[1] او زامان اَیّوب جاواب ورئب ددی:
[2] «بو گون ده شئکایتئم آجی‌دیر، ناله ائچئنده اولدوغوم حالدا، اَلی اوستومه آغیردیر.
[3] کاشکی بئلسَیدئم اونو هارادا تاپا بئله‌جیم، کاشکی اونون مسکنئنه گده بئلسَیدئم.
[4] او زامان داعوامی اونون حوضوروندا آچاردیم، دلئل‌لرئمی دالبادال دوزَردئم.
[5] منه وره‌جیی جاوابی بئلردئم، منه دئیه‌جیی سؤزلری آنلایاردیم.
[6] قودرتئنئن بؤیوکلویو ائله مگر منئمله داعوالاشاردی؟! خِیر! یقئن سؤزومه قولاق آساردی.
[7] اورادا دوز بئر آدام اونونلا دلئل‌له‌شَردی؛ من ده حؤکم اده‌نئمئن اَلئندن همئشه‌لئک قورتاراردیم.
[8] باخین، ائره‌لی گدئرم، اورادا دیئل. دالییا گدئرم، اونو تاپا بئلمئرم.
[9] ائشله‌دئیی سول طرفه گدئرم، گؤزوم اونو سچمئر. ساغ طرفه دؤنور، اونو گؤره بئلمئرم.
[10] آمّا توتدوغوم یولو او بئلئر؛ منی ائمتاحان ادن زامان، قیزیل کئمی چیخارام.
[11] آیاغیم اونون یولونو بَرک توتوب؛ یولونو توتموشام و اوندان دؤنمه‌مئشم.
[12] دوداقلارینین امر اتدئیئندن آیریلمامیشام؛ آغزینین سؤزلرئنه، مؤحتاج اولدوغوم یمکدن داها چوخ دَیَر ورئب آنبار اتمئشم.
[13] لاکئن اونون کئمی بئری یوخدور، کئم اونو دؤندَ‌ره بئلر؟ جانی نه ائسته‌سه، اونو اِدَر.
[14] منه تعیئن اولونانی یرئنه یتئرئر، و یانیندا بله حؤکملردن چوخ وار.
[15] بونا گؤره‌دئر کی، حوضوروندا بله دهشتده‌یم، بونلاری دوشونَن واخت اوندان قورخورام.
[16] تاری‌دیر کی، اوره‌یئمئن قووّتئنی قیریب، قادئری-موطلقدئر کی، منی دهشته سالیب؛
[17] لاکئن نه قارانلیق منی ساکئت ادئب، نه ده اوزومو بورویَن قالین ظولمت.