[1] Kiritigɛlaw waati la, kɔngɔba donna jamana kɔnɔ. Bɛtilɛhɛmka dɔ ni a muso ani a denkɛ fila bɔra Juda jamana la ka taa sigi yɔrɔ ɲini Moab jamana la.
[2] O cɛ tɔgɔ ko Elimelɛk ani a muso Naomi ni a denkɛ fila Makilɔn ni Kilijɔn, olu tun ye Efratakaw ye ka bɔ Juda jamana la Bɛtilɛhɛm. U sera Moab jamana la ka u sigi yen.
[3] Naomi cɛ Elimelɛk sara ka a ni a denkɛ fila to yen.
[4] Olu ye Moab bɔnsɔn muso dɔw furu. O muso kelen tɔgɔ ko Oripa, kelen tɔgɔ ko Ruti. U ye san tanɲɔgɔn kɛ yen.
[5] O kɔ, Makilɔn ni Kilijɔn fana sara. Naomi bɔnɛna a cɛ ni a denkɛ fila la.
[6] O tuma la Naomi ni a biranmusow wulila ka kɔsegin ka bɔ Moab jamana la ka taa a faso la, katuguni a y'a mɛn k'a to Moab jamana la ko Matigi ye u ka mɔgɔw dɛmɛ ka dumuni di u ma.
[7] O tuma la, a sigilen tun bɛ yɔrɔ min na, a wulila ka bɔ yen ka taa. A biranmuso fila fana taara a fɛ. U ye sira minɛ ko u bɛ taa Juda jamana la.
[8] O tuma la Naomi y'a fɔ a biranmuso fila ye ko: «Aw fila bɛɛ ka kɔsegin ka taa aw ka yɔrɔw la, aw baw ka sow la. Aw ye ko ɲuman kɛ o mɔgɔ salenw ni ne ye cogo min na, Matigi ka ko ɲuman kɛ aw ye ten.
[9] Matigi ka lafiya di aw bɛɛ kelen-kelen ma aw cɛw sow la.» O tuma la a ye u da susu, nka u ye kasikanba bɔ.
[10] Olu y'a fɔ Naomi ye ko: «Ayi, an na taa i fɛ i ka mɔgɔw ka jamana la.»
[11] Naomi ye u jaabi ko: «Ne denmusow, a' ye segin. Aw bɛ na ne fɛ mun na? Ne na sin di den wɛrɛw ma ko kura, olu ka kɛ aw cɛw ye wa?
[12] A' ye segin, ne denmusow. A' ye taa. Ne kɔrɔla furu ma. Hali ni cɛ tun bɛ ne fɛ bi ko ne jigi b'a la ko ne na denkɛw bange,
[13] yala aw na makɔnɔli kɛ ka ban furu ma fo olu ka bonya ka aw furu tun wa? Ayi, ne denmusow. Ne tɔɔrɔ ko ka kuna aw ko la haali, k'a masɔrɔ Matigi bolo digira ne la.»
[14] O tuma la u ye kasikanba bɔ ko kura. O kɔ, Oripa y'a biranmuso da susu ka foli di a ma, nka Ruti nɔrɔlen tora Naomi la.
[15] Naomi y'a fɔ Ruti ye ko: «I dɔgɔmuso talen filɛ a so mɔgɔw ni a ka bato fɛnw yɔrɔ. I fana ka kɔsegin ka taa a fɛ.»
[16] Nka Ruti ko: «I kana ne deli ko ne ka fara i la ka i to yen, k'a masɔrɔ i taara yɔrɔ o yɔrɔ, ne na taa yen. I sigira yɔrɔ o yɔrɔ, ne na sigi yen. I ka mɔgɔw na kɛ ne ka mɔgɔw ye, i ka Ala na kɛ ne ka Ala ye.
[17] I sara yɔrɔ o yɔrɔ, ne na sa yen, ne su na don yen. Ni fɛn wɛrɛ ye an fara ka bɔɲɔgɔn na ni saya tɛ, Matigi ka tɔɔrɔba lase ne ma.»
[18] Naomi y'a ye ko Ruti nɔrɔlen bɛ a la minkɛ, a ma kuma tun.
[19] O tuma la u ye taama daminɛɲɔgɔn fɛ ka taa se Bɛtilɛhɛm. U selen yen, dugu kɔnɔ mɔgɔw bɛɛ kabakoyara. Musow ko: «Nin ye Naomi ye wa?»
[20] Naomi y'u jaabi ko: «Aw kana ne wele ko Naomi, nka aw ka ne wele ko Mara k'a masɔrɔ Sebaayabɛɛtigi ye ko kunamanba kɛ ne la.
[21] Ne fɛn tigilama taara, nka Matigi ye ne bolo lankolon kɔsegin. Mun na aw bɛ ne wele ko Naomi k'a sɔrɔ Matigi ye ko jugu kɛ ne la? Sebaayabɛɛtigi ye bɔnɛ lase ne ma.»
[22] Ayiwa, Naomi ni a biranmuso Moab bɔnsɔn Ruti kɔseginna ka bɔ Moab jamana la. U sera Bɛtilɛhɛm orje suman kan daminɛ tuma la.