[1] Ayiwa Israɛl bɔnsɔn y'i kali Mizpa ko: «An si tɛna an denmusow furu Benjamɛn bɔnsɔn si ma.»
[2] O kɔ, Israɛl bɔnsɔn taara Bɛtɛl ka to Ala ɲɛ kɔrɔ yen fo wula da fɛ. U ye kasikanba bɔ ko:
[3] «Matigi, Israɛl ka Ala, nin bɔnɛ ko ye an sɔrɔ cogo di fo ka siya kelen bɔ Israɛl bɔnsɔn na bi?»
[4] O dugusajɛ sɔgɔma da joona fɛ, jama wulila ka saraka bɔlan jɔ o yɔrɔ la ka saraka jenitaw ni nisɔndiya sarakaw bɔ.
[5] O tuma la Israɛl bɔnsɔn y'a fɔ ko: «Yala Israɛl bɔnsɔn tɔ bɛ yen min ma na nin jama la Matigi ɲɛ kɔrɔ wa? k'a masɔrɔ an tun y'an kali k'a fɔ ko: ‹Ni mɔgɔ min ma na Matigi ɲɛ kɔrɔ Mizpa, o tigi ka faga.›»
[6] O cogo la min kɛra Israɛl bɔnsɔn Benjamɛn bɔnsɔn na, Israɛl bɔnsɔn miirila o la k'a fɔ ko: «Bɔnsɔn kelen halakira ka bɔ Israɛl la bi.
[7] An bɛ se ka mun kɛ walisa ka muso sɔrɔ o mɔgɔɲɛnamaw ye, sabu an y'an kali Matigi la ko an tɛna an denmusow si furu u ma?»
[8] O tuma la u ko: «Yala Israɛl bɔnsɔn dɔ bɛ yen min ma na nin jama la ka a yɛrɛ jira Matigi ɲɛ kɔrɔ Mizpa wa?» O y'a sɔrɔ Galad Jabɛska si ma na Matigi ɲɛ kɔrɔ jama cɛma.
[9] U ye mɔgɔw dan tuma min na, u ma Jabɛska si ye yen ka bɔ Galad jamana la.
[10] O tuma la jama ye cɛ ja gɛlɛn waa tan ni fila ci ko u ka taa Galad jamana la ka Jabɛskaw faga ni npan ye ani u musow ni u ka denmisɛnw. U ko: «Aw ka min kɛ, o filɛ nin ye:
[11] Aw ka cɛw bɛɛ faga ani muso minw dara cɛ fɛ.»
[12] U ye npogotigi kɛmɛ naani sɔrɔ Galad jamana la Jabɛs minw ma cɛ si dɔn fɔlɔ. U taara ni olu ye daga la Silo Kanan jamana la.
[13] Benjamɛn bɔnsɔn minw tun bɛ Rimɔn farakurun yɔrɔ la, jama bɛɛ ye ci bila ka taa hɛrɛ ko fɔ olu ye.
[14] O tuma la Benjamɛn bɔnsɔn nana. U tun ye muso minw sɔrɔ ka bɔ Galad jamana la Jabɛs, u ye olu di o cɛw ma, nka o ma u bɛɛ labɔ.
[15] O tuma la jama miirila Benjamɛn bɔnsɔn ko la, k'a masɔrɔ Matigi tun ye wo to Israɛl bɔnsɔn cɛma.
[16] O tuma la jama la cɛkɔrɔbaw ko: «An na o cɛ tɔ tolenw ka muso koɲɛnabɔ cogo di, sabu Bɛnjamɛn bɔnsɔn musoma bɛɛ halakira?»
[17] U ko fana: «Minw ɲɛnama tora Benjamɛn bɔnsɔn na, wajibi don muso ka sɔrɔ olu ye walisa bɔnsɔn kelen kana bɔ Israɛl bɔnsɔn na.
[18] Nka an tɛ se ka an denmusow di u ma furu la, k'a masɔrɔ Israɛl bɔnsɔn y'i kali ko: ‹Min ye a denmuso di Benjamɛn bɔnsɔn ma, o dangalen bɛ.›»
[19] O tuma la u ko: «A filɛ, an bɛ seli don bila Matigi ye san o san Silo.» O bɛ Bɛtɛl ni saheli cɛ, Bɛtɛl sira min bɛ taa Sisɛm, a bɛ o ni kɔrɔn cɛ. A bɛ Labona ni worodugu cɛ.
[20] O tuma la u ye Benjamɛn bɔnsɔn laadi ko: «A' ye taa aw dogo rezɛn tuw la ka to yen.
[21] Ni aw ye Silo denmusow bɔlen ye ka dɔn kɛɲɔgɔn fɛ, aw ka bɔ rezɛn tuw la. Aw bɛɛ kelen-kelen ka npogotigi kelen minɛ Silo denmusow la ka kɛ aw yɛrɛ musow ye. O kɔ, aw ka kɔsegin ka taa Benjamɛn jamana la.
[22] Ni u faw wala u balimaw nana ka kɔrɔfɔli kɛ o ko la, an na u jaabi ko: ‹A' ye u to an ye, sabu an ma muso sɔrɔ u bɛɛ ye kɛlɛ la. O bɛɛ n'a ta aw ma u di u ma, o de kosɔn aw jalakibali don.›»
[23] Ayiwa Benjamɛn bɔnsɔn ye o kɛ. U bɛɛ kelen-kelen ye muso dɔnkɛla minɛ ka taa ni olu ye u yɛrɛw ka yɔrɔw la ka duguw sigi ka u sigi yen.
[24] O tuma la Israɛl bɔnsɔn kɔseginna. U bɛɛ taara u bɔnsɔn ni u ka gwaw la u ciyɛnw kun na.
[25] Masakɛ si tun tɛ Israɛl bɔnsɔn kun na o waati la. U bɛɛ tun bɛ u yɛrɛw sago kɛ.