[1] РАББИ бораннынъ ичинден Эюпкъа бойле джевап берди:
[2] – Бильгисиз сёзлернен Меним япкъанларыма шубеленген бу адам кимдир?
[3] Шимди эркек киби, азырлан да, Мен сорайым, сен анълат.
[4] Мен дюньянынъ темелини къойгъанда, сен къайда эдинъ? Эгер бильсенъ, айт.
[5] Онынъ ольчюлерини ким бельгиледи? Билесинъми? Оны ольчеп, устюнден йипни ким чекти?
[6] -
[7] Ненинъ устюне темеллери къоюлды? Саба йылдызлары бирликте къувангъанынен, Алланынъ эписи огъуллары севинчлеринден къычыргъанынен, ким темельташыны къойды?
[8] Денъиз теренликтен фышкъырып чыкъкъанда, онынъ къапуларыны ким къапатты?
[9] О вакъыт Мен оны булутларнен, урбанен киби, сардым, къою къаранлыкънен, къундакъкъа саргъан киби сардым,
[10] онъа сынъырларыны къойдым, къапуларынен мандалларыны ерлештирдим.
[11] «Бу ерге къадар келип токътайджакъсынъ, гъурурлы далгъаларынъ бу ерде токътап къаладжакъ», – дедим.
[12] Омюринъде сабагъа буюрдынъмы? Танъгъа ерини косьтердинъми?
[13] Ер юзюнинъ уджларыны тутып, андаки яман адамларны силькитмеге,
[14] печат чамурны денъиштиргени киби, ер юзюни денъиштирмеге, оны чешит ренкли урбаны киби, донатмагъа,
[15] яман адамларнынъ ярыгъыны алмагъа, къолларынынъ кучюни ёкъ этмеге танъгъа айттынъмы?
[16] Денъизнинъ чокъракъларына далдынъмы? Теренликнинъ тюбюнде юрдинъми?
[17] Олюм къапулары сенинъ огюнъде ачылдымы? Олюм кольгесининъ къапуларыны корьдинъми?
[18] Дюньянынъ кенишлигини огрендинъми? Эгер буларнынъ эписини бильсенъ, айт.
[19] Ярыкъ булунгъан ерге ёл къайда? Къаранлыкънынъ чети де къаерде?
[20] Онынъ сынъырларына барып еттинъ, эбет? Эвине кеткен ёлны билесинъ?
[21] Шуны билесинъ, чюнки санки о заманда энди догъдынъ! Йылларынънынъ сайысы да пек буюктир!
[22] Къаргъа толу анбарларгъа кирдинъми? Бурчакъ сакълангъан ерни корьдинъми?
[23] Мен оларны сыкъынты куньлери ичюн, уруш ве дженк куньлери ичюн сакълайым.
[24] Яшын парылдагъан ёлу къайда? Куньдогъуш елининъ ер юзюнде эскен ёлу къаерде?
[25] Ягъмур тамчылары акъсын деп, ёлны ким ача? Гудюрдили яшынгъа ёлуны ким косьтере?
[26] Сонъ ягъмур бакъымсыз топракъларгъа, адам яшамагъан чёльге ягъа,
[27] сахраны ве чёльни сувгъа тойдура ве отны осьтюре.
[28] Ягъмурнынъ бабасы бармы? Чыкъ тамчыларыны ким яратыр?
[29] Буз кимнинъ къурсагъындан чыкъар? Коктен тюшкен къыравны ким догъар?
[30] Сувлар таш киби къаттылашыр, терен сувларнынъ устю бузлап къалыр.
[31] Улькер йылдызларыны багълап олурсынъмы? Орионнынъ багъларыны чезерсинъми?
[32] Мевсимлеринде йылдыз такъымларыны чыкъарып олурсынъмы? Джетемен йылдыз уюрине ёл косьтерирсинъми?
[33] Коклернинъ низамнамелерини билесинъми? Ер юзюнде Онынъ акимдарлыгъыны къурып олурсынъмы?
[34] Башынъа номай ягъмур ягъсын деп, булутларгъа сесинъни эшиттирирсинъми?
[35] Яшынлар йибергенинъе коре кетерлерми? Санъа: «Бизлер мындамыз», – деп айтарлармы?
[36] Юрекке акъыл ким къойды? Акъылгъа анълавны ким берди?
[37] Булутларны саймагъа кимнинъ акъылы етер? Кок савутларыны авдарып,
[38] тозны ятыштырып, ер юзюни къурутып, топракъ томарларыны ким япып олур?
[39] -
[40] Арслан сакъланып яткъанда, онъа кийик айванны тутып олурсынъмы? Балалары ювасында, я да талда тюбюнде раатлангъанда, оларнынъ къурсакъларыны тойдурырсынъмы?
[41] Къузгъуннынъ балалары ашсыз вакътында анда-мында атылгъанда, Алланы ярдымгъа чагъыргъанда, къузгъунгъа ашайджакъ ашыны ким азырлай?