[1] O dugusajɛ sɔgɔma da fɛ, Jerubal, o kɔrɔ ko Jedeɔn, ye jama bɛɛ ɲɛ minɛ ka taa daga sigi Harɔd kɔji da la. Madiankaw ka daga tun bɛ saheli yanfan fɛ More tintin fan fɛ jɛkɛnɛ la.
[2] Matigi y'a fɔ Jedeɔn ye ko: «I fɛ mɔgɔw ka ca, ne tɛ se ka Madiankaw don u bolo. Ni o kɛra, Israɛl na a yɛrɛ bonya k'a fɔ ko u yɛrɛ bolo ye u tila.
[3] Sisan i ka nin kuma fɔ Israɛl ye ko: ‹Mɔgɔ minw bɛ siran ani minw bɛ yɛrɛyɛrɛ, olu ka kɔsegin ka bɔ Galad kulu kan.›» Jama la mɔgɔ waa mugan ni fila kɔseginna, a tɔ tora mɔgɔ waa tan ye.
[4] Matigi y'a fɔ Jedeɔn ye ko: «Halibi mɔgɔw ka ca. I ka jigin ni mɔgɔw ye ka taa ji da la, ne na mɔgɔw ɲɛnatɔmɔ yen. Ne na mɔgɔ minw ko fɔ ko, olu ka taa i fɛ, olu na tugu i nɔ fɛ. Ne n'a fɔ ko minw kana tugu i la, olu na to yen.»
[5] O kɛlen kɔ, Jedeɔn jiginna ka taa ni mɔgɔw ye ji da la. Matigi y'a fɔ a ye ko: «Mɔgɔ minw bɛ ji nɔn ni u nɛn ye i ko wulu b'a kɛ cogo min na, i ka olu bila u dan na. Minw bɛ u ɲɔngiri ka ji min, i ka olu fana bila u dan na.»
[6] Mɔgɔ minw ye ji soli ni u tɛgɛw ye ka a nɔn ni u nɛn ye, olu kɛra mɔgɔ kɛmɛ saba ye, nka jama tɔ bɛɛ ye u da biri ji la ka u min.
[7] O tuma la Matigi y'a fɔ Jedeɔn ye ko: «Cɛ kɛmɛ saba minw ye ji nɔn ni u nɛn ye, ne na se di aw ma olu barika la. Ne na Madiankaw don u bolo. Mɔgɔ tɔw bɛɛ ka kɔsegin u yɛrɛ ka yɔrɔw la.»
[8] U ye o mɔgɔw ka dumuni ni u ka buru fyɛtaw minɛ. O kɔ, Jedeɔn ye Israɛl mɔgɔw bɛɛ labila ka taa u ka finisow kɔnɔ. A tɔ tora mɔgɔ kɛmɛ saba ye. Madiankaw ka daga tun bɛ Jedeɔn ta duguma jɛkɛnɛ la.
[9] Matigi y'a fɔ Jedeɔn ye su fɛ ko: «I ka wuli ka taa Madiankaw ka daga la, k'a masɔrɔ ne y'a don i bolo.
[10] Ni i bɛ siran ka taa, i ni i ka baaraden Pura ka taa ɲɔgɔn fɛ Madiankaw ka daga la.
[11] I na u ka kuma fɔtaw lamɛn. O kɔ, i na ja gɛlɛya sɔrɔ ka u ka daga minɛ.» O tuma la a jiginna ni a ka baaraden Pura ye fo ka taa se u ka daga da la.
[12] O y'a sɔrɔ Madiankaw ni Amalɛk bɔnsɔn ani kɔrɔn fɛ mɔgɔw bɛɛ fɛnsɛnen tun bɛ jɛkɛnɛ la. U tun ka ca i ko ntɔnw. U kaɲaamɛw tun ka ca i ko kɔgɔji dala cɛncɛn dama dɔnbali.
[13] Jedeɔn sera yen tuma min, a y'a sɔrɔ cɛ dɔ tun bɛ a ka sugo lakali a tɔɲɔgɔn ye ko: «A filɛ, ne sugora. Ne ye orje buurukun kolonkolontɔ ye ka don Madiankaw ka daga la ka se fo finiso ma ka a gosi k'a labi fo k'a dabiri. A dabirilen tora.»
