[1] Waati dɔ tɛmɛnnen kɔ, alikama kan tuma la, Samsɔn taara bɔ a muso ye. A taara ni baden dɔ ye a bolo k'a fɔ ko: «Ne bɛ don ne muso fɛ bon kɔnɔ.» Nka muso fa ma sɔn a ka don.
[2] A fa y'a fɔ Samsɔn ye ko: «Ne tun b'a miiri ko i t'a fɛ, o de y'a to ne y'a di i tɔɲɔgɔn dɔ ma. A dɔgɔmuso cɛ manɲi a ye kosɛbɛ wa? Ayiwa, i ka o ta ale nɔ na.»
[3] Samsɔn y'a fɔ u ye ko: «Ni ne ye ko jugu kɛ Filisitikaw la nin sen in na, u tɛna se ka ne jalaki o la.»
[4] O tuma la Samsɔn taara ka kungo wulu kɛmɛ saba minɛ ka olu kukalaw fila-fila sinɲɔgɔn ma ka mɔɲɔn siri u la,
[5] ka tasuma tugu o mɔɲɔnw la ka o kungo wuluw bila ka taa Filisitikaw ka alikama forow la ka o alikama jɔgɔw ni alikama kanbaliw bɛɛ jeni ka taa don olive nakɔw la ka olu jeni.
[6] Filisitikaw ye ɲininkali kɛ ko: «Jɔn ye nin kɛ?» A fɔra u ye ko: «Timnaka birankɛ Samsɔn nɔ don, k'a masɔrɔ olu ye a muso ta ka o di a tɔɲɔgɔn dɔ ma.» O tuma la Filisitikaw taara muso fa ni muso jeni ni tasuma ye.
[7] Samsɔn y'a fɔ u ye ko: «Ni aw ye nin kɛ, ne tɛna lafiya sani ka ne mɔnɛ bɔ aw la.»
[8] A ye u gosi kosɛbɛ ka u caman faga. O kɔ, a jiginna ka taa i sigi Etam kuluwo kɔnɔ.
[9] O tuma la Filisitikaw taara daga sigi Juda da la ka u fɛnsɛ fo ka taa se Lesi.
[10] Juda cɛw ko: «Mun kosɔn aw nana an kama?» U ko: «An nana walisa an ka Samsɔn siri ka a tɔɔrɔ i ko a ye an tɔɔrɔ cogo min na.»
[11] O tuma la Juda bɔnsɔn cɛ waa saba taara Samsɔn yɔrɔ Etam kuluwo la k'a fɔ Samsɔn ye ko: «Yala i m'a dɔn ko Filisitikaw ye an kuntigiw ye wa? Mun kosɔn i dun ye nin kɛ an na?» A y'u jaabi ko: «Olu ye ne tɔɔrɔ cogo min na, ne fana ye u tɔɔrɔ ten.»
[12] U y'a fɔ Samsɔn ye ko: «An nana i siri walisa ka i don Filisitikaw bolo.» Samsɔn y'a fɔ u ye ko: «A' ye aw kali ne ye ko aw yɛrɛw tɛna ne faga.»
[13] U ye Samsɔn jaabi ko: «Ayi, an b'a fɛ ka i siri ka i don Filisitikaw bolo dɔrɔn, nka an tɛna i faga.» O tuma la u y'a siri ni jurukisɛ kura fila ye ka bɔ n'a ye kuluwo kɔnɔ.
[14] Samsɔn sera Lesi tuma min na, Filisitikaw taara a kunbɛn ka kulokan ci, u ɲagalila nka Matigi Ni jiginna Samsɔn kan. Jurukisɛ minw tun kɛra ka a bolow siri, olu kɛra i ko gaarikisɛ kelen jenitɔ tasuma fɛ. O sirilanw bira ka bɔ a bolow la.
[15] A ye fali ntagakolo kɛnɛ dɔ ye yen. A y'a bolo mɔɔnɔbɔ ka o ta ka cɛ waa kelen gosi k'u faga n'o ye.
[16] O tuma la Samsɔn ko: «Mɔgɔ su ton kelen filɛ, ton fila filɛ, o kɛra ni fali ntagakolo ye. Ne ye mɔgɔ waa kelen faga ni fali ntagakolo ye.»
[17] Samsɔn tilalen kɔ kuma la, a ye o fali ntagakolo fili fo yɔrɔ jan ka o yɔrɔ tɔgɔ da ko Ramat-Lesi.
[18] Ka minnɔgɔ gwannen to a la kosɛbɛ, a ye Matigi deli ko: «I sɔnna ka nin tilali koba kɛ i ka baaraden bolo. Ne ka kan ka sa minnɔgɔ bolo sisan ka ne don o bolokobaliw bolo wa?»
[19] Fara dingɛ tun bɛ Lesi. Ala ye o ci, ji bɔra a la. Samsɔn ye o ji min, a ni seginna a ma, a ye barika sɔrɔ tun. Kabini o tuma la, u ye o yɔrɔ tɔgɔ da ko En-Hakore fo ka na se bi ma. O bɛ sɔrɔ Lesi.
[20] Samsɔn kɛra Israɛl ka kiritigɛla ye Filisitikaw waati la san mugan kɔnɔ.