[1] एउटा ठूलो अनि अचम्मको चिन्ह स्वर्गमा देखियो: सूर्य ओढेकी, अनि पाउमुनि चन्द्र भएकी र शिरमाथि बाह्रओटा ताराहरूको मुकुट लगाएकी एउटी स्त्री देखा परिन्।
[2] उनी गर्भवती थिइन्, अनि सुत्केरी व्यथाको पीडाले गर्दा चिच्याइरहेकी थिइन्।
[3] तब स्वर्गमा अर्को चिन्ह देखा पर्यो: सात शिरहरू र दश सिङहरू भएको अनि शिरहरूमा सातओटा मुकुटहरू भएको एउटा विशाल रातो अजिङ्गर देखा पर्यो।
[4] त्यसको पुच्छरले आकाशका ताराहरूको तेस्रो भागलाई सोहोरेर पृथ्वीमा फाल्यो; अनि बच्चा जन्माउन लागेकी स्त्रीले बालक जन्माउनसाथ त्यसलाई खाइहाल्न भनेर त्यो अजिङ्गर त्यस स्त्रीको सामु उभियो।
[5] ती स्त्रीले एउटा छोरोलाई जन्म दिइन्, “जसले राष्ट्रहरूलाई फलामको राजदण्डले शासन गर्नेछ।” अनि तुरुन्तै तिनको बालक परमेश्वरकहाँ अनि उहाँको सिंहासन भएको ठाउँमा खोसेर लगियो।
[6] तब ती स्त्री परमेश्वरले एक हजार दुई सय साठी दिनसम्म तिनको हेरचाहको लागि तयार पारेर राखिदिनुभएको ठाउँ उजाडस्थानतिर भागिन्।
[7] अनि स्वर्गमा लडाइँ सुरु भयो। माइकल अनि तिनका दूतहरूले त्यस अजिङ्गरसित लडाइँ गरे, अनि अजिङ्गर र त्यसका दूतहरूले पनि तिनीहरूसँग लडाइँ गरे।
[8] तर त्यो अजिङ्गर त्यति बलियो थिएन; त्यसैले तिनीहरूले स्वर्गका आफ्ना ठाउँहरू हारे।
[9] त्यो विशाल अजिङ्गर तल फ्याँकियो। त्यो प्राचीन सर्प जसलाई दियाबलस वा शैतान पनि भनिन्छ, जसले सारा पृथ्वीलाई बहकाउँछ। त्यो अनि त्यसका दूतहरू त्योसँगै पृथ्वीमा फ्याँकिए।
[10] तब मैले स्वर्गमा यसो भनेको ठूलो आवाज सुनें: “अब हाम्रो परमेश्वरको मुक्ति र शक्ति अनि राज्य अनि उहाँका ख्रीष्टको अख्तियार आएका छन्। किनकि हाम्रा दाजुभाइ-दिदीबहिनीहरूलाई दोष लगाउने, जसले परमेश्वरको सामु तिनीहरूलाई दिनरात दोष लगाउँछ, त्यो तल फ्याँकिएको छ।
[11] तिनीहरूले त्यसलाई थुमाको रगतले अनि तिनीहरूका साक्षीको वचनले जितेका छन्; तिनीहरूले मृत्युसम्मै पनि आफ्ना जीवनलाई प्रेम गरेनन्।
[12] यसकारण हे स्वर्गहरू र स्वर्गहरूमा बस्नेहरूहो, तिमीहरू रमाओ! तर पृथ्वी र समुद्रलाई धिक्कार! किनकि आफ्नो समय छोटो छ भन्ने थाहा पाएर दियाबलस ठूलो क्रोधसित तिमीहरूकहाँ तल आएको छ!”
[13] जब त्यस अजिङ्गरले आफूलाई पृथ्वीमा फालिएको देख्यो, तब त्यसले छोरा जन्माउने त्यस स्त्रीलाई खेद्न थाल्यो।
[14] ती स्त्रीलाई गरुडका दुई पखेटाहरू दिइयो, ताकि तिनी उजाडस्थानमा उडेर जान सकोस्, जहाँ एक काल, दुई काल र आधा कालसम्मका लागि त्यस सर्पको पहुँचबाट बाहिर उनको हेरचाह होस् भनेर तयार पारिएको थियो।
[15] तब ती स्त्रीलाई बाढीले बगाओस् भनेर त्यस सर्पले स्त्रीको पछि आफ्नो मुखबाट नदीझैं पानी निकाल्यो।
[16] तर ती स्त्रीलाई सहायता गर्न पृथ्वीले आफ्नो मुख उघारेर त्यस अजिङ्गरले आफ्नो मुखबाट निकालेको नदीलाई निलिदियो।
[17] तर त्यो अजिङ्गर स्त्रीसित क्रोधित भयो, र उनका अरू सन्तानहरू जसले परमेश्वरका आज्ञाहरू पालन गर्छन् अनि येशूको साक्षी दिन्छन्, तिनीहरूसित लडाइँ गर्न गयो। अनि त्यो अजिङ्गर समुद्रको किनारमा उभियो।