[1] Matigi ka mɛlɛkɛ bɔra Gilgal ka taa Bokim k'a fɔ ko: «Ne ye aw labɔ Misira, ne tun ye ne kali aw bɛnbaw ye jamana min ko la, ne nana ni aw ye o la. Ne ye layidu min ta aw ye, ne ko, ne tɛna o tiɲɛn fewu.
[2] Ne ko, aw kana layidu ta o jamana mɔgɔw ye, ko aw ka u ka saraka bɔlanw ci. Nka aw ma ne kan minɛ. Mun na aw ye o kɛ?
[3] Ayiwa sisan, ne tɛna u gɛn ka bɔ aw ɲɛ, nka u na digi aw la, u ka bato fɛnw na kɛ aw minɛli jan ye.»
[4] Ayiwa, Matigi ka mɛlɛkɛ tilara o kuma la minkɛ, o yɔrɔ nin bɛɛ Israɛl bɔnsɔn jama bɛɛ ye kulokan bɔ.
[5] U ye o yɔrɔ tɔgɔ da ko Bokim. U ye saraka faga Matigi ye yen.
[6] Josue ye jama labila tuma min na, Israɛl bɔnsɔn bɛɛ taara u yɛrɛw ka yɔrɔ la ka taa u sigi u ciyɛn kun na jamana kɔnɔ.
[7] Jama ye baara kɛ Matigi ye Josue si bɛɛ la ani cɛkɔrɔbaw si bɛɛ la Josue salen kɔ, olu minw ye Matigi ka koba kɛlenw ye Israɛl ye.
[8] O kɔ, Nun denkɛ Josue, Matigi ka baaraden sara k'a si to san kɛmɛ ni tan na.
[9] U ye a su don a ciyɛn dugukolo la Timnat-Herɛs, Efrayim kulu jamana la, Gas kulu saheli yanfan fɛ.
[10] O waati mɔgɔw bɛɛ kafora u bɛnbaw kan. Bɔnsɔn wɛrɛ wulila olu kɔ minw ma Matigi dɔn, a tun ye ko minw kɛ Israɛl bɔnsɔn ye, u ma olu fana dɔn.
[11] Israɛl bɔnsɔn ye ko jugu kɛ Matigi ɲɛ kɔrɔ ka Baalw bato.
[12] Matigi, u bɛnbaw ka Ala, min ye u labɔ Misira jamana la, u ye o bila ka tugu bato fɛn wɛrɛw nɔ fɛ, u kɛrɛfɛ siyaw ka bato fɛnw kɔni, ka u biri olu kɔrɔ. U ye Matigi dusu dimin.
[13] U ye Matigi bila o tuma la ka Baal ni Astarte boliw bato.
[14] Matigi dusu bɔra Israɛl bɔnsɔn kɔrɔ. A ye u don cɛlikɛlaw bolo, olu ye u ka fɛnw bɛɛ cɛ. A ye u feere u lamini juguw ma. U ma se ka jɔ u juguw ɲɛ fewu.
[15] Matigi bolo tun bɛ u kama u taa yɔrɔw bɛɛ la ka ko jugu kɛ u la i ko Matigi tun y'a kali k'a fɔ u ye cogo min na. U tɔɔrɔla kosɛbɛ.
[16] Matigi ye kiritigɛlaw lawuli u ye, o waati la olu ye u tila ka bɔ u juguw bolo.
[17] O bɛɛ n'a ta u ma u ka kiritigɛlaw kan minɛ, k'a masɔrɔ u ye baara kɛ bato fɛn wɛrɛw ye ka olu bato. U bɛnbaw tun bɛ sira min taama ka Matigi ka ci fɔlenw mara, u murutira o ma joona ka a kan bila.
[18] Matigi tun bɛ kiritigɛla lawuli u ye tuma o tuma, Matigi tun bɛ to o kiritigɛla fɛ. A tun bɛ u tila ka bɔ u juguw bolo, ka o kiritigɛlaɲɛnama to. Matigi tun bɛ makari u la ni a tun ye u tɔɔrɔlen degunlen ye u juguw fɛ tuma min na.
[19] O kɔ, ni o kiritigɛla sara, u tun bɛ segin kɔ ka u yɛrɛ nɔgɔ ka tɛmɛn u bɛnbaw kan ka tugu bato fɛn wɛrɛw la ka baara kɛ olu ye ka u bato. U tun t'a fɛ ka u ka kɛwale juguw wala u ka dusukun gɛlɛya dabila.
[20] Ayiwa Matigi dusu bɔra Israɛl kɔrɔ, a ko: «Ne tun ye layidu min ta nin siya bɛnbaw ye, nin siya ye o tiɲɛn, u ma ne kan minɛ fewu.
[21] O de y'a to, Josue sara ka siya minw to u kɛrɛ fɛ, ne kɔni, ne tɛna olu gɛn ka bɔ u ɲɛ tun.
[22] O tun ye Israɛl kɔrɔbɔtɔ ye ka filɛ yala ni u na Matigi ka sira taama k'a kan minɛ i ko u bɛnbaw y'a kɛ cogo min na wala ni u tɛna a kɛ ten.»
[23] O de y'a to Matigi ma siya minw gɛn ka bɔ o jamana kɔnɔ joona, Matigi ye olu to yen. A ma u don Josue bolo.