] Só-yî fi-chung phai-chhut yit-van lióng-chhiên miàng yúng-sṳ, min-lin kì-têu: “To Ngâ-pí hi, chiông ke-vi ke ngìn chhṳ̀ chhiang-chhiang, lièn fu-ńg lâu se-ngìn-è chhiòn-phu chhṳ̀-thet.
[11] Oi chhṳ̀-sí só-yû ke nàm-ngìn, ya chhṳ̀-chhiang só-yû yí-kîn kiet-fûn ke fu-ngìn-kâ.”
[12] Kì-têu chhai Ngâ-pí-ngìn tông-chûng chhìm-tó si-pak ke heu-sâng ngìn-kâ-ńg, chiông kì-têu tai-to Kâ-nàm ke Sṳ-lò yàng-thi.
[13] Yèn-heu, chhiòn fi-chung phai-ngìn hi-kien chhai Lìm-mùn ke ngàm-sa̍k ke-têu Phien-ngâ-mén-ngìn, péu-sṳ ngien-yi kóng-fò.
[14] Ke-sṳ̀ Phien-ngâ-mén-ngìn chón-lòi, Yî-set-lie̍t-ngìn chhiu chiông mò su-tó châi-nan ke Ngâ-pí ke se-moi-é pûn kì-têu cho pû-ngiòng, chúng-he hàn m̀-la.
[15] Ngìn-mìn vi-tó Phien-ngâ-mén-ngìn yù-sông, yîn-vi Song-chú sṳ́ Yî-set-lie̍t chung kî-chhu̍k khiet-thet yit-kok.
[16] Fi-chung ke chóng-ló kóng: “Phien-ngâ-mén kî-chhu̍k mò fu-ngìn-kâ lé, ngài-têu yin-kôi ngióng-pân vi ke-têu chhûn-tó ke ngìn chhìm pû-ngiòng nè?
[17] Yî-set-lie̍t sṳ̍p-ngi kî-chhu̍k chûng cho-m̀-tet chhie̍t-thet yit kî-chhu̍k; ngài-têu yit-thin oi sióng phan-fap pó-chhùn Phien-ngâ-mén kî-chhu̍k.
[18] Chúng-he ngài-têu yu cho-m̀-tet pûn kì-têu thó ngài-têu ke moi-é, yîn-vi ngài-têu yí-kîn fat-sṳ kóng, ke chiông moi-é ka-pûn Phien-ngâ-mén-ngìn ke yit-thin voi su chu-chú.”
[19] Heu-lòi, kì-têu sióng: “Yit-ngièn yit-pái chhai Sṳ-lò yû Song-chú ke chiet-khì; liá chiet-khì voi to lé.” (Sṳ-lò chhai Pak-thi̍t-li pet-phién, Li-pô-nâ nàm-phién, Pak-thi̍t-li lâu Sṳ-kiam chṳ̂-kiên thai-lu ke tûng-phién.)
[20] Kì-têu fûn-fu Phien-ngâ-mén-ngìn kóng: “Ngì-têu to phù-thò-yèn khong hí-lòi,
[21] chu-yi khon. Sṳ-lò ke se-moi-é chhai ngièn-fi chûng chhut-lòi thiau-vú ke sṳ̀, ngì-têu chhiu tui phù-thò-yèn chhut-lòi, yit-sà chhióng yit-ke cho pû-ngiòng, tai kì chón Phien-ngâ-mén thi-khî hi.
[22] Na-he kì-têu ke â-pâ lâu hiûng-thi lòi-chhìm ngài-têu lî-lun, ngài-têu voi lâu kì-têu kóng: ‘Chhiáng khon ngài-têu ke chhìn-mien, sṳ̂-ên pûn ke-têu Phien-ngâ-mén-ngìn, yîn-vi ngài-têu chhai chan-chhòng mò liù-hâ se-moi-é pûn kì-têu cho pû-ngiòng. Liá-ha, ya m̀-he ngì-têu chiông se-moi-é ka-pûn kì-têu, só-yî ngì-têu me mò-chhui.’ ”
[23] Phien-ngâ-mén-ngìn chhiu cheu án-ngiòng hi-cho. Kì-têu tak-sà chhai Sṳ-lò thiau-vú ke se-moi-é tông-chûng chhióng yit-ke cho pû-ngiòng, tai-tén chéu. Kì-têu chón-to chhṳ-kâ ke thú-thi, chhùng-kien sàng-chṳ́n, he̍t chhai ke-vi.
[24] Thùng-sṳ̀, khì-thâ Yî-set-lie̍t-ngìn ya lì-khôi ke-vi, tak-sà chón chhṳ-kâ ke kî-chhu̍k, kâ-chhu̍k lâu pún-thi hi lé.
[25] Ke-sṳ̀, Yî-set-lie̍t hàn-màng yû kiûn-vòng; tak-sà cheu chhṳ-kâ só fôn-hí ke hi-cho.