[1] ائندی اَیّوب، ددئیئمی اشئت، بوتون سؤزلرئمه قولاق آس.
[2] باخ، آغزیمی آچیرام؛ آغزیمدا اولان دئلئم دانیشیر.
[3] سؤزلرئم اوره‌یئمئن صداقتئندن چیخیر؛ دوداقلاریم دا معرئفتی بی‌رئیا دیئر.
[4] تارینین روحو منی یارادیب، قادئری-موطلقئن نفسی منه حیات ورئب.
[5] اگر اَلئندن گلئر، منه جاواب ور؛ قالخ و سؤزلرئنی قاباغیمدا سیرایا دوز.
[6] باخ، تارینین نظرئنده من ده سنئن کئمی‌یَم؛ من ده پالچیقدان یارانمیشام.
[7] دهشتئم سنی قورخویا سالماسین؛ بو هوجوموم دا سنه آغیر گلمه‌سئن.
[8] حقئقتن، سَسئن حله قولاقلاریمدادیر و سؤزونون سَسئنی اشئتمئشم:
[9] ”پاکام، تقصئرسئزم، تمئزم، منده هچ بئر خاطا یوخدور.
[10] باخ، او منئم ضئدّئمه بهانه آختاریر، منی اؤزونه دوشمن ساییر.
[11] آیاقلاریما کونده وورور، بوتون یوللاریما گؤز قویور.“
[12] باخ، قوی سنه دیئم: سن بو باره‌ده حاقلی دیئلسن، چونکی تاری ائنساندان داها بؤیوکدور.
[13] نه اوچون اوندان شئکایت ادئب دیئرسن کی، او، ائنسانین هچ بئر سؤزونه جاواب ورمز؟
[14] چونکی تاری دانیشیر؛ بو یوللا، او یوللا، حتّا اگر ائنسان اونو آنلاماسا دا.
[15] یوخودا، گجه رؤیاسیندا، ائنسانلاری آغیر یوخو باساندا، یاتاق اوستونده یوخو ائچئنده اولاندا،
[16] ائنسانلارین قولاغینی او زامان آچیر، اونلاری تأدئبی ائله مؤهورله‌یئر کی،
[17] ائنسانی عملئندن دؤندَ‌رسئن، اونو تکبّوردن اوزاق اتسئن.
[18] جانینی قویودان قورتارسین، حیاتینی اؤلولر دئیارینا دوشمکدن ساخلاسین.
[19] ائنسان یاتاغیندا دردله، سوموکلرئنده‌کی کَسئلمه‌یَن سیزیلتی‌لارلا تنبه ادئلئر.
[20] بله کی، حیاتی یمکدن چکئنئر، جانی لذئذ یمکدن ائیره‌نئر.
[21] اَتی تؤکولور، گؤرونمَز حالا دوشور، و گؤرونمه‌یَن سوموکلری اوزه چیخیر.
[22] جانی قویویا، حیاتی دا اؤلوم گتئرنلره یاخینلاشیر.
[23] اگر اونون اوچون مئن مَله‌یئن ائچئندن بئر مَلَک وار کی، اونا شفئع اولسون، اونا دوغرو اولانی دسئن،
[24] او زامان تاری اونا رحم ادئب دئیر: اونو قویویا دوشمکدن قورتار؛ اونون اوچون بئر فئدئیه تاپمیشام.
[25] او زامان بدنی اوشاق بدنی کئمی تزه‌له‌نَر؛ جاوانلیق گونلرئنه قاییدار.
[26] تارییا دوعا اِدَر، و اونون نظرئنده مقبول اولار. اوزونو شادلیقلا گؤرَر، صالحلئیئنی ده ائنسانا گری وِرَر.
[27] او آدام ائنسانلار حوضوروندا اوخویوب دئیر: گوناه اتمئشدئم، دوزو اَیری اتمئشدئم، لاکئن او، لایئق اولدوغوم جزانی منه ورمه‌دی.
[28] جانیمی قویویا دوشمکدن قورتاردی، و حیاتیم نورو گؤره‌جکدئر.
[29] باخ، تاری بونلارین هامیسینی ائنسانا ادئر، ائکی دفه، حتّا اوچ دفه -
[30] اله کی، اونون جانینی قویویا دوشمکدن قورتارسین، و حیاتین نورو اونا ساچسین.
[31] قولاق آس، اَیّوب. سؤزومو اشئت؛ ساکئت اول کی، دانیشیم.
[32] اگر دِمَیه بئر سؤزون وار، منه جاواب ور؛ دانیش، چونکی سنی حاقلی چیخارتماق ائسته‌یئرم.
[33] آمّا اگر سؤزون یوخوندور، اوندا منه قولاق آس؛ ساکئت اول کی، سنه حئکمت اؤیرَ‌دئم.»