[1] Ayiwa Israɛl bɔnsɔn y'a daminɛ kaɲɔgɔn lajɛ ka bɔ Dan na fo ka taa se Beɛr-Seba fo ka taa se Galad jamana la. Olu bɛɛ ye ɲɔgɔn lajɛ Matigi ɲɛ kɔrɔ Mizpa i ko cɛ kelen.
[2] Israɛl bɔnsɔn kuntigiw bɛɛ ye ɲɔgɔn lajɛ ka bɔ Israɛl bɔnsɔnw bɛɛ la ka u lajɛ Ala ka jamalajɛ yɔrɔ la yen. U kɛra kɛlɛkɛ cɛ sennaman npan samabaa waa kɛmɛ naani ye.
[3] Benjamɛn bɔnsɔn y'a mɛn ko Israɛl bɔnsɔn ye ɲɔgɔn lajɛ Mizpa. Israɛl bɔnsɔn ko: «Ayiwa, nin ko jugu kɛra cogo di?»
[4] O tuma la, muso min fagara, o cɛ Levite y'u jaabi ko: «Ne ni ne ka jɔnmuso donna Gibea, Benjamɛn ka dugu la ko an bɛ si yen.
[5] Nka Gibeakaw wulila ne kama su fɛ ka ne sibon lamini. U tun b'a fɛ ka ne faga. U ye ne ka jɔnmuso karaba fo k'a faga.
[6] O tuma la ne ye ne ka jɔnmuso su ta k'a tigɛtigɛ k'a sogo ci Israɛl bɔnsɔn ka mara bɛɛ la katuguni u ye kakalaya ni maloya ko kɛ Israɛl la.
[7] Ayiwa, Israɛl bɔnsɔn, aw bɛɛ lajɛlen bɛ yan. Aw kaɲɔgɔn ɲininka ka aw ka miirili jira.»
[8] Jama bɛɛ wulila i ko cɛ kelen k'a fɔ ko: «An si tɛna don an ka finiso kɔnɔ, an si tɛna segin ka taa so.
[9] Ayiwa sisan, an na min kɛ Gibeakaw la, o filɛ nin ye, an na kala da ka cɛw ɲɛnatɔmɔ n'a ye ka taa Gibea kama.
[10] An ka cɛ tan ta ka bɔ cɛ kɛmɛ-kɛmɛ la ka cɛ kɛmɛ ta ka bɔ cɛ waa kelen-kelen na ka cɛ waa kelen ta ka bɔ cɛ waa tan-tan na ka bɔ Israɛl bɔnsɔn bɛɛ la. Olu bɛ na ni dumuni ye kɛlɛkɛ cɛw nɔ fɛ. Ni u kɔseginna ni dumuni ye, an na Benjamɛn ka dugu Gibea sara ka kɛɲɛ ni u ka maloya ko kɛlen ye Israɛl bɔnsɔn na.»
[11] Ayiwa, Israɛl bɔnsɔn ye ɲɔgɔn lajɛ o dugu kama. U kɛra i ko cɛ kelen.
[12] Israɛl bɔnsɔn bɛɛ ye cidenw bila ka taa Benjamɛn bɔnsɔn ka gwaw bɛɛ la k'a fɔ u ye ko: «Nin ye mun ko jugu kɛlen ye aw fɛ yen?
[13] Ayiwa aw Gibeakaw aw ka o kojugukɛlaw don an bolo, walisa an ka u faga ka ko jugu ban ka bɔ Israɛl cɛma.» Nka Benjamɛn bɔnsɔn ma sɔn ka u balimaw Israɛl bɔnsɔn lamɛn.
[14] Benjamɛn bɔnsɔn ye ɲɔgɔn lajɛ Gibea ka bɔ duguw bɛɛ la, ko u bɛ taa ka Israɛl bɔnsɔn tɔw kɛlɛ.
[15] Benjamɛn bɔnsɔn minw nana ka bɔ dugu wɛrɛw la, u ye olu dan o don na. Olu kɛra cɛ npan samabaa waa mugan ni wɔɔrɔ ye. Gibeakaw ka cɛɲɛnatɔmɔlen kɛmɛ wolonwula sen tun tɛ o la.
[16] Cɛ numanmaɲɛnatɔmɔlen kɛmɛ wolonwula tun bɛ o mɔgɔw cɛma. Olu bɛɛ tun bɛ se ka kunsigiden kelen bon ni ntanfura ye k'a sɔrɔ.
