[1] ائلاهی مؤوجودلار گئنه اؤزلرئنی تقدئم اتمک اوچون ربّئن حوضورونا گلدئلر. شیطان دا اونلارلا گلدی کی، اؤزونو ربّئن حوضوروندا تقدئم اتسئن.
[2] رب شیطانا ددی: «هارادان گلئرسئن؟» شیطان ربّه جاواب ورئب ددی: «دونیانی دولانماقدان، ائچئنده گَزمَکدن.»
[3] رب شیطانا ددی: «آیا قولوم اَیّوبا بئر دئقّت اتدئن؟ دونیادا اونون کئمی هچ کس یوخ! کامئل و دوز بئر آدام کی، تاریدان قورخار و اؤزونو پئسلئکدن اوزاق ساخلایار. گرچی اونو هلاک اتمک اوچون منی سببسئز تحرئک اتدئن، لاکئن او حله ده کامالیندا ثابئت دورور.»
[4] شیطان ربّه جاواب ورئب ددی: «دَری عوضئنه دَری. ائنسان اؤز جانیندان اؤتری بوتون وار-یوخوندان کِچَر.
[5] آمّا اَلئنی بئر اوزادیب اونون سومویونه و اَتئنه دَی، گؤزونون قاباغیندا سنه لعنت اده‌‌جک.»
[6] رب شیطانا ددی: «باخ، او سنئن اَلئنده! آنجاق اونون جانینی آلما.»
[7] شیطان ربّئن حوضوروندان اِشئیه چیخدی و اَیّوبو، آیاغینین آلتیندان تپه‌سئنه قدر، پئس چئبانلارلا ووردو.
[8] اَیّوب اؤزونو قاشیماق اوچون بئر صاخسی پارچاسی گؤتوروب کول ائچئنده اوتوردو.
[9] او واخت آروادی اونا ددی: «حله ده کامالیندا ثابئت دوروبسان؟ تارینی سؤو و اؤل باری.»
[10] آمّا اَیّوب اونا ددی: «آخماق آروادلارین بئری کئمی دانیشیرسان! تاریدان یاخشیلیغی قبول اِدَک، آمّا یامانلیغی قبول اتمه‌یک؟» و بونلارین هامیسیندا اَیّوب دئلی ائله هچ بئر گوناه اتمه‌دی.
[11] اَیّوبون اوچ دوستو تِیمانلی اِلئفَز، شواَخلی بئلدَد، و نَعَماتلی صوفَر اونون باشینا گلن بوتون بلالاری اشئدئب، قرار وردئلر کی، هر بئری اؤز یرئندن اونون یانینا گلسئن و بئربئرلری ائله گؤروشدولر کی، بئرلئکده گدئب اونونلا همدرد اولسونلار و اونا تسلّی ورسئنلر.
[12] اوزاقدان اَیّوبو گؤرَ‌نده اونو تانیمادیلار و باغیریب هؤنکور-هؤنکور آغلاماغا باشلادیلار. هر بئری اؤز جوبّه‌سئنی ییرتیب و گؤیه، باشلاری اوستونه تورپاق آتدیلار.
[13] اَیّوبلا یدّی گون یدّی گجه تورپاق اوستونده اوتوردولار. هچ بئری اونونلا بئر سؤز ده دانیشمادی، چونکی دردئنئن نه قدر بؤیوک اولدوغونو گؤردولر.