[1] Ehud salen kɔ, Israɛl bɔnsɔn ye ko jugu kɛ Matigi ɲɛ kɔrɔ ko kura.
[2] O de kosɔn Matigi ye u don Kanan masakɛ Jabin bolo, o sigilen tun bɛ Hazɔr. O ka kɛlɛ kuntigi tun ye Sisera ye. O sigilen tun bɛ Harosɛt-Goyim.
[3] O tuma la Israɛl bɔnsɔn kasira Matigi nɔ fɛ, k'a masɔrɔ nɛgɛ wotoro kɛmɛ kɔnɔntɔn tun bɛ masakɛ Jabin fɛ. A ye a fanga digi Israɛl bɔnsɔn na ka u tɔɔrɔ san mugan kɔnɔ.
[4] Lapidɔt muso Debora tun ye kiramusoma ye o tuma la. A tun ye Israɛl ka kiritigɛla ye.
[5] A sigilen tun bɛ Debora ka ntamaro sun kɔrɔ Rama ani Bɛtɛl cɛ, Efrayim kulu jamana la. Israɛl bɔnsɔn tun bɛ yɛlɛn ka taa a sɛgɛrɛ u ka kiri kow la.
[6] Ale de ye ci bila ka Abinoam denkɛ Barak wele ka bɔ Nefitali siya ka dugu Kedɛs la, k'a fɔ a ye ko: «Matigi, Israɛl ka Ala ye nin ci di, ko i ka yɛlɛn ka taa Tabɔr kulu kan. I ka taa ni mɔgɔ waa tan ye i bolo ka bɔ Nefitali bɔnsɔn ni Zabulɔn bɔnsɔn na,
[7] ko a na taa ni Jabin ka kɛlɛ kuntigi Sisera ni a ka nɛgɛ wotorow ni a ka kɛlɛkɛ cɛw ye Kisɔn baji da la ka u don i bolo.»
[8] Barak y'a fɔ Debora ye ko: «Ni i bɛ taa ne fɛ, ne na taa, nka ni i tɛ taa ne fɛ, ne tɛna taa.»
[9] O tuma la Debora ko: «Ɔwɔ, ne bɛna taa i fɛ, nka o se sɔrɔli bonya tɛna kɛ i ta ye, k'a masɔrɔ Matigi na Sisera don muso dɔ bolo.» O tuma la Debora wulila ka taa Barak fɛ Kedɛs.
[10] Barak ye Zabulɔn bɔnsɔn ni Nefitali bɔnsɔn lajɛ Kedɛs. Mɔgɔ waa tan tugura a kɔ. Debora fana tun bɛ a fɛ.
[11] O y'a sɔrɔ Keni siya Hebɛr farala Musa birankɛ Hobab denw la. O tun ye a ka finiso jɔ sensun kɔrɔ Zanayim, o bɛ Kedɛs kɛrɛ fɛ.
[12] A fɔra Sisera ye ko Abinoam denkɛ Barak yɛlɛnna ka taa Tabɔr kulu kan.
[13] O tuma la Sisera ye a ka nɛgɛ wotoro kɛmɛ kɔnɔntɔn ni a ka mɔgɔw bɛɛ lajɛ Harosɛt-Goyim ka taa ni u ye Kisɔn ba da la.
[14] Debora y'a fɔ Barak ye ko: «I ka wuli, sabu Matigi na Sisera don i bolo bi. Matigi yɛrɛ bɛ taa i ɲɛ fɛ.» O la, Barak jiginna ka bɔ Tabɔr kulu kan ni o mɔgɔ waa tan tugulen ye a kɔ.
[15] Matigi ye npan nun bɔlen ci Barakɲɛ ka Sisera ni a ka wotorow ni a ka kɛlɛbolow gɛn. Sisera jiginna ka bɔ a ka wotoro kɔnɔ ka boli a sen na.
[16] Barak tugura wotorow ni kɛlɛkɛ cɛw nɔ fɛ fo ka taa se Harosɛt-Goyim. Sisera ka kɛlɛkɛ cɛw fagara ni npan ye. Hali u la mɔgɔ kelen ma dan kɛ.
[17] Sisera bolila a sen na ka taa Keni siya Hebɛr muso Jaɛl ka finiso fan fɛ, k'a masɔrɔ hɛrɛ tun bɛ Hazɔr masakɛ Jabin ni Keni siya Hebɛr ka so cɛ.
[18] Jaɛl bɔra ka taa Sisera kunbɛn k'a fɔ a ye ko: «I ka don, ne matigi, i ka don ne ka so. I kana siran.» O tuma la Sisera donna a ka finiso kɔnɔ. Jaɛl ye birifini biri a la.
[19] O kɔ, Sisera y'a fɔ a ye ko: «Ne b'i deli, i ka ji minta dɔɔnin di ne ma, sabu minnɔgɔ bɛ ne la.» Jaɛl ye foroko dayɛlɛ ka nɔnɔ di a ma a k'a min, o kɔ ka birifini biri a la.
[20] O kɔ, a y'a fɔ Jaɛl ye ko: «I jɔ finiso da la. Ni mɔgɔ dɔ nana i ɲininka ko yala mɔgɔ dɔ bɛ yen wa, i k'a fɔ ko: ‹Ayi.›»
[21] O tuma la Hebɛr muso Jaɛl ye finiso bɔlɔ dɔ ta ka marito ta a bolo ka gɛrɛ Sisera la dɔɔnin dɔɔnin ka o bɔlɔ gengen a ɲɛ kankun na fo ka a don dugu rɔ. Sunɔgɔ tun ye Sisera labɔ kosɛbɛ, k'a masɔrɔ a sɛgɛnnen tun don. Ayiwa a sara.
[22] Ka Barak tugulen to Sisera nɔ fɛ, Jaɛl bɔra ka a kunbɛn k'a fɔ a ye ko: «Na, i bɛ cɛ min ɲini, ne na o jira i la.» Barak donna a ka so kɔnɔ. Sisera dalen filɛ duguma, a salen don. Bɔlɔ gengennen tun bɛ a ɲɛ kankun na.
[23] Ala ye Kanan masakɛ Jabin majigin Israɛl bɔnsɔnɲɛ o don na.
[24] Israɛl bɔnsɔn bolo digira Kanan masakɛ Jabin na ka ta'a fɛ, fo ka Kanan masakɛ Jabin halaki.