[17] Israɛl bɔnsɔn na kɛlɛkɛ cɛw fana danna. Olu kɛra cɛ npan samabaa waa kɛmɛ naani ye, Benjamɛn bɔnsɔn tun tɛ o la. Olu bɛɛ tun ye kɛlɛkɛ cɛw ye.
[18] O tuma la Israɛl bɔnsɔn yɛlɛnna ka taa Bɛtɛl ka Ala ɲininka ko: «An ka mɔgɔ la jumɛn ka taa ka Benjamɛn bɔnsɔn kɛlɛ?» Matigi y'u jaabi ko: «Juda fɔlɔ ka yɛlɛn ka taa.»
[19] Israɛl bɔnsɔn wulila sɔgɔma da fɛ ka taa Gibea da la.
[20] Israɛl bɔnsɔn y'u madon ka Benjamɛn bɔnsɔn kɛlɛ. U ye kɛlɛ labɛn Gibeakaw kama.
[21] O tuma la Benjamɛn bɔnsɔn bɔra Gibea ka u faga. O don na, Israɛl bɔnsɔn na cɛ waa mugan ni fila bira duguma.
[22] Israɛl bɔnsɔn jama ye u ja gɛlɛya ka u labɛn kɛlɛ kama ko kura u ka don fɔlɔ kɛlɛ labɛn yɔrɔ la.
[23] Israɛl bɔnsɔn yɛlɛnna Matigi ɲɛ kɔrɔ ka kasi fo wula da fɛ. U ye Matigi ɲininka ko: «Yala ne ka ne labɛn ko kura ka ne balima Benjamɛn bɔnsɔn kɛlɛ wa?» Matigi ye u jaabi ko: «A' ye taa u kama.»
[24] Israɛl bɔnsɔn yɛlɛnna Benjamɛn bɔnsɔn kama siɲɛ filanan la.
[25] Benjamɛn bɔnsɔn fana bɔra Gibea o don na ka u kɛlɛ. U ye Israɛl bɔnsɔn na cɛ npan samabaa waa tan ni segin bi duguma.
[26] O tuma la Israɛl bɔnsɔn jama bɛɛ yɛlɛnna ka taa Bɛtɛl ka u jɔ yen ka kasi Matigi ɲɛ kɔrɔ o don na. U ye sun don fo wula da fɛ ka saraka jenitaw ni nisɔndiya sarakaw bɔ Matigi ye.
[27] O kɔ, Israɛl bɔnsɔn ye Matigi ɲininka ko: «Yala ne ka taa ne balimaw Benjamɛn bɔnsɔn kɛlɛ, wala ne kana taa?» Ala ka layidu wagande tun bɛ o yɔrɔ la o tuma la. Eleazar denkɛ Fineɛs tun bɛ sarakalasebaaya baara la. Eleazar fa tun ye Aron ye. Matigi ye jaabili kɛ ko: «Yɛlɛn ka taa, katuguni ne na u don aw bolo sini.»
[29] O tuma la Israɛl bɔnsɔn ye dogo yɔrɔ labɛn ka mɔgɔw dogo ka Gibea lamini.
[30] Israɛl bɔnsɔn tɔw yɛlɛnna Benjamɛn bɔnsɔn kama tile sabanan don ka u labɛn Gibea kama, i ko u tun y'a kɛ cogo min na ka kɔrɔ.
[31] Benjamɛn bɔnsɔn bɔra ka o jama kunbɛn yɔrɔ jan ka u kɛlɛ ka mabɔ dugu la. U y'a daminɛ ka Israɛl bɔnsɔn dɔw gosi ka u faga i ko u tun b'a kɛ cogo min na ka kɔrɔ. U ye mɔgɔ bisabaɲɔgɔn faga Israɛl bɔnsɔn na Bɛtɛl sira ni Gibea kungo la taa sira kan.
[32] Benjamɛn bɔnsɔn ko: «U tiɲɛntɔ filɛ an ɲɛ i ko fɔlɔ ta cogo.» Nka Israɛl bɔnsɔn ko: «An ka boli u ɲɛ ka u nɛgɛn ka mabɔ dugu la fo ka se sirabaw ma.»
