[1] Markabaan biyya Ixaaliyaa dhaquu keenyatu murtoo ta'e. Warri kana murtoo godhan, Phaawulosin, jarreen hidhaman tokkos Yulii'os angafa dhibbaatti kennan; innis kutata waraana warra Roomaa ?Awugusxaa? jedhamee waamame keessa ture.
[2] Markaba mandara Adraamiixosii dhufe, gara buufata markaba kutaa biyya Asiyaa keessaa dhaquudhaaf qophaa'e, yaabbannee adeemne; Arisxaarkos, namni biyya Maqedooniyaa Tasaloniiqeedhaa dhufe tokko, nu duukaa ture.
[3] Borumtaas mandara Sidoonitti galle; Yulii'os immoo Phaawulosiif garaa laafee, akka inni dhaqee fira isaa dubbisee, waan isa barbaachise isaan biraa argatuuf, isa dhiise.
[4] Sidoonii kaanee, qilleensi achii as waan nutti qilleensa'eef, Qophros biyyicha bishaan keessaa sanatti da'annee adeemne.
[5] Fuullee kutaa biyya Qiliiqiyaa fi Phamfiliyaa darbine; galaanicha ceenee Miiraa mandara biyya Liiqiiyaa dhufne.
[6] Achitti angafichi dhibbaa markaba biyya Iskindriiyaatii dhufee, biyya Ixaaliyaatti adeemu tokko argee, itti nu dabarse.
[7] Markabichaanis guyyaa baay'ee suuta jennee adeemne; ittuma rakkannee fuullee Kniidoos, eegee biyya bishaanii geenye. Qilleensichis karaa sana adeemuu nu dhowwinaan, Qareexis biyya bishaan keessaa sanaan da'annee, fuullee Salmooniitiin baane.
[8] Qarqara galaanichaa irraa utuu hin fagaatin, rakkina guddaadhaan iddoo ?Buufata ba'eessa? jedhamu isa mandara Lase'aatti dhi'oo jiru, tokko dhufne.
[9] Kana keessas guyyoonni baay'een darban; yeroo sanatti bubbeenii fi qorri waan jabaatuuf, markabaan adeemuun sodaachisee ture. Guyyaa araarsaa jedhame kan itti sooman waan darbeef Phaawulos,
[10] ?Jara nana, yeroo kana markabaan itti fufnee adeemuun keenya kun rakkinatti nu galcha; fe'isichi markaba keessaa akka badu, markabichi akka cabu, lubbuun namaas akka dhumu anatti mul'ata? jedhee of eeggachiise.
[11] Angafichi dhibbaa garuu, dubbii Phaawulos dubbate irra, dubbii inni markabicha oofuu fi abbaan markabichaa dubbatan fudhate.
[12] Iddoon sun buufata yeroo gannaatiif hin ta'u ture. Kanaaf isaan keessaa garri caalan iddoo buufatichaatii ka'anii, yoo isaanii danda'ame Finiiqeetti galanii, ganna achi ba'uudhaaf murtoo godhan. Finiiqee immoo, buufata markabaa, Qareexis biyya bishaan keessaa lixa-biiftuu irraa gara mirgaatii fi gara bitaatti gara galtee dha.
[13] Qilleensi laphiin gara mirgaatii qilleensa'uu jalqabnaan, namoonni waan gochuuf yaadan raawwachuu waan danda'an isaanitti fakkaate; markaba isaanii hiikanii, qarqara Qareexisiin galaanicha irra adeeman.
[14] Baay'ee utuu hin turin qilleensi ?Qilleensa boruu gara bitaa? jedhamu Qareexis irraa galaanichatti qilleensa'e.
[15] Qilleensichi markabicha rukutee, fudhatee adeeme; markabichis qilleensichaan qabuu waan dadhabeef, itti gad dhiifnee oofamne.
[16] Kaawudaa biyya bishaan keessaa ishee xinnoo tokkoon da'annee, itti rakkannee, bidiruu isa markaba keenyatti hidhamee harkifamaa ture sana, qilleensicha harkaa baafachuu dandeenye.
[17] Bidiruu sana ol harkisanii markaba irra kaa'an; markabichuma iyyuu akka qilleensi gargar hin baafneef, funyyoodhaa fi fuuncaadhaan walitti hidhan. Gara bishaan ol dhi'ootti adeemanii, markabni lafa nu duraa rukuta jedhanii waan sodaataniif, mi'a markabicha suuta adeemsisu tokko bishaan keessatti gad dhiisanii, akkasumatti oofaman.
[18] Qilleensi baay'ee jabaan ittuma fufee waan nutti qilleensa'eef, borumtaa fe'isa markaba keessa jiru irraa galaanatti gad daddarbatan.
[19] Guyyaa sadaffaa isaattis immoo harka isaaniitiin mi'uma markabichaa iyyuu galaanatti gaggatan.
[20] Aduudhaa fi urjoota utuu hin argin guyyaa baay'ee dabarsine; qilleensi baay'ee jabaan sun nutti qilleensofnaan, yommusuma ooluudhaaf abdiin nuyi qabnu hundinuu in cite.
