[1] Efrayim bɔnsɔn ye ɲɔgɔn lajɛ ka taa Zafɔn, k'a fɔ Jefite ye ko: «Mun y'a to i taara Amɔn bɔnsɔn kɛlɛ k'a sɔrɔ i ma o fɔ an ye? An na taa e yɛrɛ ni i ka so jeni.»
[2] Jefite ye u jaabi ko: «Sɔsɔliba donna ne ka mɔgɔw ni Amɔn bɔnsɔn cɛ. Ne ye aw wele, aw ma ne tila ka bɔ u bolo.
[3] Ayiwa ne y'a ye tuma min na ko aw ma na ka ne dɛmɛ, ne ye ne ni saraka ka tugu Amɔn bɔnsɔn nɔ fɛ. Matigi ye u don ne bolo. Ayiwa mun y'a to aw dun nana ne kama ka ne kɛlɛ bi?»
[4] O kɔ, Jefite ye Galadkaw bɛɛ lajɛ ka taa Efrayim bɔnsɔn kɛlɛ. Galad cɛw ye Efrayim bɔnsɔn tiɲɛn kosɛbɛ, k'a masɔrɔ Efrayim bɔnsɔn tun y'a fɔ ko: «Aw ye Efrayim ka mɔgɔ bolilenw de ye, aw Galadka minw sigilen bɛ Efrayim ni Manase cɛma.»
[5] O kɔ, Galad taara Jurdɛn ba senna tigɛ yɔrɔw minɛ Efrayimɲɛ. Ni Efrayim mɔgɔ bolilen dɔ y'a fɔ ko: «A to ne ka tɛmɛn,» Galad cɛw b'a fɔ ko: «E ye Efrayim bɔnsɔn dɔ ye wa?» Ni a ko: «Ayi,»
[6] o tuma la u tun b'a fɔ a ye ko: «Ayiwa, i ka Shibolɛt fɔ sa.» O tuma la ni o b'a fɔ ko: «Sibolɛt», katuguni a da tun tɛ se k'a fɔ ka tilen. O tuma la u tun bɛ a minɛ ka a kan tigɛ Jurdɛn ba senna tigɛ yɔrɔ la. Efrayim cɛ minw bɛɛ fagara o waati la, o kɛra cɛ waa binaani ni fila ye.
[7] Jefite kɛra Israɛl bɔnsɔn ka kiritigɛla ye san wɔɔrɔ kɔnɔ. O kɔ, Galadkaw ka Jefite sara. A su donna Galad jamana dugu dɔ la.
[8] Jefite salen kɔ, Bɛtilɛhɛm Ibzan kɛra Israɛl bɔnsɔn ka kiritigɛla ye.
[9] Denkɛ bisaba ani denmuso bisaba tun bɛ ale fɛ. A ye a denmuso bisaba furu kɛnɛma mɔgɔw ma, ka kɛnɛma mɔgɔ denmusow bisaba furu a denkɛw ye. A kɛra Israɛl ka kiritigɛla ye san wolonwula kɔnɔ.
[10] O kɔ, Ibzan sara. A su donna Bɛtilɛhɛm.
[11] Ibzan salen kɔ, Zabulɔn bɔnsɔn Elɔn kɛra Israɛl bɔnsɔn ka kiritigɛla ye. A kɛra Israɛl bɔnsɔn ka kiritigɛla ye san tan kɔnɔ.
[12] O kɔ, Elɔn sara. A su donna Ajalɔn, Zabulɔn bɔnsɔn ka jamana la.
[13] Ale salen kɔ, Hilɛl denkɛ Abidɔn min bɔra Piratɔn, o kɛra Israɛl bɔnsɔn ka kiritigɛla ye.
[14] Denkɛ binaani ani mɔdenkɛ bisaba tun bɛ a fɛ. Olu tun bɛ yɛlɛn fali biwolonwula kan. A kɛra Israɛl bɔnsɔn ka kiritigɛla ye san segin kɔnɔ.
[15] O kɔ, Hilɛl denkɛ Abidɔn min bɔra Piratɔn, o sara. A su donna Piratɔn, Efrayim bɔnsɔn ka jamana la, Amalɛk bɔnsɔn ka kulu jamana la.