[1] Samsɔn taara Gaza. A ye jatɔmuso dɔ ye yen. A donna o ka so.
[2] A fɔra Gaza cɛw ye ko: «Samsɔn bɛ yan.» O tuma la, u ye so lamini ka su bɛɛ kɛ ka dugu donda kɔlɔsi. U ma mankan si bɔ. U ko: «Ni dugu jɛra, an na a faga.»
[3] Samsɔn y'i da fo dugu tila. Dugu tila fɛ, a wulila ka dugu donda la kondon jiriw ni a kon balabala fila minɛ ka olu ni cɛtigɛw bɛɛ sama ka bɔ ka olu da a kaman kan ka taa ni u ye fo Heborɔn kuntilenna la kulu kan.
[4] O kɔ, Samsɔn ye Sorɛk jɛkɛnɛ la muso dɔ kanu, o tɔgɔ ko Delila.
[5] Filisitikaw kuntigiw taara o muso ka so k'a fɔ a ye ko: «I k'a nɛgɛn, a ye nin barika sɔrɔ yɔrɔ min na, i ka o dɔn, ani walisa an bɛ se ka min kɛ ka a minɛ k'a siri k'a tɔɔrɔ. An bɛɛ kelen-kelen na warijɛ waa kelen ni kɛmɛ-kɛmɛ di i ma.»
[6] O tuma la Delila y'a fɔ Samsɔn ye ko: «Ne b'i deli, i ye nin barikaba bɔ yɔrɔ min na, i ka o fɔ ne ye, ani mɔgɔ bɛ se ka i siri ni min ye ka i barika ban.»
[7] Samsɔn ko: «Ni ne sirila ni jurukisɛ kura wolonwula ye min ma ja fɔlɔ, o tuma la ne barika na ban, ne na kɛ i ko mɔgɔ gwansan.»
[8] Filisitikaw kuntigiw taara jurukisɛ kura wolonwula di Delila ma minw ma ja fɔlɔ. Delila y'a siri ni u ye.
[9] O y'a sɔrɔ mɔgɔw dogolen tun bɛ a ka so bon dɔ kɔnɔ. Delila y'a fɔ Samsɔn ye ko: «Samsɔn, Filisitikaw nana.» Nka a ye o jurukisɛw tigɛ i ko gaari jeninen tasuma fɛ. O cogo la, a barika sɔrɔ yɔrɔ ma dɔn.
[10] O kɔ, Delila y'a fɔ Samsɔn ye ko: «A filɛ, i bɛ tulon kɛ ne la ka nkalon tigɛ ne ye. Ne b'i deli, i bɛ se ka siri ni min ye, o fɔ ne ye sa.»
[11] Samsɔn y'a fɔ a ye ko: «Ni ne sirila ni jurukisɛ kunbaba kuraw ye, baara ma kɛ min na fɔlɔ, ne barika na ban, ne na kɛ i ko mɔgɔ gwansan.»
[12] O tuma la Delila ye jurukisɛ kunbaba kuraw ta ka Samsɔn siri ni u ye. O kɔ, k'a fɔ Samsɔn ye ko: «Samsɔn, Filisitikaw nana.» O y'a sɔrɔ mɔgɔw dogolen tun bɛ bon dɔ kɔnɔ. Nka Samsɔn ye o jurukisɛ kunbabaw tigɛ ka bɔ a bolo la i ko gaarikisɛ kelen.
[13] Delila y'a fɔ Samsɔn ye ko: «I bɛ tulon kɛ ne la halibi ka nkalon tigɛ ne ye. Ayiwa, i bɛ se ka siri ni min ye, o fɔ ne ye sa.» Samsɔn y'a jaabi ko: «I ka ne kunsigi tulukala wolonwula ni gese daɲɔgɔn fɛ.»
[14] Delila y'o kɛ, o kɔ, k'a fɔ Samsɔn ye ko: «Samsɔn, Filisitikaw nana.» Nka a wulila ka bɔ sunɔgɔ la ka a kunsigi ni o bankalama bɔ yen.
[15] O tuma la Delila ko: «I bɛ se k'a fɔ cogo di ko ne ko ka di i ye, k'a sɔrɔ i dusu tɛ ne fɛ. I ye tulon kɛ ne la siɲɛ saba, sabu i ma i barika bɔ yɔrɔ fɔ ne ye.»
[16] Delila digira a la ni ɲininkali ye don o don fo ka a sɛgɛn, fo a tun bɛ ɲini ka sa, a ma se ka o muɲu tun.
