[1] ائندی چاغیر؛ آیا سنه جاواب ورن بئری وار؟ موقدّسلرئن هانسی بئرئنه اوز توتاجاقسان؟
[2] دوغرودان دا، سفه آدامی قضب اؤلدورَر، نادانی دا حسد هلاک اِدَر.
[3] من سفه آدامین کؤک سالدیغینی گؤرونجه، فورَن یوردونو لعنت اتدئم.
[4] اؤولادلاری اَمئن-آمانلیقدان اوزاقدیرلار، محکمه دروازسیندا اَزئلئرلر، اونلاری قورتاران دا یوخدور.
[5] سفه آدامین بئچدئیئنی آج آدام یِیئر، اونو تئکانلار آراسیندان بله آلیر. و ثروتئنی سوسوز آدام اودماق ائسته‌یئر.
[6] چونکی فلاکت یردن چیخماز، زحمت ده تورپاقدان بئتمَز؛
[7] اله بئل کی، هاوایا آتیلان اود قورلاری‌دیر، ائنسان زحمت اوچون دوغولور.
[8] من اولسایدیم، تارینی آختاراردیم، ائشئمی ده تارییا تاپشیراردیم.
[9] او، درک اتمه‌دئیئمئز بؤیوک ائشلر گؤرور، ساییسیز عجایئبلر!
[10] یر اوستونه یاغیش ورئر، چؤللره سولار آخیردیر.
[11] آلچاقلاری اوجا یرلره قویور، یاسلی اولانلاری اَمئن-آمانلیغا چیخاردیر.
[12] حئیله‌گر آداملارین تدبئرلرئنی پوزور کی، اَللری هچ بئر ائش بِجَرمه‌سئن.
[13] حئکمتلی آداملاری اؤز حئیله‌لرئنده توتور، کلکباز آداملارین تدبئرلرئنی تز ییخیر.
[14] گوندوزلری قارانلیغا دؤنور، گون اورتا واختی اَل سورته-سورته یِرئیئرلر، اله بئل کی، گجه‌دئر.
[15] لاکئن او، مؤحتاج آدامی، اونلارین آغزینین قیلینجیندان، قودرتلی آدامین اَلئندن قورتاریر.
[16] اله کی، چاره‌سئز آدامین اومئدی اولسون، و عدالتسئزلئک آغزینی باغلاسین.
[17] خوش او آدامین حالینا کی، تاری اونو مذمّت ادئر. اونا گؤره ده، قادئری-موطلقئن تأدئبئنی حقئر گؤرمه.
[18] چونکی او یارالایار، لاکئن باغلایار دا؛ او وورار، لاکئن اَللری شفا وِرَر ده.
[19] آلتی سیخینتیدان سنی قورتارار؛ یِدّئسئنده بله هچ بئر زئیان سنه توخونماز.
[20] قحطئده سنی اؤلومدن، موحارئبه‌ده سنی قیلینجین قودرتئندن گری آلار.
[21] قامچیلایان دئللردن اوزاق قالارسان، هلاکت گلدئیی واخت دا قورخمازسان.
[22] هلاکت و آجلیق واختی گولرسن، و یرئن وحشی حیوانلاریندان قورخمازسان.
[23] چونکی چؤلون داشلاری ائله عهدئن اولار، چؤلون وحشی حیوانلاری دا سنئنله باریش ائچئنده اولارلار.
[24] بئلرسن کی، چادیرین سالاماتدیر، مولکونو یوخلایارسان و بئر اَسکئک تاپمازسان.
[25] بئلرسن کی، نسئلئن چوخ اولاجاقدیر، و اؤولادلارین یرئن اوتو کئمی.
[26] کامئل قوجالیقدا قبئره گلرسن، نجه کی، تاخیل دسته‌لری مؤوسومونده ییغیلیر.
[27] باخ، بئز بونو آراشدیرمیشیق؛ بله دئر، اونون اوچون ده، قولاق آس و اؤزون اوچون آنلا.