[1] آیا لئویاتانی بالیق قارماغی ائله چکه بئلرسن؟ و یا دئلئنی قایتانلا باغلایا بئلرسن؟
[2] آیا بورنونا ائپ تاخا بئلرسن؟ قارماقلا چَنه‌سئنی دَله بئلرسن؟
[3] آیا سنه دفه‌لرله یالوارار؟ سنئنله یوموشاق سؤزلر دانیشار؟
[4] آیا سنئنله عهد باغلار کی، همئشه‌لئک سنئن قولون اولسون؟
[5] آیا اونونلا دا، بئر قوشلا اوینادیغین کئمی، اوینایا بئلرسن؟ بوینونا ائپ باغلاییب اونو قیزلارین اوچون آپارا بئلرسن؟
[6] آیا تاجئرلر اونو آلیب ساتارلار؟ آرالاریندا اونو بؤلوشَرلر؟
[7] آیا دَرئسئنی چَنگل‌لرله، باشینی دا بالیقچی نِشتَرلری ائله دولدورا بئلرسن؟
[8] اَلئنی اوستونه بئر قوی؛ نه موبارئزه‌یه دوشه‌جیئنی تصوّور ات؛ اوندا بو ائشی بئر داها اِتمَزسن.
[9] باخ، اونو توتماق ائستیه‌نئن اومئدی بوشدور؛ مگر اونون بئر گؤرونوشو آدامی ییخماز؟!
[10] اونو اویاتماق اوچون هچ کئمده جسارت یوخدور. بس کئم منئم قاباغیمدا دورا بئلر؟
[11] کئم منه بئر شی ورئب کی، ائندی گرک گری قایتاریم؟ گؤیون آلتیندا اولان هر شی منئمدئر.
[12] سؤزومو کَسمه‌یئب اونون عوضولرئندن، قودرتئندن و گؤزل گؤرونوشوندن دئیه‌جیم.
[13] اونون ائکی‌قات زئرِهئنی کئم دِشه بئلر؟ ائکی چَنه‌سئنئن آراسینا کئم جئلوو تاخا بئلر؟
[14] اوزونون قاپیلارینی کئم آچا بئلر؟ دئشلرئنئن اطرافی دهشتلی‌دئر.
[15] کوره‌یی قوبّه‌لی قالخانلارا اوخشاییر، بئربئرئنه مؤحکم باغلانیب.
[16] بئربئرلرئنه او قدر یاخین باغلانیبلار کی، آرالارینا هاوا بله کچمز.
[17] بئربئرئنه یاپیشیقدیرلار، بئربئرلرئنه اله یاپیشیبلار کی، اصلا آیریلمازلار.
[18] آسقیراندا اود سیچراییر، گؤزلری سحر ائشیغی کئمی پار-پار یانیر.
[19] آغزیندان آلوولو مشعل‌لر چیخیر؛ اود قورلاری سیچراییر.
[20] بورنونون دِشئکلرئندن توستو چیخیر، اِله بئل قازان قایناییر، قامیش یانیر.
[21] نفسئندن کؤمورلر کؤزه‌لئر، آغزیندان آلوو چیخیر.
[22] قووّت اونون بوینوندا ساکئندئر، دهشت ده قاباغیندا اویناییر.
[23] اَتئنئن قاتلاری بئربئرئنه یاپیشیب، اوستونه اله بئتئشئب کی، اصلا تَرپَنمَز.
[24] اوره‌یی داش کئمی بَرکدئر، دَیئرمانین آلت داشی کئمی بَرکدئر.
[25] قالخماغیندان گوجلولر تئتره‌یر؛ دهشتدن حالدان گِدَرلر.
[26] قیلینج اونا یِتئشسه ده، فایداسیزدیر، نئزه، تئر، و مئزراق دا.
[27] دمئری سامان چؤپو، بورونجو ده چوروموش اودون ساییر.
[28] کامان اوخو اونو قاچیردا بئلمز؛ اونا آتیلان ساپاند داشلاری سامانا دؤنَر.
[29] دَیَنَکلری کولَش چؤپو سانیر؛ مئزراقین ویییلتیسینا گولور.
[30] قارنینین آلتی، ائتی ساخسی پارچاسی کئمی‌دئر، پالچیق اوستوندن سورونن ائتی جیرجیر کئمی ائز قویور.
[31] درئنلئکلری بئر قازان کئمی قاینادیر، دهنزی عطئر کوپونه دؤندَ‌رئر.
[32] آرخاسیندا پارلاق بئر ائز بوراخیر؛ درئنلئیی ائنسان آغاردان ساچا اوخشادیر.
[33] یر اوزونده تایی یوخدور، قورخوسوز بئر مخلوقدور.
[34] هر اوجا شیی گؤرور؛ بوتون تکبّورلولره او پادشاه‌دیر.»