[1] Jerubal denkɛ Abimelɛk taara a bɛnkɛw sɛgɛrɛ Sisɛm ka kuma a ba ka du kɔnɔ mɔgɔw fɛ ko:
[2] «Ne bɛ aw deli, aw ka kuma Sisɛmkaw bɛɛ ɲɛ na ko: ‹Jerubal denkɛw, mɔgɔ biwolonwula bɛɛ ka kɛ aw kuntigiw ye wa, wala cɛ kelenpe ka kɛ aw kuntigi ye? Jumɛn ka fisa aw ma? Aw hakili ka to a la fana ko ne ye aw farisogo ni aw kolo dɔ ye.›»
[3] A bɛnkɛw ye kumaɲuman fɔ Sisɛmkaw ye a ta fan fɛ. U taara u miiriliw jira Sisɛmkaw la Abimelɛk ta fan fɛ k'a masɔrɔ u ko, an balimakɛ don.
[4] U ye warijɛ biwolonwula bɔ Baal-Berit ka so kɔnɔ k'a di Abimelɛk ma. Abimelɛk ye mɔgɔ kunntan dɔw ni tulo gɛlɛn dɔw sara ka tugu a nɔ fɛ.
[5] O kɔ, a taara a fa ka so Ofira ka a balimaw, Jerubal denkɛw kan tigɛ farakurun kelen kan. Olu bɛɛ lajɛlen tun ye cɛ biwolonwula ye. Jerubal denkɛ dɔgɔmanni Jotam kelenpe kisira k'a masɔrɔ a dogolen tun don.
[6] O tuma la Sisɛmkaw ani mɔgɔ minw sigilen tun bɛ Bɛt-Milo, olu bɛɛ ye ɲɔgɔn lajɛ. U ye ɲɔgɔn lajɛ sensun kɔrɔ Sisɛm, ka Abimelɛk kɛ masakɛ ye.
[7] O fɔra Jotam ye tuma min na, a taara k'i jɔ Garizim kulu kan k'a pɛrɛn ko: «Sisɛmkaw, aw ka ne lamɛn, Ala fana ka aw lamɛn.
[8] Don dɔ la jirisunw taara ko u bɛ masakɛ mun ka sigi u kun na. U y'a fɔ olive sun ye ko: ‹I ka sigi an kun na.›
[9] Olive sun ye u jaabi ko: ‹Ne tulu bɛ Ala ni mɔgɔ bonya, ne ka o to yen ka ne finifana aw kun na wa?›
[10] O tuma la jiriw y'a fɔ toro sun ye ko: ‹Na, i sigi an kun na.›
[11] Nka toro sun ko: ‹Ne ka ne mɔ duman to yen ka taa ne finifana jiriw kun na wa?›
[12] O kɔ, jiriw y'a fɔ rezɛn sun ye ko: ‹I ka na i sigi an kun na.›
[13] Nka rezɛn sun y'a fɔ u ye ko: ‹Ne ji duman, min bɛ mɔgɔw ni Ala nisɔndiya, ne ka o to yen ka taa ne finifana jiriw kun na wa?›
[14] O tuma la jiriw bɛɛ y'a fɔ ŋɔni sun ye ko: ‹Na, i sigi an kun na ka kɛ an ka masakɛ ye.›
[15] Nwɔni sun ye u jaabi ko: ‹Ni aw b'a fɛ ka ne mun ka sigi aw kun na, a' ye na aw sigi ne suma kɔrɔ. Ni o ma kɛ, tasuma ka bɔ ŋɔni sun na ka Liban sedere sun bɛɛ jeni.›
[16] «Ayiwa sisan, aw ye Abimelɛk kɛ aw ka masakɛ ye. O ye ko sɛbɛ ni ko tilennen ye wa? Aw ye ko ɲuman kɛ Jerubal ni a ka so ye wa? A ka kan ka ko ɲuman min sɔrɔ aw fɛ, aw ye o kɛ a ye wa?
[17] Ne fa ye kɛlɛ kɛ aw ye, a y'a ni di ka aw tila ka bɔ Madiankaw bolo.
[18] Nka aw wulila ne fa ka so kama ka a denkɛw cɛ biwolonwula kan tigɛ farakurun kelen kan bi ka a ka jɔnmuso denkɛ Abimelɛk kɛ aw ka masakɛ ye Sisɛm, k'a masɔrɔ aw balimakɛ don.
