[1] Ayiwa Israɛl bɔnsɔn ye ko jugu kɛ Matigi ɲɛ kɔrɔ ko kura. Matigi ye u don Madiankaw bolo san wolonwula kɔnɔ.
[2] Madiankaw bolo digira Israɛl la kosɛbɛ. Israɛl bɔnsɔn ye yɛrɛ kundogo yɔrɔw ɲini kuluwow ni faraw cɛma Madiankaw ɲɛsiran kosɔn.
[3] Ni Israɛl bɔnsɔn tun ye danni kɛ, Madiankaw ni Amalɛk bɔnsɔn ani kɔrɔn fɛ mɔgɔw tun bɛ na u kama ka u kɛlɛ.
[4] Olu tun bɛ daga u da la, u tun bɛ Israɛl bɔnsɔn ka jamana sɛnɛ fɛnw tiɲɛn fo ka taa se Gaza. U tun bɛ Israɛl bɔnsɔn ka sagaw ni u ka misiw ani u ka faliw bɛɛ minɛ,
[5] katuguni u tun bɛ yɛlɛn ka taa ni u ka bagankuluw ni u ka finisow ye. U tun ka ca i ko ntɔnw. Mɔgɔw niɲaamɛw dama dɔnbali tun bɛ na jamana kɔnɔ k'a bɛɛ tiɲɛn.
[6] Israɛl bɔnsɔn barika dɔgɔyara Madiankaw fɛ o waati la. Israɛl bɔnsɔn ye Matigi tɔgɔ wele ko a ka u dɛmɛ.
[7] O tuma la Israɛl bɔnsɔn ye Matigi deli ko a ka u dɛmɛ ka Madiankaw kɛlɛ.
[8] Matigi ye kira dɔ ci u ma k'a fɔ u ye ko: «Matigi, Israɛl ka Ala ko: ‹Ne ye aw labɔ Misira ka aw sama ka bɔ jɔnya so kɔnɔ.
[9] Ne ye aw tila ka bɔ Misirakaw bolo ka aw tila ka bɔ aw tɔɔrɔbaaw bolo ka olu gɛn ka bɔ aw ɲɛ. Ne ye olu ka jamana di aw ma.
[10] Ne y'a fɔ aw ye ko: «Ne ye Matigi, aw ka Ala de ye, ko aw sigilen bɛ Amɔr siya ka jamana min na, aw kana siran olu ka bato fɛnw ɲɛ, nka aw ma sɔn ka ne kan lamɛn.» ›»
[11] O kɔ, Matigi ka mɛlɛkɛ nana i sigi sen jirisun kɔrɔ Ofira, o ye Abiezɛr bɔnsɔn Joas ta ye. Ale denkɛ Jedeɔn dogolen tun bɛ rezɛn ji bɔ yɔrɔ la ka alikama gosi Madiankaw ɲɛsiran kosɔn.
[12] Matigi ka mɛlɛkɛ y'i jira o la k'a fɔ a ye ko: «Kɛlɛkɛ cɛ farin, Matigi bɛ i fɛ.»
[13] Jedeɔn y'a jaabi ko: «E ne Matigi, ni Matigi bɛ an fɛ, mun na nin bɔnɛ kow bɛɛ sera an ma? An bɛnbaw kumana kabako minw bɛɛ ko la, ko Matigi ye olu kɛ ka an labɔ Misira, olu bɛ min sa? Ayiwa sisan Matigi ye an bila, a ye an don Madiankaw bolo.»
[14] Matigi y'i yɛlɛma a fan fɛ k'a fɔ a ye ko: «Barika min bɛ i la, i ka taa ni o ye ka Israɛl bɔnsɔn tila ka bɔ Madiankaw bolo, yala i m'a dɔn ko ne ye i ci wa?»
[15] Jedeɔn y'a jaabi ko: «Ayiwa, ne Matigi, ne na Israɛl tila ni mun ye? A filɛ, ne ka gwa barika ka dɔgɔ ka tɛmɛn Manase ka gwaw bɛɛ kan, ne fana ye ne fa ka du kɔnɔ mɔgɔw bɛɛ la fitinin ye.»
[16] Matigi y'a fɔ a ye ko: «Ne na kɛ i fɛ, i na Madiankaw gosi i ko cɛ kelen.»
[17] Jedeɔn ye kuma ta ko kura, a ko: «Ni ne ko diyara i ye, i ka taamashyɛn dɔ jira ne la ko e bɛ kuma ne fɛ.
[18] I kana i yɔrɔ janya yan na sani ne ka na ni ne ka saraka ye i ɲɛ kɔrɔ.» Matigi y'a jaabi ko: «Ne na to yan fo i ka kɔsegin ka na.»
[19] O tuma la Jedeɔn taara a ka so ka baden dɔ labɛn ka farini mugu efa ɲɛ kelen labɛn ka o kɛ buuruw fununbali ye. A ye sogo kɛ segi dɔ kɔnɔ ka naji kɛ daga kɔnɔ ka taa ni u ye sensun kɔrɔ, ka u di a ma.
[20] Matigi ka mɛlɛkɛ y'a fɔ a ye ko: «I ka sogo ni buuru misɛnw fununbali ta ka u bila nin fara kan ka naji bɔn o kan.» Jedeɔn ye o kɛ.
