[1] Galadkaw ka Jefite tun ye cɛ farin ja gɛlɛn ye. Jatɔmuso dɔ den tun don, Galad tun ye ale fa ye.
[2] Nka Galad muso ye denkɛ wɛrɛw bange a ye. O muso denkɛw bonyalen kɔ, u ye Jefite gɛn k'a fɔ a ye ko: «I tɛna se ka ciyɛn ta an fa ka du kɔnɔ, k'a masɔrɔ i ye muso wɛrɛ den ye.»
[3] O kɛlen kɔ, Jefite bolila k'i mabɔ a balimaw la ka taa i sigi Tobi jamana la. Mɔgɔ kunntan dɔw ye u lajɛ Jefite kɔrɔ. U tun bɛ yaalaɲɔgɔn fɛ.
[4] Waati dɔ tɛmɛnnen kɔ, Amɔn bɔnsɔn ye Israɛl kɛlɛ.
[5] Amɔn bɔnsɔn ye Israɛl kɛlɛ tuma min na, Galad cɛkɔrɔbaw taara Jefite ɲini Tobi jamana la.
[6] Olu y'a fɔ Jefite ye ko: «Na, i na kɛ an ka kɛlɛ kuntigi ye walisa an ka Amɔn bɔnsɔn kɛlɛ.»
[7] Nka Jefite ye Galad cɛkɔrɔbaw jaabi ko: «Ne ko tun man di aw ye fewu. Aw ma ne gɛn ka bɔ ne fa ka du kɔnɔ wa? Mun kosɔn aw dun bɛ na ne sɛgɛrɛ sisan ko aw bɛ tɔɔrɔ la?»
[8] Galad cɛkɔrɔbaw y'a fɔ Jefite ye ko: «An bɛ segin i ma walisa i ka taa an fɛ ka Amɔn bɔnsɔn kɛlɛ. I na kɛ Galadkaw bɛɛ kuntigi ye.»
[9] Jefite ye Galad cɛkɔrɔbaw jaabi ko: «Ni aw taara ni ne ye ka Amɔn bɔnsɔn kɛlɛ, ni Matigi ye u don ne bolo, ne na kɛ aw kuntigi ye wa?»
[10] Galad cɛkɔrɔbaw y'a fɔ Jefite ye ko: «I ye min fɔ, ni an ma o kɛ, Matigi ka kɛ seere ye an cɛ.»
[11] O tuma la Jefite taara Galad cɛkɔrɔbaw fɛ. Jama y'a sigi k'a kɛ u kuntigi ni u ka kɛlɛ kuntigi ye. Jefite tun ye kuma minw bɛɛ fɔ, a seginna olu bɛɛ kan Matigi ɲɛ kɔrɔ Mizpa.
[12] O kɔ, Jefite ye cidenw bila ka taa Amɔn bɔnsɔn ka masakɛ sɛgɛrɛ k'a fɔ a ye ko: «Mun juguya donna an cɛ fo i bɛ na ne kama ka ne ka jamana kɛlɛ?»
[13] Amɔn bɔnsɔn ka masakɛ ye Jefite ka cidenw jaabi ko: «K'a masɔrɔ Israɛl bɔtɔ Misira, u ye ne ka jamana minɛ ka bɔ Arnɔn ba da la fo ka taa se Jabɔk kɔ ni Jurdɛn ba ma. I ka o yɔrɔ kɔsegin ne ma hɛrɛ la sisan.»
[14] Jefite ye cidenw bila ka taa Amɔn bɔnsɔn ka masakɛ sɛgɛrɛ ko kura,
[15] k'a fɔ a ye ko: «Jefite ko: ‹Israɛl bɔnsɔn ma Moab bɔnsɔn ni Amɔn bɔnsɔn ka dugukolo si minɛ.
[16] K'a masɔrɔ Israɛl bɔnsɔn bɔra Misira jamana la tuma min na, u ye kungokolon cɛ tigɛ fo ka taa se Kɔgɔji Bilen ma, ka taa se Kadɛs.
[17] O tuma la Israɛl ye cidenw bila ka taa Edɔm masakɛ sɛgɛrɛ k'a fɔ a ye ko: «I ka sɔn ne ka i ka jamana cɛ tigɛ.» Nka Edɔm masakɛ ma sɔn. A ye ci bila ka taa Moab masakɛ fana sɛgɛrɛ. O fana banna. Israɛl bɔnsɔn tora kungokolon kɔnɔ Kadɛs.
[18] O kɔ, u ye kungokolon cɛ tigɛ ka Edɔm jamana ni Moab jamana munumunu ka tɛmɛn Moab jamana kɔrɔn yanfan fɛ ka buguw turu Arnɔn ba kɔ fɛ. U ma don Moab jamana kɔnɔ k'a masɔrɔ Arnɔn ba tun ye Moab jamana dancɛ ye.
[19] O tuma la Israɛl ye cidenw bila ka taa Amɔr siya ka masakɛ Sihon sɛgɛrɛ, o sigilen tun bɛ Hesibɔn. Israɛl bɔnsɔn y'a fɔ o ye ko: «A to, an ka i ka jamana cɛ tigɛ fo ka taa don an ta la.»