[19] Ayiwa ni a y'a sɔrɔ ko aw ye ko ɲuman kɛ ka ko tilennen kɛ Jerubal ni a ka so ye bi, Abimelɛk ka aw nisɔndiya, aw fana ka ale nisɔndiya.
[20] Ni o ma kɛ, tasuma ka bɔ Abimelɛk la ka Sisɛmkaw ni Bɛt-Milokaw bɛɛ jeni. Tasuma ka bɔ Sisɛmkaw ni Milo kɔnɔ mɔgɔw fana la ka Abimelɛk jeni k'a ban.»
[21] O kɔ, Jotam bolila. A taara k'i dogo Ber ka i yɔrɔ janya a balimakɛ Abimelɛk la.
[22] Abimelɛk ye Israɛl mara san saba kɔnɔ.
[23] O kɔ, Ala ye miirili juguw don Abimelɛk ni Sisɛmkaw cɛ. Olu ye Abimelɛk janfa
[24] walisa ka Jerubal denkɛ cɛ biwolonwula hakɛ bɔ Abimelɛk la, a ye olu minw faga. Sisɛmka minw y'a dɛmɛ ka a balimakɛw faga, ka u joli hakɛ bɔ olu fana la.
[25] Sisɛmkaw ye jɛ siri Abimelɛk kama ka mɔgɔ dɔw bila san fɛ ka u merun sira da la senna taamabaaw ɲɛ. Mɔgɔ o mɔgɔ tun bɛ tɛmɛn, u tun bɛ bi olu kan. O fɔra Abimelɛk ye.
[26] O tuma la Ebɛd denkɛ Gal ni a balimaw taara Sisɛm. Sisɛm cɛw y'a daminɛ ka da a la.
[27] Sisɛmkaw bɔra ka taa kungo kɔnɔ ka u ka rezɛn kari ka o ji bɔ ka kɛ minni fɛn ye ka u nisɔndiya. O kɔ, u donna u ka bato fɛn ka bon kɔnɔ ka dumuni kɛ ka minni kɛ ka Abimelɛk danga.
[28] O tuma la Ebɛd denkɛ Gal y'a fɔ ko: «Abimelɛk ye jɔn ye, Sisɛm ye mun ye fo an ka baara kɛ a ka mɔgɔw ye? Jerubal denkɛ tɛ wa? Zebul tɛ a kɔrɔsigi ye wa? U bɛ baara kɛ Sisɛm fa Hamɔr ye, nka an kɔni, mun na an ka baara kɛ o cɛ ye?
[29] E, ni fanga tun bɛ ne bolo ka nin jamana mara, ne tun na Abimelɛk gɛn.» O kɔ, a y'a fɔ Abimelɛk ye ko: «I ka kɛlɛkɛ cɛw labɛn ka gɛrɛ yan.»
[30] Dugumarabaa Zebul ye o kuma mɛn ka bɔ Ebɛd denkɛ Gal da la tuma min na, a dusu bɔra kosɛbɛ.
[31] A ye cidenw ci dogo la ka taa a fɔ Abimelɛk ye ko: «A filɛ, Ebɛd denkɛ Gal ni a balimaw nana Sisɛm. U b'a la ka dugu mɔgɔw lawuli i kama.
[32] Ayiwa, bi su in na, i ni i ka kɛlɛkɛ cɛw ka aw labɛn ka taa aw dogo foro la.
[33] Sɔgɔma da fɛ tile bɔ tuma la, i ka i tɛliya ka dugu minɛ. Ni Gal ni a fɛ mɔgɔw bɔra i kama tuma min na, i bɛ se min na, i ka o kɛ u la.»
[34] O tuma la Abimelɛk ni a nɔ fɛ mɔgɔw taara su fɛ ka u tila kulu naani ye ka u dogo Sisɛmkaw ɲɛ ka olu makɔnɔ.
[35] Ayiwa Ebɛd denkɛ Gal bɔra ka taa i jɔ dugu donda la. O tuma la Abimelɛk ni a nɔ fɛ mɔgɔw bɛɛ bɔra u dogo yɔrɔ la.
[36] Gal ye o mɔgɔw natɔ ye k'a fɔ Zebul ye ko: «Neɲɛ bɛ mɔgɔw jigintɔ la ka bɔ kulu la.» Zebul y'a fɔ a ye ko: «Iɲɛ bɛ kuluw suma la, i n'a fɔ mɔgɔw.»
[37] Nka Gal kumana ko kura ko: «A jɛlen don ko jamakulu dɔ jigintɔ don ka bɔ jamana san fɛ, jamakulu dɔ fana natɔ don filɛlikɛlaw ka sensun sira fɛ.»