[21] O tuma la Matigi ka mɛlɛkɛ ye a bolo bere nun maga sogo ni buuru misɛnw fununbali la. Tasuma bɔra fara la ka o sogo ni buuru misɛnw fununbali jeni ka u ban. O kɛlen, Ala ka mɛlɛkɛ tununna a la.
[22] Jedeɔn y'a ye ko Matigi ka mɛlɛkɛ don minkɛ, a kulola ko: «Bɔnɛ bɛ ne ye, Matigi Ala, katuguni ne ye Matigi ye ɲɛda niɲɛda.»
[23] Nka Matigi y'a fɔ a ye ko: «Hɛrɛ ka kɛ i ye, i kana siran, i tɛna sa.»
[24] Jedeɔn ye saraka bɔlan jɔ Matigi ye o yɔrɔ la ka o tɔgɔ da ko «Hɛrɛtigi Ala.» O saraka bɔlan bɛ Ofira halibi, o duguba ye Abiezɛr ka gwa ta ye.
[25] O su fɛ, Matigi y'a fɔ a ye ko: «I ka i fa ka ntura bɔlan kelen minɛ ka san wolonwula ntura kelen minɛ k'o kɛ a filanan ye. I fa ye saraka bɔlan min jɔ Baal ye, i ka o ci ka Astarte boli tigɛtigɛ.
[26] I ka saraka bɔlan jɔ Matigi, i ka Ala ye o fara kan, ka ntura filanan ta ka saraka jenita jeni ni Astarte boli tigɛtigɛlen dɔgɔ ye.»
[27] Jedeɔn ye a ka baaraden cɛ tan wele. Matigi tun ye min fɔ a ye, a ye o kɛ. A tun bɛ siran a fa ka so mɔgɔw ni dugu kɔnɔ mɔgɔw ɲɛ, o de kosɔn a ye a ka baaradenw ci su fɛ, a ma u ci tile fɛ.
[28] Dugu kɔnɔ mɔgɔw wulila sɔgɔma da fɛ tuma min na, u ye Baal ka saraka bɔlan cilen ye ka Astarte boli jiriw tigɛlen ye ka o ntura filanan fana jeninen ye o saraka bɔlan kura jɔlen kan.
[29] U y'a fɔɲɔgɔn ye ko: «Jɔn ye nin kɛ?» U ye ɲininkali ni sɛgɛsɛgɛli kɛ. A fɔra u ye ko Joas denkɛ Jedeɔn nɔ don.
[30] O tuma la dugu kɔnɔ mɔgɔw y'a fɔ Joas ye ko: «I denkɛ labɔ yan. A ka faga, k'a masɔrɔ a ye Baal ka saraka bɔlan ci ka Astarte boli tigɛ.»
[31] Mɔgɔ minw tun wulila Joas kama, Joas ye olu jaabi ko: «Yala aw bɛ Baal dɛmɛ wa? Mɔgɔ o mɔgɔ bɛ Baal nɔ ta, o na faga bi yɛrɛ. Ni Baal ye bato fɛn ye, a ka a yɛrɛ mɔnɛ bɔ, katuguni a ka saraka bɔlan cira.»
[32] U ye Jedeɔn tɔgɔ da ko Jerubal o don na. O kɔrɔ ko: «Baal ka a yɛrɛ mɔnɛ bɔ,» sabu Jedeɔn ye a ka saraka bɔlan ci.
[33] Ayiwa, Madiankaw bɛɛ ni Amalɛk bɔnsɔn ani kɔrɔn fɛ mɔgɔw ye ɲɔgɔn lajɛ ka Jurdɛn ba tigɛ ka taa daga sigi Jizreɛl jɛkɛnɛ la.
[34] Matigi Ni jiginna Jedeɔn kan. A ye buru fyɛ, Abiezɛr bɔnsɔn ye u lajɛ ka tugu a kɔ.
[35] A ye cidenw bila ka taa Manase bɔnsɔn bɛɛ nɔ fɛ. Olu fana ye u lajɛ ka tugu a la. O kɔ, a ye cidenw bila ka taa Asɛr bɔnsɔn ni Zabulɔn bɔnsɔn ani Nefitali bɔnsɔn nɔ fɛ. Olu fana nana a yɔrɔ.
[36] Jedeɔn y'a fɔ Ala ye ko: «Ni i na Israɛl tila ne bolo, i ko i y'a fɔ cogo min na,
[37] ayiwa, ne na saga si kannen da gendekɛnɛ la, ni ngomi dara saga si la, ni dugumalan jalen tora, ne n'a dɔn ko i na Israɛl tila ne bolo fɛ i ko i y'a fɔ cogo min na.»
[38] A kɛra ten. O dugusajɛ Jedeɔn solila ka saga si kannen bisi. Ngomiji bɔra a la ka bɛɛlɛ kelen fa.
[39] Jedeɔn y'a fɔ Ala ye ko kura ko: «I kana dimin ne kɔrɔ, ne tɛna kuma nin kelen kɔ. Ne b'i deli, i k'a to ne ka taamashyɛn kelen wɛrɛ deli saga si ko la. Saga si jalen ka to, nka ngomi ka da duguma a kɔrɔ.»
[40] Ala y'a kɛ ten o su fɛ fana. Saga si jalen tora, nka a dugumalan bɛɛ ɲiginnen tun don ni ngomi ye.