[1] Истекнен ич бир къызгъа бакъмамагъа козьлериме буюрдым.
[2] Юкъарыдаки Алладан адамнынъ аладжакъ пайы недир? Коклердеки Къудретли онъа не береджек?
[3] Адалетсиз адамларгъа О, беля ёлламайджакъмы? Акъсызлыкъ япкъанларгъа бахытсызлыкъ бермейджекми?
[4] Юрген ёлларымны О, корьмедими? Эр аткъан адымымны саймадымы?
[5] Эгер ялан ёлунда юрген олсам, аягъым алдавгъа тараф ашыкъкъан олса,
[6] Алла мени догъру теразеде чексин ве догърулыгъымны корьсюн.
[7] Табанларым ёлуны джойгъан, юрегим козьлеримнинъ артындан кеткен, къолларыма кирли бир шей япышкъан олса,
[8] сачкъанымны башкъалары ашасын, оськен берекетим тамырындан чыкъарылсын.
[9] Эгер юрегим бир къадыннынъ артындан кеткен олса, башкъа адамнынъ къапусы янында пусып отургъан олсам,
[10] апайым башкъасынынъ богъдайыны чексин, башкъа акъайлар онен ятсын.
[11] Чюнки меним япкъаным – ахлякъсызлыкъ, джезаланаджакъ арекет олур эди,
[12] Эляк диярына тюшюреджек атеш киби, ойле япкъаным бутюн барлыгъымны ёкъ этер эди.
[13] Эгер хызметчилерим меннен давалашкъанда, мен адалетсиз олып, оларны ред эткен олсам,
[14] Алланынъ огюнде тургъанда, не япарым? О, манъа бакъкъанда, насыл джевап берерим?
[15] О, мени де, хызметчимни де ана къурсагъында яратмадымы? О да, бизим экимизни къарында ясамадымы?
[16] Ёкъсулларнынъ тилегини беджермедимми? Тул къадыннынъ умютини къырдыммы?
[17] Отьмегимни бир озюм ашадыммы? Оксюзлернен пайлашмадыммы?
[18] Балалыгъындан берли мен оксюзлерге баба киби олып, оларны осьтюрдим, догъгъанымдан берли тул къадынгъа ёл косьтердим.
[19] Урбасы олмагъаны ичюн гъайып олгъанны, я да кийимсиз бир ёкъсулны корьгенде,
[20] къойларымнынъ юньлеринден онъа сыджакъ урба бермедимми? Онынъ ичюн о, манъа яхшылыкъ тилемедими?
[21] Шеэр къапулары янында къол тутув олгъаныны билип, оксюзге къол котерген олсам,
[22] къолум омузымдан айырылсын, тирсек кемигим къырылсын.
[23] Амма мен Алладан келеджек джезадан къоркъам, Онынъ буюклигине къаршы турып оламам.
[24] Алтынгъа мен ишандыммы? Шу темиз маденге: «Сен – умютимсинъ», – дедимми?
[25] Барлыгъым буюк олгъанына, озь къолумнен чокъ къазангъаныма къувандыммы?
[26] Парылдагъан кунешке, арекет эткен къыйметли айгъа бакъкъанда,
[27] юрегим гизлиден алдандымы? Оларгъа къолларымны узатып, оларгъа ибадет эттимми?
[28] Бу да джезаланаджакъ шей олур эди, чюнки о вакъыт Юдже Алладан вазгечир эдим.
[29] Мени кореджек козю олмагъан адам белягъа огърагъанда, мен къувандыммы? Яманлыкъ онъа кельгенде, севинчнен къычырдыммы?
[30] Биревни къаргъамагъа ве бойле этип, гуна къазанмагъа агъзыма ёл бермедим.
[31] Чадырымдаки адамлар: «Онынъ этине къурсакъны тойдурмагъан адам ёкъ!» – айтмай эдими?
[32] Ич бир ёлджу геджени сокъакъта кечирмеди, чюнки къапуларым кельген-кечкенлерге ачыкъ эди.
[33] Адем киби, къабаатларымны гизледимми? Яманлыкъларымны багърымда сакъламагъа тырыштыммы?
[34] Ойле олса, буюк джемааттан къоркъып, сойларымнынъ нефретинден отюм патлап, сусар эдим ве къапудан чыкъмаз эдим.
[35] Ах, эгер мени эшиткен бири олса эди! Лафымны битирем. Къудретли Алла манъа джевап берсин, меннен давалашкъан кягъытыны язсын.
[36] Оны омузымда ташып, тадж киби башыма къояр эдим,
[37] эр аткъан адымымны онъа бильдирип, онъа, бир башлыкъ киби, якъынлашыр эдим.
[38] Эгер топрагъым манъа къаршы къычыргъан, ве онен берабер ёлакълары агълангъан олса,
[39] эгер мен махсулыны пара одемеден ашагъан, я да сабыларынынъ джаныны агъырткъан олсам,
[40] богъдай ерине тикен, арпа ерине кийик отлар осьсюн! Эюпнынъ лафы сонъуна етти.