[1] উদ্যার ইদর ছঅ দিন আগদি ইসা বেথানিয়াত গেল্। যিবারে তেঁই মরার ত্যুন জিন্দা গইজ্যেল্ য়েই লাসার বেথানিয়াত থাইক্তো।
[2] য়েডে য়িতারা ইসার লাই হ্যানার আয়োজন গরিল্। মাত্যা হ্যানা বারি দিতো আছিল্। যারা ইসার লগে হ্যাইতো বোইস্যেল্ য়িতারার মইধ্যে লাসারঅ আছিল্।
[3] এন্ সমত মরিয়াম হম বেশি তিনশ গেরাম বউত দামি, হ্যাঁটি হ্যোশবু আঁতর লই আইল্ আর ইসার ঠেংগত য়েগিন ঢালি দিয়েনে নিজর চুল দিই তেঁইর ঠেং ফুছি দিল্। য়েই আঁতরর হ্যোশ্বুত গোডা ঘর ভরি গেল্।
[4] ইসার উম্যতঅক্যলর মইধ্যে একজন, যিবা তেঁইরে শত্রুঅক্যলর আতত ধরাই দিবো, য়েই এহুদা ইষ্কারিয়োত হইল্,
[5] “এই আঁতর তিনশ দিনারে বেচিয়েনে গরিব দুক্যিঅক্যলরে দেয়া যাইতো। কিল্যাই য়েইল্যা গরা নঅ অইল্?”
[6] এহুদা দে গরিবঅক্যলর বিষয়ে চিন্তা গরিয়েনে এই হতা হইয়্যেল্ য়িয়ান নঅ। আসলে য়িবা আছিল্ চোর। টিঁয়ার বক্স য়িবার আতত থাইক্তো বুলি যেগিন জমা রাকা অইতো য়েগিনর ত্যুন য়িবা চুরি গইত্যো।
[7] ইসা হইল্, “তোঁয়ারা য়িবার মনত হষ্ট নঅ দিয়ো। আঁরে দাফন গরিবার সমত সাজাইবার লাইই য়িবা এগিন রাইক্যেল্।
[8] গরিবঅক্যল তঅ অক্যল সমত তোঁয়ারার মইধ্যে আছে, কিন্তু আঁরে তোঁয়ারা অক্যল সমত ফাইতা নঅ।”
[9] ইসা বেথানিয়াত আছে জানিত্ ফারিয়েনে ইহুদিঅক্যলর মইধ্যর ত্যুন বউত মানুষ য়েডে আইল্। য়িতারা দে হ্যালি ইসার লাই য়েডে আইস্যেল্ য়িয়ান নঅ, কিন্তু যিবারে তেঁই মিত্যুর ত্যুন জিন্দা গইজ্যেল্ য়েই লাসাররেঅ চাইতো আইস্যেল্।
[10] তহন মেইন ইমামঅক্যলে লাসাররেঅ মারি ফেলিবো বুলি ঠিগ গরিল্,
[11] হারন লাসারর লাই ইহুদিঅক্যলর মইধ্যে বউত কেউই নেতাঅক্যলরে ছারিয়েনে ইসার উঅর ইমান আইন্যেল্।
[12] যে মানুষঅক্যল ইদত গেইয়্যেল্ য়িতারা ফরদিন উনিত্ ফাইল্ ইসা জেরুজালেমত আইয়্যের।
[13] তহন য়িতারা হ্যাজুর ফাতা নিয়েনে তেঁইরে বারাই আইন্তো গেল্ আর চিল্যাইয়েনে হইতো লাগিল্, “মারহাবা, যিবা মাবুদর নামে আইয়্যের তেঁইর ফশংসা অক। তেঁইই ইসরাইলর বাদশা।”
[14] ফাক-কিতাবর হতামতন ইসা উগ্যুয়া গাধা দেকিত্ ফাইয়েনে য়িয়ানর উঅরদি বোইল্। কিতাবত লেহ্যা আছে,
[15] “অঅ সিয়োন হোইন্যা, নঅ ডরাইয়্যো। চঅ, তোঁয়ার বাদশা গাধার বাইচ্যার উঅরদি চরিয়েনে আইয়্যের।”
[16] ইসার উম্যতঅক্যলে ফইল্যাদি এগিন বুঝিত্ নঅ ফারিল্। ফরদি ইসার মইমা যহন জাহির অইল্ তহন য়িতারার মনত ফরিল্ ফাক-কিতাবর য়েই হতা তেঁইর বিষয়েই লেহ্যা অইয়্যে। য়িতারার আরো মনত ফরিল্ মানুষঅক্যলে ইসার লাইই য়েগিন গইজ্যেল্।
