[1] Masakɛ si tun tɛ Israɛl kun na o waati la. Dan bɔnsɔn tun bɛ sigi yɔrɔ dɔ ɲini k'a masɔrɔ olu tun ma niyɔrɔ si sɔrɔ Israɛl bɔnsɔn cɛma fɔlɔ.
[2] O tuma la Dan bɔnsɔn ye cɛ ja gɛlɛn duuruɲɛnatɔmɔ ka bɔ u ka gwaw la ka olu ci ka taa yaalayaala ka jamana ko lajɛ ka a cogo dɔn. Olu tun ye Zoreakaw ni Estaolkaw ye. U y'a fɔ olu ye ko: «A' ye taa ka jamana ko lajɛ.» Olu taara Efrayim kulu jamana la ka se Mika ka so ka si yen.
[3] Ka u to Mika ka so da la, u ye o Levite kamalen dɔn a kumakan fɛ ka gɛrɛ a la k'a fɔ a ye ko: «Jɔn nana ni i ye yan? I bɛ mun kɛ nin yɔrɔ la? I ka mun bɛ yan?»
[4] O kamalen ko: «Mika ye nin ni nin kɛ ne ye, a ye ne sara ka kɛ a ka sarakalasebaa ye.»
[5] U ko: «Ayiwa, i ka Ala ɲininka walisa an k'a dɔn yala ni an ka nin taama na diya.»
[6] O sarakalasebaa y'a fɔ u ye ko: «A' ye taa hɛrɛ la. Aw bɛ taama sira min kan, Ala na to aw fɛ o la.»
[7] O tuma la o cɛ duuru bɔra ka taa se Lais. U y'a ye ko o mɔgɔw hakili sigilen, lakanalen sigilen don hɛrɛ la i ko Sidɔnkaw. Mɔgɔ si tun tɛ u kun na ka u tɔɔrɔ. U ni Sidɔnkaw yɔrɔ tun ka janɲɔgɔn na. U ni mɔgɔ wɛrew tun tɛ jɛ foyi la.
[8] O kɔ, o kolajɛbaaw seginna ka taa Zorea ni Estaol u balimaw fɛ yen. U cibaaw ko: «Aw ko di sa?»
[9] U ye u balimaw jaabi ko: «A' ye wuli, an ka taa ka Laiskaw kɛlɛ. An ye jamana ye, a ka ɲi kosɛbɛ. Aw ka fɛn dɔ kɛ. Aw kana kɛ salabaatɔw ye. A' ye wuli joona ka taa o jamana minɛ k'a kɛ aw ta ye.
[10] Ni aw donna yen, aw na mɔgɔ lafiyalenw sɔrɔ yen. O jamana ka bon. Ala y'a don an bolo. O yɔrɔ dugukolo sɛnɛkɛ fɛnw bɛɛ bɛɲɛ.»
[11] O tuma la Dan bɔnsɔn cɛ kɛmɛ wɔɔrɔ bɔra Zorea ni Estaol ka taa ni kɛlɛkɛ minanw ye.
[12] U yɛlɛnna ka taa daga sigi Kirjat-Jearim Juda jamana la. O yɔrɔ tɔgɔ fana dara ko Makane-Dan fo ka na se bi ma. O yɔrɔ bɛ Kirjat-Jearim kɔ fɛ.
[13] U bɔra yen ka tɛmɛn Efrayim kulu jamana fɛ ka taa se Mika ka so.
[14] O cɛ duuru minw tun taara ka Lais jamana ko lajɛ, olu kumana k'a fɔ u balimaw ye ko: «Aw y'a dɔn ko efɔd ni terafim ni ja dɛsɛnen ani warijɛ yeelelen ja bɛ nin sow kɔnɔ wa? Aw ka miiri aw ka kɛta la sa.»
[15] U gɛrɛla so la ka don o kamalen Levite ka so Mika ka du kɔnɔ, ka a fo.
[16] Cɛ kɛmɛ wɔɔrɔ minw bɔra Dan siya la ni u labɛnnen tun don ni kɛlɛkɛ minanw ye, olu jɔlen tora so da la.
