[1] او زامان رب فیرلانان یل ائچئندن اَیّوبا جاواب ورئب ددی:
[2] «بو کئمدئر کی، معرئفتسئز سؤزلرله مشورتی قارالدیر؟
[3] ائندی کئشی کئمی بِلئنی باغلا؛ سندن سوروشاجاغام، سن ده منه جاواب وره‌جکسن.
[4] یرئن بونؤوره‌سئنی من قویارکَن، سن هارادایدین؟ دِه منه، اگر آنلاغین وار.
[5] ائندی کی، بئلئرسن، دِه گؤروم اونون اؤلچوسونو کئم قویدو؟ یا دا اؤلچو خطّئنی اونون اوستونه کئم چکدی؟
[6] پایالاری نه‌یئن اوستونه قویولدو؟ کونج داشینی کئم قویدو؟
[7] او زامان سحر اولدوزلاری بئرلئکده اوخویوردولار و تارینین بوتون اؤولادلاری شادلیقدان هارای چکئردئلر.
[8] دهنز بطندن چیخیب فیشقیرارکَن، اونو قاپیلار آراسیندا کئم باغلادی؟
[9] او زامان کی، بولودلاری اونا پالتار اتدئم، اونو قالین قارانلیقدا قونداق اتدئم؟
[10] او زامان کی، سرحدئنی اونا چکدئم، قاپیلارینی و چفته‌لرئنی قویدوم؟
[11] او زامان کی، ددئم: ”بورایا قدر گله‌جکسن، آرتیق یوخ، و سنئن مغرور شپه‌لرئن بورادا دایاناجاق؟“
[12] عؤمرونده اولوب سحره امر اده‌سن، شَفَقه یرئنی گؤرسده‌سن؟
[13] بله کی، یر اوزونو اوجلاریندان توتسون، شر آداملاری اوستوندن سئلکئب آتسین؟
[14] اونون شکئلی دَیئشئر، مؤهور وورولاندا پالچیقدا عکسی قالان کئمی، پالتارداکی قیریشلار کئمی گؤزه گؤرونور.
[15] پئس آداملارین ائشیغی باتیریلار، قالدیردیقلاری قوللاری سینار.
[16] هچ اولوب دهنزئن منبعلرئنه بئر گده‌سن؟ درئنلرئن دئبئنده بئر گَزه‌سن؟
[17] اولوب اؤلوم قاپیلاری سنه گؤرسدئلسئن؟ ظولمت کؤلگه‌سئنئن دروازالارینی گؤروبسن؟
[18] دونیانین گِنئشلئیئنی آنلاییبسان؟ دِه گؤروم، اگر بوتون بونلاری بئلئرسن.
[19] ائشیق مسکنئنه گدن یول هارادادیر؟ قارانلیغین اوتوردوغو یر هارادادیر کی،
[20] آلیب اونلاری یرلرئنه آپاراسان؟ مگر اِولرئنئن یوللارینی بئلئرسن؟
[21] البتّه کی، بئلئرسن، چونکی او زامان دوغولموشدون! سن چوخ ائل‌لر یاشاییبسان!
[22] هچ اولوب قارین آنبارلارینا بئر گئره‌سن؟ دولونون آنبارلارینی بئر گؤره‌سن؟
[23] من اونلاری دارلیق زامانی اوچون، جنگ و موحارئبه گونلری اوچون ساخلاییرام.
[24] هانسی یوللا ائشیق یاییلار؟ شرق یلئنئن اَسدئیی یر هارادادیر؟
[25] کئم سِل‌لر اوچون آرخ، ائلدیریم اوچون یول آچدی کی،
[26] آدام اولمایان دئیاری، ائنسان یاشامایان چؤللری سولاسین؟
[27] صحرالار-بئیابانلار دویونجا سو ائچسئن، و یردن یاشیل اوت گؤیَرتسئن؟
[28] آیا یاغیشین آتاسی وار؟ شِح دامجیلارینی کئم یاراتدی؟
[29] بوز کئمئن بطنئندن چیخیب؟ گؤیدن دوشَن شاختانی کئم دوغوب؟
[30] سولار نه زامان داش کئمی بَرک اولور؟ درئنلرئن اوزو نه زامان دونور؟
[31] آیا ثورَیّا اولدوزلارینی زنجئرلرله باغلایا بئلرسن؟ جبّارین باغلارینی آچا بئلرسن؟
[32] آیا هر بورجو اؤز واختیندا چیخاردا بئلرسن؟ و یا دوبّی-اکبری اوغوللاری ائله بئرلئکده هئدایت اده بئلرسن؟
[33] آیا گؤیلرئن قانونلارینی بئلئرسن؟ یر اوزونه اولارین حاکئمئیّتئنی قورا بئلرسن؟
[34] آیا سَسئنی بولودلارا اوجالدا بئلرسن، اله کی، سو سِلی سنی بوروسون؟
[35] آیا شئمشَکلری گؤندَ‌ره بئلرسن، اله کی، گدئب سنه دسئنلر: ”باخ، بوراداییق؟“
[36] اوره‌‌یه کئم حئکمت قویدو؟ و یا ذِهنه کئم آنلاق وردی؟
[37] کئم بولودلاری حئکمتله سایا بئلر؟ گؤیلرئن کوپلرئنی کئم بوشالدا بئلر؟
[38] او زامان کی، تورپاق قورو پالچیق کئمی بَرکله‌یئر، و کَسَکلر بئربئرئنه یاپیشیر؟
[39] آیا دئشی شئر اوچون شئکاری سن اوولاییرسان و یا جاوان آصلانلارین آجلیقلارینی سن دویورورسان،
[40] او زامان کی، یووالاریندا اوتورورلار، و یا مِشه‌لئکده کمئنده یاتیرلار؟
[41] قارغایا یِمه‌یئنی کئم حاضیرلاییر، او زامان کی، بالالاری تارینین درگاهینا باغیریرلار، و یمکلری اولمادیغینا گؤره آوارا گَزئرلر؟