[1] Moun ki renmen koreksyon renmen konesans, Men, moun ki rayi reprimand brital.
[2] Moun debyen jwenn favè nan men Letènèl, Men, li kondane moun k ap fè plan mechanste.
[3] Pèsonn pa ka tabli nan mechanste, Men, rasin jis yo p ap brannen.
[4] Yon bon madanm se kouwòn mari li, Men, yon madanm ki fè wont se yon manjezon nan zo l.
[5] Tout panse moun ki jis se ladwati, Men, konplo mechan yo se twonpe moun.
[6] Pawòl mechan an se pyèj pou vèse san, Men, bouch moun ki dwat delivre tèt yo.
[7] Mechan yo chavire, yo pa la ankò; Men, kay jis yo rete kanpe.
[8] Yo fè lwanj yon nonm pou sajès li, Men, yo meprize moun kè kòwonpi.
[9] Pito ou viv senp epi ou gen yon sèvitè, Pase pou w ap viv gran vi epi ou manke manje.
[10] Jis la pran swen bèt li gade, Men, zantray mechan yo kriyèl.
[11] Moun ki travay jaden li rasazye ak manje, Men, moun k ap pousuiv vanite se moun san konprann.
[12] Mechan an anvi sa mechan yo pran nan filè yo, Men, rasin jis la pote fwi.
[13] Mechan an pran nan pyèj peche bouch li, Men, jis la ap soti nan detrès.
[14] Li rasazye ak byen grasa fwi bouch li, Chak moun jwenn daprè travay men yo.
[15] Chemen moun san konprann parèt dwat nan je pa li, Men, moun ki koute konsèy se moun saj.
[16] Moun san konprann kite moun wè kòlè li tousuit, Men, moun ki kache yon wont se moun ki pridan.
[17] Moun ki di verite fè konnen jistis, Men, fo temwen an twonpe moun.
[18] Moun ki pale rèd blese tankou yon epe file. Men, lang saj yo pote gerizon.
[19] Bouch ki pale verite fèm pou tout tan, Men lang k ap bay manti la pou yon ti tan.
[20] Twonpri rete nan kè moun k ap medite mal, Men, lajwa se pou moun ki bay konsèy lapè.
[21] Okenn malè pa rive jis la, Men, mechan yo konble ak malè.
[22] Moun k ap bay manti se abominasyon devan Letènèl, Men, li pran plezi nan moun ki aji daprè laverite.
[23] Moun ki pridan kache konesans li, Men, kè moun san konprann yo fè konnen foli.
[24] Men moun aktif yo ap domine, Men, men ki parese ap rive nan fè kòve.
[25] Enkyetid nan kè lòm akable l, Men, yon bon pawòl rejwi moun.
[26] Jis la montre pwochen l bon chemen, Men, chemen mechan yo fè yo egare.
[27] Parese a pa boukannen jibye li, Men, byen lòm genyen ki gen valè, se lè l aktif.
[28] Lavi se nan chemen jistis li ye, E chemen sa a se chemen ki pa mennen nan lanmò.