[14] A tɔɲɔgɔn y'a fɔ a ye ko: «O tɛ fɛn wɛrɛ ye Israɛl bɔnsɔn Joas denkɛ Jedeɔn ka npan kɔ. Ala ye Madiankaw ni u ka kɛlɛbolo bɛɛ don a bolo.»
[15] Jedeɔn ye o sugo lakalikan mɛn tuma min na ani o sugo kɔrɔ fɔbaa ka kuma, a y'i biri ka batoli kɛ. O kɔ, a kɔseginna Israɛl ka daga la k'a fɔ ko: «Aw ka wuli, k'a masɔrɔ Matigi ye Madiankaw ka kɛlɛbolo don aw bolo.»
[16] O kɔ, a ye o mɔgɔ kɛmɛ saba tila kulu saba ye ka buru fyɛta di u bɛɛ ma ani bɔgɔ daga lankolon. Mɔɲɔn manalen tun bɛ u bɛɛ kɔnɔ.
[17] O kɔ, a y'a fɔ u ye ko: «A' ye ne filɛ, ne bɛ min kɛ, aw fana ka o ɲɔgɔn kɛ. Ni ne sera daga dan na tuma min na, aw fana ka o ɲɔgɔn kɛ.
[18] Ni ne ye buru fyɛ tuma min na, minw bɛɛ bɛ ne fɛ, olu fana ka u ka buru fyɛ. Aw minw bɛ daga fan bɛɛ la, aw fana ka aw ka buru fyɛ ka kulokanba ci ko: ‹Matigi kosɔn ani Jedeɔn kosɔn.›»
[19] Ayiwa Jedeɔn ni a fɛ cɛ kɛmɛ sera kɛlɛ daga kɔ fɛ, kɔlɔsilikɛlaw ɲɔgɔn falen waati filanan daminɛ tuma la. Kɔlɔsilikɛlaw ɲɔgɔn falen tuma tɛmɛnnen kɔ dɔɔnin, u ye buruw fyɛ ka u bolola dagaw ci.
[20] O kɛlɛbolo saba mɔgɔw bɛɛ ye u ka buruw fyɛ ka u ka dagaw ci. U bɛɛ ye u ka mɔɲɔn manalen minɛ u numan bolo la. Buru fyɛtaw tun bɛ u kininbolo la ka u fyɛ. O kɔ, u ye kulokan cili daminɛ ko: «Matigi ka npan ni Jedeɔn ka npan.»
[21] U bɛɛ jɔlen tora u ka yɔrɔw la ka daga lamini. Madiankaw ka daga bɛɛ bira kulo la ka boli.
[22] O cɛ kɛmɛ saba ye buruw fyɛ. Matigi ye o kɛlɛbolo la cɛw bɛɛ kelen-kelen bilaɲɔgɔn na ni u ka npanw ye. Kɛlɛbolo bɛɛ bolila ka taa fo Bɛt-Sita, o bɛ Zerera fan fɛ fo ka se Abɛl-Meholadan yɔrɔ la Tabat kɛrɛ fɛ.
[23] Israɛl mɔgɔw, Nefitali bɔnsɔn ni Asɛr bɔnsɔn ani Manase bɔnsɔn ye u lajɛ ka Madiankaw nɔgɛn.
[24] O tuma la Jedeɔn ye cidenw bila ka taa Efrayim kulu jamana la k'a fɔ olu ye ko: «A' ye jigin ka Madiankaw kunbɛn ka Jurdɛn ba senna tigɛ yɔrɔw minɛ fo ka taa se Bɛt-Bara ani Jurdɛn ba ma.» O tuma la Efrayim mɔgɔw bɛɛ ye ɲɔgɔn lajɛ ka o senna tigɛ yɔrɔw minɛ fo ka taa se Bɛt-Bara ani Jurdɛn ba ma.
[25] U ye Madiankaw ka kuntigi fila minɛ. Olu tun ye Orɛb ni Zeɛb ye. U ye Orɛb faga Orɛb fara kan ka Zeɛb faga Zeɛb rezɛn ji bɔ yɔrɔ la. O kɔ, u ye Madiankaw nɔgɛn ka taa ni Orɛb ni Zeɛb kunkolow ye Jurdɛn ba kɔ fɛ Jedeɔn yɔrɔ.