[17] লাসাররে হব্যরর ত্যুন ডাকিয়েনে জিন্দা গরি তুলিবার সমত যে মানুষঅক্যল ইসার হাছে আছিল্ য়িতারাই লাসারর জিন্দা অইয়েনে উঢিবার বিষয় সাক্যি দিতো লাগিল্।
[18] য়িয়ানর লাইই মানুষঅক্যলে ইসারে বারাই আইন্তো গেইয়্যেল্, হারন য়িতারা উইন্যেল্ ইসাই য়েই কেরামতি হামগান গইজ্যে।
[19] ইয়ান দেকিয়েনে ফরিশিঅক্যলে একজন অইন্যজনরে হইল্, “আঁরার হনঅ লাভই নঅ অঅর। চঅ, গোডা দুনিয়া য়িবার দলত গেইয়্যে গই।”
[20] য়েই ইদত যারা এবাদত গইত্যো আইস্যেল্ য়িতারার মইধ্যে হয়েকজন গিরিকঅ আছিল্।
[21] য়িতারা ফিলিফর হাছে আইয়েনে য়িবারে অনুরোধ গরিয়েনে হইল্, “এই দে উনন, আঁরা ইসারে চাইতাম চাই।” ফিলিফ আছিল্ গালিল ফদেশর বৈত্সৈদা গেরামর মানুষ।
[22] ফিলিফ যাইয়েনে হতাগান আন্দ্রিয়রে হইল্। ফরদি আন্দ্রিয় আর ফিলিফ যাইয়েনে ইসারে হইল্।
[23] ইসা তহন আন্দ্রিয় আর ফিলিফরে হইল্, “ইব্নে আদমর মইমা জাহির অইবার সময় আইস্যে।
[24] আঁই তোঁয়ারারে আঁসাই হইর, গেঁউঅর বিজ মেডিত ফরিয়েনে যুদি নঅ মরে তইলে উগ্যুয়াই বিজ থাকে, কিন্তু যুদি মরে তইলে বউত ফসল অঅ।
[25] যিবা নিজর ফরানরে বেশি মহব্যত গরে তেএ তার আসল জিবন আআরায়, কিন্তু যিবা এই দুনিয়াত য়েগিন নঅ গরে য়িবা য়িবার আসল জিবন আখেরি জিবনর লাই রক্যা গরিবো।
[26] কেউ যুদি আঁর সেবা গইত্যো চাআ তইলে তেএ আঁর ফথদি চলক। আঁই যেডে আছি আঁর সেবাহারিঅ য়েডে থাকিবো। কেউ যুদি আঁর সেবা গরে তইলে বাবা য়িবারে সম্যান দান গরিবো।”
[27] “আঁর মন এহন অস্তির অই উইট্যে। আঁই কি এই হতাই হইয়্যোম, “বাবা, যে সময় আইস্যে, য়েই সময়র আতর ত্যুন আঁরে রক্যা গর? কিন্তু ইয়ানর লাইই তঅ আঁই এই সময় ফইয্যন্ত আস্যি।
[28] বাবা, তোঁয়ার মইমা জাহির গর।” বেহেস্তর ত্যুন তহন এই হতা উনা গেল্, “আঁই আঁর মইমা জাহির গজ্যি আর আবার য়িয়ান জাহির গইজ্যোম।”
[29] যে মানুষঅক্যল য়েডে থিয়াই আছিল্ য়িতারা য়িয়ান উনিয়েনে হইল্, “য়িয়ান মেউলার ডাক।” কেউ কেউ আবার হইল্, “হনঅ ফেরেস্তা য়িবার লগে হতা হইল্।”
[30] ইয়ানত ইসা হইল্, “এই হতা আঁর লাই হোয়া নঅঅ অঅ, কিন্তু অনরার লাইই হোয়া অইয়্যে।
[31] এই দুনিয়ার মানুষঅক্যলর বিচারর সময় এবার আইস্যে, আর দুনিয়ার হত্যার আতর ত্যুন এহন ফভুত্য হারি নেয়া অইবো।
[32] আঁরে যহন মেডির ত্যুন উচুলত তুলা অইবো তহন আঁই বেক্যিনরে আঁর হাছে টানি আইন্যোম।”
[33] তেঁইর হন্ ডইল্যা মরন অইবো য়িয়ান বুঝাইবার লাই তেঁই এই হতা হইল্।
[34] তহন মানুষঅক্যলে ইসারে হইল্, “আঁরা ফাক-কিতাবর ত্যুন উন্যি মসিহ্ চিরহাল থাকিবো। তঅ অনে কি গরিয়েনে হইতা লাইগ্যোন দে, ইব্নে আদমরে উচুলত তুলন ফরিবো? তইলে এই ইব্নে আদম হন?”
