[1] Наамалы Цофар бойле джевап берди:
[2] – О къадар сёз джевапсыз къалсынмы? Чокъ лаф эткен адам акълы сайылсынмы?
[3] Бош лафларынъа къаршы адамлар индемесинлерми? Сен мыскъыллайджакъсынъ да, кимсе сени утандырмасынмы?
[4] Сен: «Тюшюнгенлерим догъру, ве мен Сенинъ огюнъде темизим», – дейсинъ.
[5] Амма эгер Алла лаф этсе, санъа джевап берип, агъзыны ачса
[6] ве икметнинъ сырларыны санъа айтса (акъыл-идракъ эки тарафламадыр), биль ки, Алла гуналарынънынъ базыларыны унутты биле.
[7] Алланынъ терен тюшюнджелерини анълап олурсынъмы? Къудретлини бутюнлей огренип олурсынъмы?
[8] Икмети коклерден юксектир – не япып олурсынъ? О, олюлер дюньясындан терендир – не билип олурсынъ?
[9] Ольчюлери ер юзюнден узун, денъизден кеништир.
[10] Эгер О, келип, биревни тутып къапатса ве суд топлашувыны чагъырса, Онъа къаршы ким чыкъып олур?
[11] О, бош адамларны биле. Яманлыкъны корьсе, оны унутмаз.
[12] Кийик эшек адам олгъан сонъ, къабакъбаш акъыллы олур.
[13] Эгер сен юрегинъни темизлесенъ, ярдым сорап, къолларынъны Аллагъа узатсанъ,
[14] япкъан гуналарынъны озюнъден узакълаштырсанъ, акъсызлыкъкъа чадырларынъда булунмагъа ёл бермесенъ,
[15] утанмайып башынъны котерирсинъ, сагълам ве къоркъусыз ола билирсинъ.
[16] О заман беляларынъны унутырсынъ, оларны акъкъан сувлар киби анъарсынъ.
[17] Омрюнъ уйле кунешинден айдын олур, къаранлыкъ сабагъа чевирилир.
[18] Умют тапарсынъ ве ишанырсынъ, этрафынъ сакълы олып, раат юкъларсынъ.
[19] Ятарсынъ, ве ич кимсе сени къоркъузмаз. Чокъ адам сенинъ мераметинъни къыдырыр.
[20] Яман адамларнынъ козьлери исе сёнеджек, олар сакъланмагъа ер тапмайджакъ, умютлери де гъайып оладжакъ.