[1] Samsɔn jiginna ka taa Timna. A ye musɔ dɔ ye Filisitikaw denmusow cɛma.
[2] A seginna ka taa so tuma min na, a y'a fɔ a fa ni a ba ye ko: «Ne ye muso dɔ ye Timna Filisitikaw denmusow cɛma. Aw ka o ɲini ne ye furu la sisan.»
[3] A fa ni a ba y'a fɔ a ye ko: «Muso si tɛ sɔrɔ i balima denmusow cɛma ani an ka mɔgɔw cɛma fo i bɛ taa muso ɲini Filisitikaw cɛma wa?» Samsɔn y'a fa jaabi ko: «I ka a ta ne ye k'a masɔrɔ a ko ka di ne ye.»
[4] A fa ni a ba tun m'a dɔn ko o ko bɔra Matigi de la, k'a masɔrɔ Matigi tun bɛ cogo ɲini ka Filisitikaw kɛlɛ, sabu Filisitikaw tun bɛ Israɛl bɔnsɔn kun na o tuma la.
[5] Samsɔn ni a fa n'a ba jiginna ka taa Timna. U surunyalen Timnakaw ka rezɛn tuw la, waraba kamalen dɔ gɔrɔndɔtɔ bɔra ka a kunbɛn.
[6] Matigi Ni jiginna Samsɔn kan ni fangaba ye k'a sɔrɔ foyi tun tɛ a bolo. A ye o wara cɛ fara i ko mɔgɔ bɛ baden cɛ fara cogo min na. A ye o kɛ, nka a ma o fɔ a fa ni a ba si ye.
[7] A jiginna ka taa ka kuma o muso fɛ. A ko diyara Samsɔn ye.
[8] Waati dɔ tɛmɛnnen kɔ, a nana ko a b'a muso furu siri. K'a to sira la ka taa, a farala ka o waraba su filɛ. A filɛ, didenkulu tun ye di da o waraba su kɔnɔ.
[9] A ye o dɔ ta a bolo ka o dun sira la ka taa. A sera a fa n'a ba ma minkɛ, a ye dɔ di olu ma. U y'a dun, nka a m'a fɔ u ye ko o di bɔra waraba su kɔnɔ.
[10] A fa taara o muso ka so. Samsɔn ye a ka kɔɲɔ dumuni labɛn. O tun ye kamalenw ka laada ye.
[11] U ye Samsɔn ye minkɛ, u ye kamalen bisaba wele ka kɛ a tɔɲɔgɔnw ye.
[12] Samsɔn y'a fɔ u ye ko: «Ne bɛ ntalen dɔ da aw ye. Ni aw ye o kɔrɔ dɔn ka ne jaabi kɔɲɔ tile wolonwula kɔnɔ, ne na dulɔkiba bisaba di aw ma.
[13] Nka ni aw ma se ka a kɔrɔ fɔ ne ye, aw fana na dulɔkiba bisaba ni jama don fini bisaba di ne ma.» U y'a jaabi ko: «I ka ntalen da, an na a lamɛn.»
[14] O tuma la a y'a fɔ u ye ko: «Dumuni fɛn bɔra dumunikɛla kɔnɔ, fɛn timinman bɔra fɛn barikama kɔnɔ.» U ma se ka o ntalen kɔrɔ fɔ tile saba kɔnɔ.
[15] Tile wolonwulanan don, u y'a fɔ Samsɔn muso ye ko: «I cɛ nɛgɛn k'a ɲininka nin ntalen kɔrɔ la k'a fɔ an ye, n'o tɛ, an na i ni i fa ka so jeni. Yala an welela aw fɛ ka na faantanya bila an na wa?»
[16] Samsɔn muso tun bɛ kasi a kɛrɛ fɛ k'a fɔ a ye ko: «Siga t'a la, ne ko man di i ye fewu, i tɛ ne kanu. I ye ntalen da ne jɛɲɔgɔnw ye, i ma o kɔrɔ fɔ ne ye.» Samsɔn y'a jaabi ko: «A filɛ, ne ma ninɲɛ fɔ ne fa ni ne ba ye. Ne ka o ɲɛ fɔ e ye wa?»
[17] O muso kasira Samsɔn kɛrɛ fɛ kɔɲɔ ko tile wolonwula kɔnɔ. A tile wolonwulanan don Samsɔn y'a ɲɛ fɔ a ye k'a sɔrɔ a tun y'a sɛgɛn. O kɔ, o muso ye o lakali a jɛɲɔgɔnw ye.
[18] A tile wolonwulanan don sani tile ka bi dugu kɔnɔ cɛw y'a fɔ Samsɔn ye ko: «Mun ka timin ni di ye? Mun barika ka bon ni waraba barika ye?» Samsɔn y'a fɔ u ye ko: «Ni aw tun ma aw ka misidaba sama ni ne ka misi geren ye, aw tun tɛna ne ka ntalen kɔrɔ dɔn.»
[19] O tuma la Matigi Ni jiginna Samsɔn kan, a jiginna ka taa Askalɔn ka Askalɔnkaw cɛ bisaba faga ka u ka finiw cɛ ka o jama don finiw di a ka ntalen kɔrɔ fɔbaaw ma. A diminna ka taa a fa ka so.
[20] Samsɔn muso dira a tɔɲɔgɔnkɛ dɔ ma, o min tun kɛra a teri ye.