[17] Nka cɛ duuru minw tun taara ka jamana ko lajɛ, olu donna so kɔnɔ ka o ja dɛsɛnen ni efɔd ni terafim yeelelen ja ta. O y'a sɔrɔ sarakalasebaa jɔlen tun bɛ donda la o cɛ kɛmɛ wɔɔrɔ kɔrɔ.
[18] Sarakalasebaa ye o cɛ duuru dontɔ ye Mika ka so kɔnɔ ka o fɛn senumaw ta tuma min na, a y'a fɔ u ye ko: «Aw bɛ mun kɛ?»
[19] U y'a jaabi ko: «I makun, i kana foyi fɔ. I ka taa an fɛ. I na kɛ an fa ni an ka sarakalasebaa ye. E yɛrɛɲɛ na, jumɛn ka fisa, ka kɛ mɔgɔ kelen ka sarakalasebaa ye a ka so, wala ka kɛ Israɛl siya la kelen ka sarakalasebaa ye?»
[20] O diyara sarakalasebaa ye. A ye efɔd ni terafim ani o warijɛ yeelelen ja ta ka taa n'u ye o mɔgɔw fɛ.
[21] U ye sira minɛ ka u ka denmisɛnw ni u ka baganw ni u ka minanw bila u ɲɛ.
[22] U ni Mika ka so yɔrɔ janyara tuma min na, Mika sigiɲɔgɔnw ye ɲɔgɔn lajɛ ka Dan bɔnsɔn nɔgɛn.
[23] U pɛrɛnna Dan bɔnsɔn nɔ fɛ, olu kɔseginna k'a fɔ Mika ye ko: «Mun kɛra fo i ni nin jamaba nana ten?»
[24] A ye u jaabi ko: «Aw taara ni ne ka bato fɛn dilalenw ni ne ka sarakalasebaa ye. Mun tora ne ka so tun? Ani mun na aw bɛ ne ɲininka ko: ‹Mun kɛra?›»
[25] Dan bɔnsɔn y'a jaabi ko: «I kan kana mɛn an cɛma tun walisa an ka mɔgɔ diminnenw kana na bi aw kan ka aw ni aw ka so mɔgɔw bɔnɛ aw ni la.»
[26] O tuma la Dan bɔnsɔn ye sira minɛ ka taa. Mika y'a ye ko u barika ka bon a ta ye minkɛ, a kɔseginna ka taa a ka so.
[27] Mika tun ye fɛn minw dila, u tilalen kɔ olu cɛli la ka taa ni a ka sarakalasebaa ye, u taara ka bi Lais kan, o siya min sigilen tun bɛ hɛrɛ la. U ye npan kɛ ka olu faga, o kɔ, ka tasuma bila dugu la k'a jeni.
[28] Mɔgɔ si ma taa ka u dɛmɛ k'a masɔrɔ u yɔrɔ tun ka jan Sidɔn la ani jɛɲɔgɔnya tun tɛ u ni mɔgɔ wɛrɛw cɛ. O dugu sigilen tun bɛ jɛkɛnɛ la Bɛt-Rehɔb fan fɛ. Dan bɔnsɔn ye dugu sigi ko kura k'u sigi yen.
[29] U ye o dugu tɔgɔ da ko Dan, u bɛnba Dan tɔgɔ la. O tun ye Israɛl bɔnsɔn ye. O dugu tun bɛ wele ko Lais ka kɔrɔ.
[30] O kɔ, Dan bɔnsɔn ye ja dɛsɛnen jɔ. Musa mɔdenkɛ Gersɔn denkɛ Jonatan ni a bɔnsɔn kɛra Dan bɔnsɔn ka sarakalasebaaw ye fo ka taa se u cɛ tuma ma ka taa jɔnya la. Gersɔn fa tun ye Manase ye.
[31] Ala ka so tun bɛ Silo waati minw bɛɛ la, u ye Mika ka ja dɛsɛnen mara yen o waatiw bɛɛ la.