[35] ইসা য়িতারারে হইল্, “আর এক্যানা সময়র লাই নুর অনরার লগে লগে আছে। নুর অনরার হাছে থাইক্তে থাইক্তেই সইল্তো থাকন যেন্ আঁধার অনরারে জয় গরিত্ নঅ ফারে। যিবা আঁধারত চলে য়িবা হডে যাআর য়িয়ান নঅ জানে।
[36] নুর অনরার হাছে থাইক্তে থাইক্তেই নুরর উঅর ইমান আনন যেন্ অনরা য়েই নুরর মানুষ অইত্ ফারন।” এই হতাগিন হইবার ফর ইসা মানুষঅক্যলর হাছর ত্যুন যাই গইয়েনে নিজরে গোফন গরিল্।
[37] যুদিঅ তেঁই য়িতারার সাম্নদি চিন্য ইসাবে এতাক্যিন কেরামতি হাম গইজ্যেল্ তঅঅ মানুষঅক্যলে তেঁইর উঅর ইমান নঅঅ আনে।
[38] ইয়ান অইয়্যেল্ যেন্ নবি ইশাইয়ার হোয়া এই হতা ফুরন অঅ: “মাবুদ, আঁরার দেয়া হ্যবরত হনে বিশ্যাস গইজ্যে? হার হাছেই বা মাবুদর কুদরতির আত জাহির অইয়্যে?”
[39] য়েই মানুষঅক্যলে ইয়ানর লাইই ইমান আনিত্ নঅঅ ফারে, হারন ইশাইয়া নবি যেন্ হইয়্যে য়েই মতন,
[40] “আল্লাহ্ য়িতারার চোগ বন্ধ গইজ্যে আর দিল্ অসার গইজ্যে, যেন্ য়িতারা চোগ দিয়েনে নঅ দেকে ও দিল্ দিয়েনে নঅ বুঝে, আর বেরামর ত্যুন ভালা অইবার লাই তেঁইর হাছে ফিরি নঅ আইয়্যে।”
[41] নবি ইশাইয়া ইসার মইমা দেইক্যেল্ বুলি তেঁইর বিষয়ে এই হতা হইয়্যেল্।
[42] তঅঅ নেতাঅক্যলর মইধ্যে বউত কেউ তেঁইর উঅর ইমান আনিল্, কিন্তু ফরিশিঅক্যলে সমাজর ত্যুন য়িতারারে বাইর গরি দিবো য়েই ডরে য়িতারা য়িয়ান সিকার নঅ গরিল্।
[43] য়িতারা আল্লাহ্র হাছর ত্যুন ফশংসা ফাইবার ত্যুন মানুষর হাছর ত্যুন ফশংসা ফাইতে বেশি ভালাবাইস্তো।
[44] ফরদি ইসা জোরে জোরে হইল্, “যিবা আঁর উঅর ইমান আনে য়িবা দে হ্যালি আঁর উঅর ইমান আনে য়িয়ান নঅ, কিন্তু যিবা আঁরে ফাটাইয়্যে তেঁইর উঅরঅ ইমান আনে।
[45] যিবা আঁরে দেকে, যিবা আঁরে ফাটাইয়্যে য়িবা তেঁইরেই দেকে।
[46] আঁই এই দুনিয়াত নুর ইসাবে আস্যি যেন্ আঁর উঅর যিবা ইমান আনে য়িবা আঁধারত নঅ থাকে।
[47] যুদি কেউ আঁর হতা উনিয়েনে য়েই মতন নঅ চলে তইলে আঁই নিজে য়িবার বিচার নঅ গরি, হারন আঁই মানুষরে দুষি ফরমান গইত্যাম নঅঅ আয়্যি বরং মানুষরে নাজাত দিতাম আস্যি।
[48] যিবা আঁরে অগ্রাইয্য গরে আর আঁর হতা নঅ উনে য়িবার লাই বিচারহত্যা আছে। যে হতা আঁই হইয়্যি য়েই হতাই শেষ দিনত য়িবারে দুষি বুলি ফরমান গরিবো;
[49] হারন আঁই তঅ নিজর ত্যুন কিছু নঅঅ হইয়্যি, কিন্তু যিবা আঁরে ফাটাইয়্যে য়েই বাবা নিজেই আঁরে উকুম দিয়্যে কি কি হঅন ফরিবো।
[50] আঁই জানি তেঁইর উকুমই আখেরি জিবন। ইয়ানর লাই আঁই যে হতাগিন হই য়েগিন আঁর বাবার উকুম মতনই হই।”