[33] O tuma la Israɛl bɔnsɔn bɛɛ wulila ka bɔ u dogo yɔrɔw la Gibea jɛkɛnɛ la ka taa u labɛn Bal-Tamar.
[34] O cogo la cɛ waa tan minw ɲɛnatɔmɔna Israɛl bɔnsɔn cɛma, olu taara Gibea kuntilenna la. Kɛlɛ juguyara, nka Benjamɛn bɔnsɔn m'a dɔn ko bɔnɛ ye u sɔrɔ.
[35] Matigi ye Benjamɛn bɔnsɔn gosi Israɛl bɔnsɔnɲɛ. Israɛl bɔnsɔn ye Benjamɛn bɔnsɔn na cɛ npan samabaa waa mugan ni duuru ani cɛ kɛmɛ faga o don na.
[36] Benjamɛn bɔnsɔn y'a ye ko u ye se sɔrɔ Israɛl bɔnsɔn kan k'a masɔrɔ olu bolila u ɲɛ, nka Israɛl bɔnsɔn jigi tun bɛ u ka mɔgɔ dogolenw kan, olu minw tun bɛ Gibea lamini na.
[37] O mɔgɔ dogolenw tɛliyara ka bɔ ka girin ka da Gibea kan ka dugu ci ni npan ye.
[38] Israɛl bɔnsɔn kɛlɛkɛ cɛw tun ye taamashyɛn diɲɔgɔn ma ko o mɔgɔ dogolenw ka sisiba wuli dugu kɔnɔ.
[39] Israɛl bɔnsɔn ye u kɔ sin kɛlɛ ma. Benjamɛn bɔnsɔn y'a daminɛ ka u gosi ka u jogin ka mɔgɔ bisabaɲɔgɔn faga Israɛl bɔnsɔn na. U tun b'a fɔ ko: «Siga t'a la, se sɔrɔlen filɛ u kan i ko kɛlɛ don fɔlɔ cogo.»
[40] Nka sisi daminɛna ka wuli ka bɔ dugu kɔnɔ ka kɛ sisi samasen ye tuma min na, Benjamɛn bɔnsɔn ye u kɔ filɛ ka dugu bɛɛ jenitɔ sisi yɛlɛntɔ ye fo san fɛ.
[41] O tuma la Israɛl bɔnsɔn yɛlɛmana u kama. Benjamɛn bɔnsɔn kɔnɔna filila katuguni u y'a ye ko bɔnɛ ye u sɔrɔ.
[42] U ye u kɔ sin Israɛl bɔnsɔn ma ka boli ka taa kungokolon fan fɛ, nka Israɛl kɛlɛkɛ cɛw labɛnnen tun don ka u makɔnɔ. Benjamɛn bɔnsɔn minw bɔra dugu kɔnɔ, u ye olu faga o yɔrɔ nin kelen.
[43] U ye Benjamɛn bɔnsɔn kooli ka u nɔgɛn ka u faga fo ka taa se Gibea da la kɔrɔn yanfan fɛ.
[44] Benjamɛn bɔnsɔn cɛ waa tan ni segin bira. U bɛɛ tun ye cɛ ja gɛlɛnw ye.
[45] Minw ye u yɛlɛma ka boli ka taa kungokolon fan fɛ Rimɔn farakurun yɔrɔ la, Israɛl bɔnsɔn ye olu cɛ waa duuru faga sira la. O kɔ, u taara dɔ wɛrɛw nɔ fɛ ka olu nɔgɛn fo ka se Gidɔm ka cɛ waa fila faga olu la.
[46] Benjamɛn bɔnsɔn kɛlɛkɛ cɛ minw fagara o don na, olu bɛɛ lajɛlen kɛra cɛ npan samabaa waa mugan ni duuru ye.
[47] Cɛ kɛmɛ wɔɔrɔ minw ye u yɛlɛma ka boli ka taa kungokolon fan fɛ Rimɔn farakurun yɔrɔ la, olu ye kalo naani kɛ yen.
[48] Israɛl bɔnsɔn ye u yɛlɛma Benjamɛn bɔnsɔn kama ka u faga ni npan ye minw tun bɛ dugu kɔnɔ, k'a daminɛ mɔgɔw la ka taa baganw la. U ye fɛn o fɛn sɔrɔ, u ye olu bɛɛ faga. U ye dugu minw ye, u ye olu bɛɛ jeni ni tasuma ye.