[20] Nka Sihon ma da Israɛl bɔnsɔn na, o de kosɔn a ma sɔn u ka tɛmɛn a ka jamana fɛ. Ale ye a ka mɔgɔw lajɛ ka taa daga sigi Jahaz ka Israɛl bɔnsɔn kɛlɛ.
[21] Matigi, Israɛl ka Ala ye Sihon ni a ka mɔgɔw bɛɛ don Israɛl bolo. Israɛl ye u tiɲɛn. Amɔr siya sigilen tun bɛ o jamana yɔrɔ minw na, a ye u bɛɛ minɛ.
[22] U ye Amɔr siya ka jamana minɛ ka kɛ u ta ye ka bɔ Arnɔn ba da la fo ka taa se Jabɔk kɔ ma, ka bɔ kungokolon la fo ka taa se Jurdɛn ba da la.
[23] Ayiwa sisan, Matigi, Israɛl ka Ala ye Amɔr siya gɛn ka bɔ a ka siya Israɛl ɲɛ, e de sigilen bɛ u ka dugukolo kan.
[24] I ka bato fɛn Kemɔs bɛ fɛn o fɛn di i ma ka kɛ i ta ye, i tɛna o minɛ wa? O cogo la, Matigi an ka Ala bɛ mɔgɔ fɛn o fɛn gɛn ka bɔ anɲɛ, an na olu bɛɛ ta minɛ.
[25] I ka fisa ni Moab masakɛ Zipɔr denkɛ Balak ye wa? Ale sera ka Israɛl sɔsɔ wa, a ye u kɛlɛ wa?
[26] A filɛ, Israɛl bɔnsɔn sigilen bɛ san kɛmɛ saba bɔ Hesibɔn ni a lamini duguw la ani Aroɛr ni a lamini duguw ani dugu minw bɛ Arnɔn ba da la. Mun y'a to aw ma u minɛ o waati la?
[27] Ne ma ko jugu kɛ i la, nka e de bɛ ko jugu kɛ ne la ka ne kɛlɛ. Kiritigɛla Matigi ka kiri tigɛ Israɛl bɔnsɔn ni Amɔn bɔnsɔn cɛ bi.›»
[28] Nka Amɔn bɔnsɔn ka masakɛ ma sɔn ka Jefite ka kuma fɔlen lamɛn.
[29] O tuma la Matigi Ni jiginna Jefite kan. A ye Galad ni Manase jamanaw cɛ tigɛ ka kɔsegin Galad jamana la Mizpa, ka bɔ Galad jamana la Mizpa ka tugu Amɔn bɔnsɔn nɔ fɛ.
[30] Jefite ye i dafale Matigi la ko: «Ni ne ye se sɔrɔ Amɔn bɔnsɔn kan,
[31] ne kɔsegintɔ hɛrɛ la, ni fɛn o fɛn bɔra ne ka so da fɛ ka ne kunbɛn, o fɛn na kɛ Matigi ta ye. Ne na o kɛ saraka jenita ye.»
[32] O kɔ, Jefite tugura Amɔn bɔnsɔn nɔ fɛ ka u kɛlɛ. Matigi ye u don a bolo.
[33] A ye u gosi ka bɔ Aroɛr fo ka taa se Minit fan fɛ ka u ka duguba mugan minɛ ka taa se Abɛl-Keramim. O kɛra tiɲɛnniba ye. Amɔn bɔnsɔn majiginna Israɛl bɔnsɔnɲɛ.
[34] Jefite kɔseginna a ka so Mizpa. A denmuso bɔlen filɛ ka a kunbɛn ni dɔnkan ni dɔnkɛ ye. O npogotigi kelenpe tun bɛ a fɛ. Denkɛ si tun t'a fɛ, denmuso wɛre fana tun t'a fɛ o kɔ.
[35] Jefite y'o ye minkɛ, o yɔrɔ nin bɛɛ a ye a ka finiw fara k'a fɔ ko: «E, ne denmuso, i ye bɔnɛ lase ne ma. I kɛra ne tɔɔrɔbaaw la kelen de ye! K'a masɔrɔ ne ye ne kali Matigi la, ne tɛ se ka o yɛlɛma.»
[36] Npogotigi y'a jaabi ko: «Baba, ni i ye i kali Matigi la, kuma min bɔra i da la, i ka ne kɛ o ye. Sisan Matigi ye i mɔnɛ bɔ i juguw Amɔn siya la.»
[37] O kɔ, a y'a fɔ a fa ye ko: «I ka sɔn ne ka nin kɛ. A to ne ka kalo fila kɛ ka taa kulu kan ka ne ka npogotigiya ko kasi kɛ, ne ni ne tɔɲɔgɔnw.»
[38] Jefite ko: «I ka taa.» A y'a bila ka kalo fila kɛ. O tuma la npogotigi ni a tɔɲɔgɔnw taara ka a ka npogotigiya ko kasi kɛ kulu kan.
[39] Kalo fila dafalen, o npogotigi kɔseginna a fa ka so. Fa ye a ka dafale ko dafa ni a denmuso ye. O npogotigi tun ma cɛ si dɔn fɔlɔ. Kabini o tuma la, o kɛra laada ye Israɛl fɛ.
[40] Israɛl bɔnsɔn denmusow tun bɛ taa kasi Galad Jefite denmuso kosɔn tile naani kɔnɔ san o san.