[21] Namoonni yeroo dheeraadhaaf nyaata lagannaan, Phaawulos ka'ee isaan gidduu dhaabatee, ?Jara nana, rakkinaa fi badiisa kana oolchuudhaaf, dubbii koo dhaga'uun, Qareexisii ka'uu dhiisuun in ta'a ture.
[22] Amma garuu isinan gorsa, jabaadhaa! Markabicha malee isin keessaa lubbuun nama tokkoo iyyuu hin badu.
[23] Waaqayyo koo isa ani kan isaa ta'e hojjedhuuf biraa, ergamaan eda halkan na bira dhufee,
[24] ?Hin sodaatin yaa Phaawulos, mootii warra Roomaa dura dhaabachuuf jirta; kunoo Waaqayyo ayyaana isaatiin, namoonni warri si duukaa jiran hundinuu du'a akka oolan, in godha? anaan jedhe.
[25] Kanaafis jabaadhaa yaa jarana! Akkuma ergamichaan anatti himame, akka inni ta'uuf Waaqayyotti nan amanadha.
[26] Haa ta'u iyyuu malee, markabni keenya biyya bishaan keessaa tokkotti lafa rukutuun isaa hin oolu? jedhe.
[27] Gaafa guyyaa kudha afuraffaa halkan, nuyi galaana Adriiyaa keessa asii fi achi oofamaa turre, gara halkan walakkaatti warri markabicha oofan biyyatti waan dhi'aatan se'an.
[28] Funyoo ittiin gad fageenya galaanaa safaran gad buusanii, gad fageenya bishaanichaa dhundhuma torbaatamii afur ta'uu isaa argan. Takka adeemanii ammas funyoo safaraa sana gad buusanii, dhundhuma shantamii ja'a ta'uu isaa in argan.
[29] Dhagaatti buuna jedhanii sodaatanii, qofoo sibiilaa isa ittiin markaba dhaaban afur, markabicha duubaan galaana keessatti gad darbatanii, barii lafaa hawwaan in eeggatu turan.
[30] Warri markaba oofan immoo markabicha keessaa ba'anii sokkuu barbaadan. Kanaaf qofoo sibiilaa isa ittiin markaba dhaaban, huuruu markabichaa duraan galaanatti kan gad darbachuu barbaadan fakkeessanii, bidiricha markaba irraa galaanatti gad buusuuf jedhan.
[31] Phaawulos garuu, ?Yoo warri kun markabicha keessa turan malee, isin ooluu hin dandeessan? jedhee angafa dhibbaatti, loltootattis in dubbate.
[32] Kana irratti loltoonni funyoota bidirichi ittiin hidhamee ture sana kutanii, bidiricha galaanatti gad gatan.
[33] Hamma lafti bari'utti immoo nyaata akka nyaataniif, Phaawulos namoota sana hundumaa gorsee, ?Nyaata utuu hin nyaatin turuun keessan har'a guyyaa kudha afuraffaa dha, homaas afaaniin hin qabne.
[34] Ooluudhaaf iyyuu nyaachuun isin barbaachisa, kanaaf nyaata akka nyaattan isin nan gorsa; isin keessaa mataa nama tokko irraa iyyuu rifeensi tokkichi illee hin badu? jedhe.
[35] Phaawulos kana erga jedhee booddee, buddeena fudhatee fuula isaanii duratti Waaqayyoof galata galche; buddeenichas cabsatee nyaachuu jalqabe.
[36] Isa irratti hundumti isaanii jajjabaatanii, ofuma isaaniitii iyyuu nyaata nyaatan.
[37] Nuyi namoonni markabicha keessaa walitti dhibba lamaa fi torbaatamii ja'a turre.
[38] Isaan erga nyaatanii quufanii booddee, markabichatti haa salphatu jedhanii, qamadii fe'amee ture galaanatti gad daddarbatan.
[39] Yommuu lafti bari'es, warri markaba oofan biyyichi eessa akka ta'e baruu dadhaban; garuu golba galaanaa, malkaan isaa kuufama cirrachaa qabu tokko ijaan qabanii, yoo isaanii danda'ameef markabicha itti qabuu barbaadan.
[40] Funyoo qofoo sibiilaa arfanuu, isa ittiin markaba dhaaban sanas kutanii, qofoo isaa galaana keessatti dhiisan. Achumaanis funyoo batoo isa ittiin markaba karaa agarsiisanii hiikan; sharaa qilleensaa isa fuula duraa qilleensatti qajeelchanii, markabicha gara golba galaanaatti qaban.
[41] Markabichi garuu kuufama cirrachaa isa bishaan jala jirutti lixe qabame; fuul dureen markabichaas cirrachicha humnaan gad qotee socho'uu dadhabe; dugda duuba isaa garuu humna dha'aa bishaaniitu caccabse.
[42] Warra hidhaman keessaa tokko illee daakee akka hin baaneef, warri loltuu hunduma isaanii ajjeesuu yaadan.
[43] Angafichi dhibbaa garuu Phaawulosin oolchuu barbaadee, warri loltuu isa yaadan akka hin raawwanneef isaan dhowwe. Warri daakaa beekan duraan dursanii galaanatti utaalanii, gara lafaatti haa ba'an;
[44] warri hafan immoo, battee mukaatiin yookiis caccabaa markabichaatiin duukaa haa bu'an, jedhee abboome. Hundumtinuus akka kanaatti oolanii gara lafaatti ba'an.