[1] Наамалы Цофар бойле джевап берди:
[2] – Мени къасеветлендирген тюшюнджелер джевап бермеге меджбур этелер, юрегим мени айтмагъа ашыкътыра.
[3] Мени масхара эткенини эшиттим, анълав рухунен мен джевап берерим.
[4] Бильмейсинъми, аджеба? Эвель-эзельден берли, адам ер юзюнде яратылгъанындан берли,
[5] яман адамларнынъ шенълиги къыскъадыр, алласызларнынъ къуванчы бир аньдир.
[6] Буюклиги коклерге юксельсе де, башы булутларгъа тийсе биле,
[7] озь пислиги киби, о, эбедиен гъайып оладжакъ, оны корьгенлер: «Къайдадыр о?» – деп сорайджакълар.
[8] Тюш киби, учаджакъ, оны тапмазлар, гедже руясы киби, ёкъ оладжакъ.
[9] Оны корьген козьлер бир даа оны корьмейджек, яшагъан ерлери онъа бакъмайджакъ.
[10] Балалары фукъарелернинъ мераметини къыдыраджакъ, хырсызлагъаныны озь къолунен къайтараджакъ.
[11] Кемиклери яш къуветке толу олгъанда, онен берабер топракъта ятаджакъ.
[12] Яманлыкъ агъзында татлы корюнсе де, оны тилининъ тюбюне гизлесе биле,
[13] оны тутып, ташламаса да, агъзынынъ ичинде оны сакъласа биле,
[14] бойле аш онынъ ичинде, къарнында йылан зеэрине чевириледжек.
[15] Юткъан байлыгъыны къусаджакъ, Алла зенгинлигини къурсагъындан зорлап чыкъараджакъ.
[16] Кобранынъ зеэрини о, эмеджек, йылан тиши оны ольдюреджек.
[17] Чокъракъларны, бал ве сют акъкъан озенлерни о, корьмейджек.
[18] Арам къазанчыны ашамайып кери къайтараджакъ. Байлыгъына коре акъкъы оладжакъ, лякин о, къуванмайджакъ.
[19] Чюнки ёкъсулларны хорлап къувалады, озю къурмагъан эвлерни запт этти.
[20] Онынъ нефси тоймакъ бильмеди, къызгъанчлыгъында кимсени аджымады.
[21] Ачкозьлюгинден бир шей къуртулып оламады, шунынъ ичюн байлыгъы къатты турамаз.
[22] Барлыкъ ичинде олгъанда, о, сыкъынтыгъа огърайджакъ, эр хорлангъаннынъ къолу онъа къаршы котериледжек.
[23] Къарныны бутюнлей толдурмакъ ичюн, Алла онъа къызгъын ачувыны ёллайджакъ, устюне ягъмур киби ягъдыраджакъ.
[24] О, демир силядан къачса, бакъыр яйдан окъ оны тешип кечеджек.
[25] Окъ оны урып, аркъасындан чыкъаджакъ, о зафра иле парылдап чыкъаджакъ, олюм къоркъусы башына тюшеджек.
[26] Къап-къара къаранлыкъ оны гизли беклейджек, уфюрильмеген атеш оны ашап битиреджек, чадырында къалгъанларнынъ башына яманлыкъ тюшеджек.
[27] Коклер акъсызлыгъыны ачаджакъ, ер юзю онъа къаршы чыкъаджакъ.
[28] Эвининъ берекети гъайып оладжакъ, Алла гъазабынынъ кунюнде эр шейи ирип кетеджек.
[29] Будыр яман адамнынъ Алладан аладжакъ къысмети, будыр Алланынъ онъа береджек пайы.