[17] O tuma la Samsɔn y'a kɔnɔna kow bɛɛ fɔ a ye ko: «Kun dilan ma don ne kun na abada, k'a masɔrɔ ne ye Nazireɛn ye Ala ye kabini ne bange don. Ni ne kun dira, ne fanga na ban. Ne na kɛ barikantan ye, ne na kɛ i ko mɔgɔ gwansan.»
[18] Delila y'a ye ko Samsɔn y'a kɔnɔna kow bɛɛ fɔ a ye k'a foori minkɛ, a ye ci bila ka taa Filisitikaw kuntigiw wele k'a fɔ u ye ko: «Aw ka na nin sen in na sabu a y'a kɔnɔna kow bɛɛ fɔ ne ye.» O tuma la Filisitikaw kuntigiw taara Delila ka so ni o warijɛ ye u bolo.
[19] Delila y'a to Samsɔn ka sunɔgɔ a sen kan. O kɔ, a ye cɛ dɔ wele ka a kunsigi tulukala wolonwula bɛɛ di. Delila y'a daminɛ k'a tɔɔrɔ. A barika tun bɔra a la.
[20] O tuma la Delila ko: «Samsɔn, Filisitikaw nana.» A wulila ka bɔ sunɔgɔ la k'a fɔ ko: «Ne na wuli ka bɔ i ko tɔw kɛra cogo min na, ka ne tila ka bɔ u bolo.» Nka a tun m'a dɔn ko Matigi y'a bila.
[21] Filisitikaw y'a minɛ k'a ɲɛ fila ci ka taa n'a ye Gaza k'a siri ni nsiranɛgɛ jɔlɔkɔ fila ye. U y'a bila sili la wugu la k'a to kasobon kɔnɔ.
[22] A kun min tun dira, o daminɛna ka nugu ko kura.
[23] O tuma la Filisitikaw kuntigiw ye ɲɔgɔn lajɛ ko u bɛ sarakaba bɔ u ka bato fɛn Dagɔn ye ka u ɲɛnajɛ k'a fɔ ko: «An ka bato fɛn ye an jugu Samsɔn don an bolo.»
[24] O mɔgɔw bɛɛ ye Samsɔn ye tuma min na, u ye u ka bato fɛn tanu. U ko: «An ka bato fɛn ye an jugu ni an ka jamana tiɲɛnbaa ani an ka mɔgɔ caman fagabaa don an bolo.»
[25] Ka u toɲɛnajɛ la ka ɲagali ka pɛrɛn, u ko: «Aw ka Samsɔn wele ka na, a ka anɲɛnajɛ.» O tuma la u nana ni Samsɔn ye ka bɔ kaso la. A ye u ɲɛnajɛ. U tun y'a jɔ samasen fila furancɛ la.
[26] Samsɔn y'a fɔ a ka bere minɛbaa kamalen ye ko: «Samasen minw bɛ so jukɔrɔ, ne bila olu kɔrɔ, ne ka n'sinsin u la.»
[27] O y'a sɔrɔ so kɔnɔna falen tun bɛ cɛw ni musow la. Filisitikaw kuntigiw bɛɛ tun bɛ yen. Mɔgɔ waa sabaɲɔgɔn tun bɛ so san fɛ, cɛw ni musow, ka Samsɔn dɔnkɛtɔ filɛ.
[28] O tuma la Samsɔn ye Matigi deli ko: «Matigi Ala, ne bɛ i deli, ko i ka i hakili to ne la. Ala, i ka barika di ne ma nin sen in na siɲɛ kelen walisa ne ka ne mɔnɛbɔ Filisitikaw la neɲɛ fila cili kosɔn.»
[29] Samsɔn ye so kɔnɔ cɛmancɛ jukɔrɔ samasen fila minɛ ka i sinsin u la ka a kininbolo da kelen kan ka a numanbolo da kelen kan.
[30] A ko: «Ne ni Filisitikaw ka saɲɔgɔn fɛ.» O kɔ, a y'u digi ni a barika bɛɛ ye. So bira Filisitikaw kuntigiw ni so kɔnɔ mɔgɔw bɛɛ kan. O cogo la a satɔ ye mɔgɔ caman faga ka tɛmɛn a ɲɛnama ka mɔgɔ fagalenw kan.
[31] O tuma la a balimaw ni a fa ka so mɔgɔw taara a su ta ka taa n'a ye u ka so k'a su don Zorea ni Estaol cɛ, a fa Manoa ka su don yɔrɔ la. A kɛra Israɛl ka kiritigɛla ye san mugan kɔnɔ.