[1] او زامان اَیّوب جاواب ورئب ددی:
[2] «یقئن بئلئرم کی، بله‌دئر، لاکئن تارینین قاباغیندا ائنسان نجه حاقلی چیخا بئلر؟
[3] اگر بئری اونونلا موباحئثه‌یه دورسا، اونون سؤزلرئنئن مئندن بئرئنه جاواب وره بئلمز.
[4] اورَکده حئکمتلی و گوجده قووّتلی اولان اودور، کئم اونون قاباغیندا دایاندی و سالامات قالدی؟
[5] اودور کی، داغلاری یرئندن قالدیریر، و اونلار بئلمئرلر، اونلاری قضبی ائله آلت-اوست اِدَر.
[6] دونیانی یرئندن تَرپه‌دن اودور، و اونون سوتونلاری اسئر؛
[7] اودور کی، گونون چیخماماسینا امر ادئر، و اولدوزلارین ائشیغینی اؤرتوب مؤهورله‌یئر.
[8] اودور کی، تَک باشینا گؤیلری سَرئر، و دهنزئن شپه‌لری اوستونه آیاق باسیر.
[9] دوبّی-اکبر بورجونو یارادان، جبّار و ثورَیّا بورجونو یارادان، جنوبون بورجلرئنی یارادان اودور.
[10] اودور کی، عاغیلا سیغمایان بؤیوک شیلر، سایی‌یا گلمه‌یَن عجایئب ائشلر گؤرور.
[11] باخ، یانیمدان اِله کچر کی، اونو گؤرمه‌رم؛ کچئب گدر، هچ حئسّ اتمه‌رم.
[12] باخ، قاپیب آپارسا، کئم اونا مانع اولار؟ کئم اونا ”نه ادئرسن“ دئیه بئلر؟
[13] تاری قضبئنی گری دؤندَرمز؛ اونون آلتیندا راحَبئن کؤمکچئلری اَیئلئرلر.
[14] اوندا من نجه اونا جاواب وره بئله‌رم، حوضوروندا نجه سؤز تاپا بئله‌رم؟
[15] حاقلی دا اولسام، اونا جاواب وره بئلمه‌رم؛ حؤکم اده‌نئمئن رحمئنه گرک یالواریم.
[16] اگر اونو چاغیرام و منه جاواب ورسه ده، گئنه ائنانا بئلمه‌رم کی، سَسئمه قولاق آسیرمیش.
[17] چونکی منی طوفانلا اَزئر، سببسئز یارالاریمی چوخالدیر.
[18] نَفَسئمی آلماغا قویمایاجاق، منی آجیلیقلا دولدوراجاقدیر.
[19] اگر ائش قووّه‌ده‌دئر، باخ، قووّه‌لی اولان اودور. اگر ائش عدالتده‌دئر، کئم اونو محکمه‌یه چکه بئلر؟
[20] صالح اولسام دا، آغزیم منی محکوم اده‌جک؛ کامئل اولسام دا، او منی تقصئرکار چیخارداجاق.
[21] من کامئلم؛ اؤزومو هچ بئر شی سایمیرام، حیاتیما خور باخیرام.
[22] هامیسی بئردئر؛ اونا گؤره دِیئرَم: او هم کامئل آدامی یوخ ادئر، هم ده شر آدامی.
[23] اگر موصئبت قفئلدن اؤلوم گتئرسه، تقصئرسئزلرئن چاره‌سئزلئیئنه گولور.
[24] دونیا شرئرئن اَلئنه ورئلئب؛ حاکئملرئنئن اوزونو اؤرتَن اودور. اگر او دیئل، بس کئمدئر؟
[25] گونلرئم چاپاردان داها سورعتلی گدئر، بئر خیئر تاپمادان قاچیرلار.
[26] قامیش قاییقلار کئمی کچئب گدئرلر؛ شئکارینین اوستونه هوجوم ادن قارا قوش کئمی‌دئرلر.
[27] اگر دئیَم: شئکایتئمی اونودوم؛ قوصّه‌لی اوزومو دَیئشئب فرحله‌نئم،
[28] گئنه ده چکدئیئم بوتون عذابلاردان قورخورام، چونکی منی تقصئرسئز سایمایاجاغینی بئلئرم.
[29] مادام کی، گئنه گوناهکار چیخاجاغام، بوشونا نئیه بله زحمت چکئم؟
[30] اگر قار سویو ائله یویونسام، اَللرئمی گئلابی ائله تمئزله‌سم،
[31] گئنه ده منی چئرکابا آتاجاقسان، پالتاریم بِله، مندن ائیره‌نئر.
[32] چونکی او منئم کئمی بشر دیئل کی، اونا جاواب ورئم، و بئرلئکده محکمه‌یه گِدَک.
[33] آرامیزدا بئر حؤکم ادن ده یوخ کی، اَلئنی ائکئمئزئن اوستونه قویسون.
[34] قوی تاری آغاجینی بئر اوستومدن گؤتورسون، قوی قورخوسو منی بئر دهشته سالماسین،
[35] او زامان اوندان قورخمادان دانیشاردیم. آمّا ائچئمده اِله دیئلم.