[1] Pitit mwen, si ou resevwa pawòl mwen, Si ou sere kòmandman m yo anndan ou;
[2] Si ou pare zòrèy ou pou lasajès, Si ou panche kè w bò kote entèlijans;
[3] Wi, si ou rele entèlijans, Si ou leve vwa ou bay bon konprann;
[4] Si ou chèche l tankou lajan, Si ou chèche l byen tankou trezò kache,
[5] Konsa w ap konprann krentif pou Letènèl, W ap jwenn konesans Bondye.
[6] Paske, Letènèl bay lasajès, Konesans ak entèlijans soti nan bouch li.
[7] Li sere pwovizyon pou moun ki dwat, Li se yon boukliye pou moun ki mache san repwòch.
[8] Li pwoteje chemen jistis, Li veye sou wout fidèl li yo.
[9] Lè sa a, w ap konprann ladwati ak jistis Entegrite ak tout wout ki mennen nan bonè.
[10] Paske, lasajès ap vin nan kè ou, Konesans ap pran plezi nan nanm ou.
[11] Bon konprann ap veye sou ou, Entèlijans ap pwoteje ou,
[12] Pou delivre ou nan chemen malè, Anba moun k ap pale pawòl kòripsyon,
[13] Moun ki abandone wout ladwati Pou mache nan chemen fènwa,
[14] Moun ki kontan nan fè mal, Moun ki rejwi anpil nan kòripsyon,
[15] Moun ki suiv wout detounen, Ak moun ki pran chemen kwochi.
[16] Lasajès ap delivre ou anba fi deregle, Anba fi etranj k ap di pawòl dous,
[17] Fi ki abandone zanmi pwòch li genyen depi lè l te jèn, Ki bliye alyans Bondye li.
[18] Paske, kay li panche bò kote lanmò, Wout li mennen kote lespri defen yo ye.
[19] Pa gen pèsonn ki al jwenn li ki tounen, Ni ki jwenn chemen lavi ankò.
[20] Konsa, se pou w mache nan chemen moun debyen. Se pou w kenbe chemen moun jis yo.
[21] Paske, se jis yo k ap abite nan peyi a. Se moun ki san repwòch k ap rete ladan l.
[22] Men, mechan yo ap disparèt nan peyi a, Y ap derasinen moun trèt yo ladan.