[38] O tuma la Zebul ko: «E min bɛ o fɔ, e dun bɛ mun miiri o ko la, Abimelɛk ye jɔn ye fo an ka baara kɛ a ye? I ye mɔgɔ min mafiɲɛya, o tɛ nin ye wa? Ayiwa, i madon ka a kɛlɛ sa.»
[39] O tuma la Gal bɔra ka bila Sisɛmkaw ɲɛ ka taa Abimelɛk kɛlɛ.
[40] Abimelɛk tugura a nɔ fɛ, Gal bolila a ɲɛ. Kɛlɛkɛ cɛw caman fagara sani u ka se dugu donda la.
[41] Abimelɛk tora Aruma. Zebul fana ye Gal ni a balimaw gɛn ko u kana sigi Sisɛm tun.
[42] O dugusajɛ Sisɛmkaw bɔra ka taa kungo la. Abimelɛk ye o mɛn minkɛ, a ye a fɛ mɔgɔw tila kulu saba ye. Olu ye u dogo kungo kɔnɔ. A ye Sisɛmkaw bɔtɔ ye dugu kɔnɔ tuma min na, u bɔra u dogo yɔrɔ la ka tɛliya ka bi olu kan ka olu faga.
[44] Abimelɛk ni a fɛ mɔgɔw taara fo ka se dugu donda la, k'a sɔrɔ kulu tɔ fila girinna ka bi foro la mɔgɔw kan ka u faga.
[45] Abimelɛk ye tile bɛɛ kɛ ka o dugu kɛlɛ ka o mɔgɔw faga ka dugu ci ka kɔgɔ seri a yɔrɔ bɛɛ la.
[46] Sisɛm sankanso jan kɔnɔ cɛw bɛɛ ye o ye tuma min na, u donna batɔ fɛn Berit ka so kɔnɔ, a dogo yɔrɔ la.
[47] A fɔra Abimelɛk ye ko Sisɛm sankanso mɔgɔw bɛɛ ye u lajɛɲɔgɔn kan yen minkɛ,
[48] Abimelɛk ni a nɔ fɛ mɔgɔw yɛlɛnna ka taa Zalmɔn kulu kan ni jele ye a bolo ka jiribolo tigɛ k'a da a kan na. O kɔ, a y'a fɔ a nɔ fɛ mɔgɔw ye ko: «Ne ye min kɛ, aw ye o ye wa? Aw fana ka tɛliya ka o ɲɔgɔn kɛ.»
[49] O tuma la u bɛɛ kelen-kelen ye jiribolo kelen tigɛ ka tugu Abimelɛk la. U ye o jiribolow ton o dogo yɔrɔ da la ka tasuma bila a la. U ye tasuma kɛ ka o dogo yɔrɔ ni a kɔnɔ mɔgɔw bɛɛ jeni. Ayiwa Sisɛm sankanso kɔnɔ mɔgɔw bɛɛ jenina ten. Mɔgɔ waa kelenɲɔgɔn sara, cɛw ni musow la.
[50] O kɛlen kɔ, Abimelɛk taara Tebɛz, ka daga Tebɛz da la ka a minɛ.
[51] Sankanso jan barikama tun bɛ o dugu kɔnɔ. Dugu mɔgɔw bɛɛ bolila ka taa u dogo yen, cɛw ni musow. U ye o da sɔgɔ u da la ka yɛlɛn o san fɛ.
[52] Abimelɛk nana se fo sankanso ma ka o minɛ ka i madon a kon na ka tasuma bila a la.
[53] Nka muso dɔ ye wuguden fili ka bi Abimelɛk kun na k'a kun ci.
[54] O yɔrɔ nin bɛɛ, Abimelɛk ye a ka kɛlɛkɛ minan tabaa cɛni wele k'a fɔ a ye ko: «I ka npan sama ka ne faga walisa a kana fɔ ko muso ye ne faga.» O kamalen y'a sɔgɔ. O tuma la a sara.
[55] Kabini Israɛl cɛw y'a ye ko Abimelɛk sara, u bɛɛ kelen-kelen taara u yɛrɛw ka so.
[56] Ayiwa, Abimelɛk tun ye ko jugu min kɛ a fa la ka a balimakɛ cɛ biwolonwula faga, Ala ye o juru sara a yɛrɛ la.
[57] Ala ye Sisɛmkaw fana ka ko jugu kɛlen juru sara u la ka Jerubal denkɛ Jotam ka danga bi u kan.