[1] Pua denkɛ Tola wulila Abimelɛk kɔ ka Israɛl tila. Pua fa tun ye Dodo ye ka bɔ Isakar siya la. Ale sigilen tun bɛ Samir Efrayim kulu jamana la.
[2] Tola kɛra Israɛl ka kiritigɛla ye san mugan ni saba kɔnɔ. O kɔ, ale sara, a su donna Samir.
[3] Galad bɔnsɔn Jair wulila Tola kɔ. Ale kɛra Israɛl ka kiritigɛla ye san mugan ni fila kɔnɔ.
[4] Denkɛ bisaba tun bɛ a fɛ. Fali bisaba tun bɛ olu fɛ, olu sigilen tun bɛ duguba bisaba kɔnɔ. Olu bɛ wele Jair duguw halibi. O duguw bɛ Galad jamana la.
[5] Jair salen kɔ, u y'a su don Kamɔn.
[6] O kɔ, Israɛl bɔnsɔn daminɛna ka ko jugu kɛ Matigi ɲɛ kɔrɔ ko kura ka baara kɛ Baal ni Astarte boliw ye, Sirikaw ka bato fɛnw ni Sidɔnkaw ka bato fɛnw ni Moab bɔnsɔn ka bato fɛnw ni Amɔn bɔnsɔn ka bato fɛnw ani Filisitikaw ka bato fɛnw. U murutira Matigi ma, u tun tɛ baara kɛ a ye tun.
[7] O tuma la Matigi diminna Israɛl bɔnsɔn kɔrɔ. A ye u don Filisitikaw ni Amɔn bɔnsɔn bolo.
[8] Olu ye Israɛl bɔnsɔnɲɛ gwan ka u tɔɔrɔ o san na kosɛbɛ. Israɛl bɔnsɔn minw tun bɛ Jurdɛn ba kɔ fɛ Amɔr siya ka jamana la Galad, u ye olu tɔɔrɔ san tan ni segin kɔnɔ.
[9] Amɔn bɔnsɔn fana ye Jurdɛn ba tigɛ ka taa Juda bɔnsɔn ni Benjamɛn bɔnsɔn ani Efrayim bɔnsɔn ka so kɛlɛ. Israɛl bɔnsɔn tɔɔrɔla kosɛbɛ.
[10] O tuma la Israɛl kasira Matigi nɔ fɛ ko: «An ye jurumu kɛ i la k'a masɔrɔ an ye an ka Ala bila ka baara kɛ Baal ye.»
[11] Nka Matigi ye Israɛl bɔnsɔn jaabi ko: «Ne ma aw tila ka bɔ Misirakaw ni Amɔr siya ni Amɔn bɔnsɔn ani Filisitikaw bolo wa?
[12] Sidɔnkaw ni Amalɛk bɔnsɔn ani Maonkaw ye aw tɔɔrɔ tuma min na, aw kasira ne nɔ fɛ. Ne ma aw tila ka bɔ olu bolo wa?
[13] Nka aw ye ne bila ka baara kɛ bato fɛn wɛrɛw ye. O de kosɔn ne tɛna aw tila fewu.
[14] Aw ye bato fɛn minw ɲɛnatɔmɔ, a' ye kasi olu nɔ fɛ, olu ka aw tila aw ka tɔɔrɔ waati la.»
[15] Israɛl bɔnsɔn ye Matigi jaabi ko: «An ye jurumu kɛ. Min ka di i ye, i ka o kɛ an na, nka ni i sɔnna, i ka an tila bi.»
[16] O tuma la u ye bato fɛn wɛrɛw labɔ u cɛma ka baara kɛ Matigi ye. Israɛl bɔnsɔn tɔɔrɔlen ye Matigi ɲɛnasisi.
[17] Ayiwa Amɔn bɔnsɔn ye ɲɔgɔn lajɛ ka daga sigi Israɛl bɔnsɔn da la Galad jamana la. Israɛl bɔnsɔn fana ye ɲɔgɔn lajɛ ka daga sigi Mizpa.
[18] Galad mɔgɔw ni a kuntigiw y'a fɔɲɔgɔn ye ko: «Jɔn fɔlɔ na taa ka Amɔn bɔnsɔn kɛlɛ? O tigi na kɛ Galadkaw bɛɛ kuntigi ye.»