[1] Israɛl bɔnsɔn minw ma Kanan jamana kɛlɛ ye, Matigi ye siya minw to yen olu kosɔn, walisa a ka Israɛl bɔnsɔn nataw kɔrɔbɔ o ko la ani ka u kalan kɛlɛ la, walisa u ka kɛlɛ cogo dɔn k'a sɔrɔ olu tun ma o kow ye ka kɔrɔ,
[3] o siyaw filɛ ninw ye: Filisitikaw ka masakɛ duuru ani Kanankaw bɛɛ ni Sidɔnkaw ani Hev siya minw sigilen tun bɛ Liban kuluw kan, Bal-Hermɔn kulu kan fo ka taa se Hamat donda la.
[4] A ye olu to yen walisa a ka Israɛl kɔrɔbɔ u ko la k'a dɔn yala ni u na Matigi ka ci fɔlenw lamɛn, a ye o minw fɔ u bɛnbaw ye Musa da la.
[5] Ayiwa Israɛl bɔnsɔn sigira Kanankaw ni Hɛti bɔnsɔn ni Amɔr siya ni Ferɛz siya ni Hev siya ani Jebuskaw cɛma.
[6] U ye olu denmusow furu ka u denmusow furu olu denkɛw ma ka baara kɛ u ka bato fɛnw ye.
[7] Israɛl bɔnsɔn ye ko jugu kɛ Matigi ɲɛ kɔrɔ ka ɲinɛ Matigi, u ka Ala kɔ ka baara kɛ Baal ni Astarte boliw ye.
[8] O de kosɔn Matigi dusu bɔra Israɛl kɔrɔ. A ye u don Mɛsopotami masakɛ Kusan-Risatayim bolo. Israɛl bɔnsɔn ye baara kɛ Kusan-Risatayim ye san segin kɔnɔ.
[9] O kɔ, Israɛl bɔnsɔn kasira Matigi nɔ fɛ. Matigi ye tilabaa lawuli u ye, o ye u tila. O tun ye Kalɛb dɔgɔkɛ Kenaz denkɛ Otniɛl ye.
[10] Matigi Ni tun bɛ a kan. A tun bɛ Israɛl ka kiri tigɛ, a tun bɛ taa kɛlɛ la fana. Matigi ye Mɛsopotami masakɛ Kusan-Risatayim don a bolo. A bolo digira Kusan-Risatayim la.
[11] Jamana ye lafiya sɔrɔ san binaani kɔnɔ. O kɔ, Kenaz denkɛ Otniɛl sara.
[12] Israɛl bɔnsɔn ye ko jugu kɛ Matigi ɲɛ kɔrɔ ko kura. Matigi ye Moab masakɛ Egilɔn barika bonya Israɛl bɔnsɔn kama, k'a masɔrɔ u tun ye ko jugu kɛ Matigi ɲɛ kɔrɔ.
[13] O tuma la Egilɔn ye Amɔn bɔnsɔn ni Amalɛk bɔnsɔn lajɛ a fɛ yen. U wulila ka Israɛl kɛlɛ ka ntamaro sunw dugu minɛ.
[14] Israɛl bɔnsɔn ye baara kɛ Moab masakɛ Egilɔn ye san tan ni segin kɔnɔ.
[15] Israɛl bɔnsɔn kasira Matigi nɔ fɛ, Matigi ye tilabaa lawuli u ye, o kɛra Gera denkɛ Ehud ye ka bɔ Benjamɛn siya la, numanma tun don. Israɛl bɔnsɔn ye faama wari bila ka taa di Moab masakɛ Egilɔn ma a bolo.
[16] Ehud tun ye npan da fila da duman dɔ dila a yɛrɛ ye, o janya tun ye nɔnkɔnɲɛ kelen ye. A ye a siri a kinin fɛ tɔgɔkun na a ka dulɔki jukɔrɔ.
[17] O tuma la a nana faama wari di Moab masakɛ Egilɔn ma, o tun ye mɔgɔ kunbaba ye.
[18] Ayiwa Ehud tilara faama wari dili la ka doni tabaaw labila. U taara.
[19] Nka u sera kabakurunw sogololen ma Gilgal kɛrɛ fɛ tuma min na, Ehud kɔseginna. A y'a fɔ masakɛ ye ko: «A filɛ, masakɛ, kuma dɔ bɛ ne fɛ k'a fɔ i ye, gundo don.» Masakɛ ko: «I makun.» Mɔgɔ minw tun bɛ a fɛ yen, a ye olu labɔ.
[20] O kɔ, Ehud gɛrɛla masakɛ sigilen na a dan na a ka so sumalen kɔnɔ k'a fɔ a ye ko: «Ala ka kuma dɔ bɛ ne fɛ ka fɔ i ye.» Egilɔn wulila ka bɔ a ka sigilan na.
[21] O tuma la Ehud y'a numan bolo don ka npan sama ka bɔ a kinin fɛ tɔgɔ la ka o turu Egilɔn kɔnɔbara la.
[22] Npankisɛ ni a kala bɛɛ donna, a kɛn ye npan datugu. A ma npan sama ka bɔ masakɛ kɔnɔbara la, o min kun tun bɔra a kɔ fɛ.
[23] O kɔ, Ehud bɔra ka sanfɛ so daw sɔgɔ a da la ka taa.
[24] Ayiwa Ehud bɔlen kɔ, masakɛ ka baaradenw taara k'a filɛ. U y'a ye ko sanfɛ so daw sɔgɔlen don. U y'a fɔ ko: «Siga t'a la, masakɛ bɛ banako taa la a ka so sumalen kɔnɔ.»
[25] U mɛnna makɔnɔli la fo u ma se ka muɲuli kɛ tun, sabu masakɛ ma so daw yɛlɛ. O tuma la, u ye konɲin ta ka da yɛlɛ. U ye u makɛ su dalen ye duguma.
[26] Ka u to makɔnɔli la ka mɛn, Ehud bolila ka tɛmɛn kabakurun dɛsɛnenw yɔrɔ la ka dan kɛ ka se Seira donda la.
[27] A sera tuma min na, a ye buru fyɛ Efrayim kulu kan. Israɛl bɔnsɔn jiginna ka bɔ kulu kan a fɛ.
[28] A y'a fɔ u ye ko: «A' ye tugu ne la, k'a masɔrɔ Matigi ye aw jugu Moab bɔnsɔn don aw bolo.» U jiginna ka tugu a nɔ fɛ ka taa se Jurdɛn ba senna tigɛ yɔrɔ ma Moab fan fɛ. U ma sɔn mɔgɔ si ka tɛmɛn.
[29] U ye Moab cɛ barikama ja gɛlɛn la mɔgɔ waa tan gosi ka u faga o tuma la. U si ma dan kɛ.
[30] Moab bɔnsɔn majiginna Israɛl ɲɛkɔrɔ. Jamana ye lafiya sɔrɔ san bisegin kɔnɔ.
[31] Ehud salen kɔ, Anat denkɛ Samgar wulila. Ale ye Filisitikaw mɔgɔ kɛmɛ wɔɔrɔ faga ni misi gɛn bere ye. Ale fana ye Israɛl tila.