[1] जब थुमाले सातौं मोहर खोल्नुभयो, तब स्वर्गमा प्रायः आधा घण्टासम्म सन्नाटा छायो।
[2] अनि मैले परमेश्वरको सामुन्ने सात जना स्वर्गदूतहरूलाई उभिएको देखें; र तिनीहरूलाई सातओटा तुरहीहरू दिइयो।
[3] अर्का स्वर्गदूत, जससँग एउटा सुनको धुपौरो थियो, वेदीनिर आएर उभिए। तिनलाई सबै सन्तहरूको प्रार्थनासित सिंहासनको सामु भएको सुनको वेदीमा चढाउनलाई धेरै धूप दिइयो।
[4] स्वर्गदूतको हातबाट धूपको धूवाँ सन्तहरूका प्रार्थनासँगसँगै उँभो उठ्दै परमेश्वरको उपस्थितिमा गयो।
[5] तब ती स्वर्गदूतले धुपौरो लिएर त्यसमा वेदीको आगो भरे, अनि त्यसलाई पृथ्वीमाथि फ्याँकिदिए; अनि मेघ गर्जन, गड्याङ-गुडुङको आवाज, बिजुलीको चमक उत्पन्न भयो, अनि भुइँचालो गयो।
[6] तब सातओटा तुरहीहरू भएका ती सात स्वर्गदूतहरू तुरही फुक्न तयार भए।
[7] जब पहिलो स्वर्गदूतले आफ्नो तुरही फुके, तब त्यहाँ रगतमा मिसिएका असिना र आगो उत्पन्न भए, अनि पृथ्वीमाथि वर्षिए। पृथ्वीको एक तिहाइ भाग, रूखहरूको एक तिहाइ भाग अनि सबै हरिया घाँसहरू जलेर भस्म भयो।
[8] जब दोस्रो स्वर्गदूतले आफ्नो तुरही फुके, तब बल्दै गरेको एउटा ठूलो पहाडजस्तै कुनै वस्तु समुद्रमा फालियो; अनि समुद्रको एक तिहाइ भाग रगतमा परिणत भयो।
[9] समुद्रमा भएका जीवित प्राणीहरूको एक तिहाइ भाग मरे; र जहाजहरूको एक तिहाइ भाग नष्ट भए।
[10] जब तेस्रो स्वर्गदूतले आफ्नो तुरही फुके, तब राँकोझैं जलिरहेको एउटा ठूलो तारा आकाशबाट नदीहरूको एक तिहाइ भागमाथि अनि पानीहरूको मुहानहरूमाथि खस्यो;
[11] त्यस ताराको नाउँ तीतो हो। पानीको तेस्रो भाग तीतो भयो, र तीतो पानीका कारण धेरै मानिसहरू मरे।
[12] जब चौथो स्वर्गदूतले आफ्नो तुरही फुके, तब सूर्यको एक तिहाइ भागमाथि अनि चन्द्रमाको एक तिहाइ भागमाथि अनि ताराहरूको एक तिहाइ भागमाथि प्रहार भयो; जसद्वारा तिनीहरूका एक तिहाइ भाग अँध्यारो भइहाल्यो। दिनको एक तिहाइ भाग र रातको एक तिहाइ भाग पनि ज्योतिविहीन भइहाल्यो।
[13] जसरी मैले ध्यानसित हेरिरहेको थिएँ, आकाशको बीचमा उडिरहेको एउटा गरुडले चर्को सोरमा यसो भनिरहेको सुनें: “अरू तीन स्वर्गदूतहरूले फुक्न लागेका तुरहीका आवाजहरूको कारण पृथ्वीवासीहरूलाई आतङ्क! आतङ्क! आतङ्क!”