[1] Israɛl bɔnsɔn ye ko jugu kɛ Matigi ɲɛ kɔrɔ ko kura. Matigi ye u don Filisitikaw bolo san binaani kɔnɔ.
[2] Cɛ dɔ tun bɛ Zorea ka bɔ Dan bɔnsɔn na, o tɔgɔ ko Manoa. A muso tun ye bangekɛbali ye. Den si tun t'a fɛ.
[3] Matigi ka mɛlɛkɛ dɔ y'i jira o muso la k'a fɔ a ye ko: «E ye kɔna ye. I ma den sɔrɔ fɔlɔ, nka i na kɔnɔ ta ka denkɛ bange.
[4] Nka i ka i yɛrɛ kɔlɔsi sisan, i kana diwɛn wala minni fɛn farinma si min. Ala bɛ fɛn minw jate nɔgɔlen ye, i kana olu si dun,
[5] k'a masɔrɔ a filɛ, i na kɔnɔ ta ka denkɛ bange. Kun dilan kana don a kun na k'a masɔrɔ o den na kɛ Nazireɛn ye ka bila Ala ye kabini a bange don. Ale de na Israɛl tilali daminɛ ka bɔ Filisitikaw bolo.»
[6] O muso taara a fɔ a cɛ ye ko: «Ala ka cɛ dɔ nana ne yɔrɔ, o bɔlen bɛ Ala ka mɛlɛkɛ fɛ, siranfɛnba don. Ne ma a ɲininka a bɔ yɔrɔ la, a fana ma a tɔgɔ fɔ ne ye.
[7] Nka a y'a fɔ ne ye ko, a filɛ, ne na kɔnɔ ta ka denkɛ bange, ko ne kana diwɛn wala minni fɛn farinma si min sisan, ko ne kana fɛn nɔgɔlen si dun. K'a masɔrɔ o den na bila Ala ye ka kɛ Nazireɛn ye kabini a bange don fo ka taa se a saya ma.»
[8] Manoa ye Matigi deli ko: «Matigi, ne bɛ i deli ko Ala ka cɛ ka na an yɔrɔ ko kura, denkɛ min bɛna bange, ka an kalan o ko la.»
[9] Ala ye Manoa ka delili jaabi. Ala ka mɛlɛkɛ nana o muso yɔrɔ ko kura ka a sigilen to foro la. O y'a sɔrɔ, a cɛ Manoa tun tɛ yen.
[10] O yɔrɔ nin bɛɛ muso bolila ka taa o fɔ a cɛ ye ko: «O cɛ min tun nana ne yɔrɔ don dɔ la, o nalen filɛ i jira ne la.»
[11] Manoa wulila ka tugu a muso la ka taa se o ciden ma k'a fɔ a ye ko: «Cɛ min kumana ne muso fɛ, e don wa?» A ko: «Ne don.»
[12] Manoa kumana ko kura ko: «Ni i ka kuma fɔlen dafara tuma min na, an ka mun kɛ o den ko la? Ale na mun kɛ?»
[13] Matigi ka mɛlɛkɛ ye Manoa jaabi ko: «Ne ye fɛn minw bɛɛ fɔ muso ye, a ka o bɛɛ kɛ.
[14] I muso kana rezɛn mɔ si dun. A kana diwɛn wala minni fɛn farinma si min, a kana fɛn nɔgɔlen si dun. Ne ye ci minw fɔ a ye, a ka olu bɛɛ mara.»
[15] Manoa y'a fɔ Matigi ka mɛlɛkɛ ye ko: «Ne bɛ i deli, i ka an makɔnɔ dɔɔnin walisa an ka baden dila i ye.»
[16] Matigi ka mɛlɛkɛ ye Manoa jaabi ko: «Hali ni ne ye i makɔnɔ, ne tɛna i ka dumuni kɛ. Nka ni i b'a fɛ ka saraka jenita bɔ, i ka o kɛ Matigi ye.» O bɛɛ n'a ta Manoa m'a dɔn ko Matigi ka mɛlɛkɛ don.
[17] Manoa y'a fɔ Matigi ka mɛlɛkɛ ye ko: «I tɔgɔ bɛ di walisa ni i ka kuma fɔlen kɛra, an ka barika da i ye.»
[18] Matigi ka mɛlɛkɛ y'a jaabi ko: «Mun na i bɛ ne tɔgɔ ɲininkali kɛ? Kabako tɔgɔ don.»
[19] Manoa ye baden ni a mugu saraka ta k'a bila farakurun kan Matigi ye. Kabako kɛra, Manoa ni a muso y'a ye.
[20] Tasuma mana bɔra saraka bɔlan na ka yɛlɛn san fɛ tuma min na, Matigi ka mɛlɛkɛ yɛlɛnna o tasuma mana fɛ. U ye o ye minkɛ, Manoa ni a muso ye u bi ka u ɲɛ biri duguma.
[21] Matigi ka mɛlɛkɛ ma i jira Manoa ni a muso la tun. O tuma la Manoa y'a dɔn ko Matigi ka mɛlɛkɛ tun don.
[22] A y'a fɔ a muso ye ko: «Siga t'a la, an bɛna sa k'a masɔrɔ an ye Ala ye.»
[23] Nka a muso ko: «Ni Matigi tun b'a fɛ ka an faga, a tun tɛna sɔn an ka sarakaw la, ani an ye fɛn minw ye, a tun tɛna sɔn ka u bɛɛ jira an na, ani a tun tɛna o bɔɲɔgɔnkow fɔ an ye nin tuma la.»
[24] O muso ye denkɛ bange ka a tɔgɔ da ko Samsɔn. Den bonyara. Ala dubara a ye.
[25] Matigi Ni y'a daminɛ ka baara kɛ a kɔnɔ k'a to Makane-Dan Zorea ni Estaol cɛ.