[1] روحوم پرئشاندیر، گونلرئمئن نورو سؤنور. قبئر منی گؤزله‌یئر.
[2] دوغرودان دا اطرافیما اَله سالانلار ییغیلیرلار، گؤزلرئم اونلارین دوشمنچئلئیئنی گؤرور.
[3] ائندی منئم حاقّیمدا سن اؤزون قضاوت ات؛ کئم وار کی، منه ضامئن اولسون؟!
[4] چونکی سن اونلارین قلبئنی آنلاییش اوچون باغلاییبسان، اونا گؤره ده قویمایاجاقسان کی، اونلار اوجالسینلار.
[5] او آداملار کی، پای اوچون دوستلارینا خیانت ادئرلر، اؤولادلارینین گؤزلرئنئن نورو سؤنه‌جک.
[6] تاری منی خالقلارا مثل ادئب، آداملار گلئب اوزونه توپورورلر.
[7] قوصّه‌دن گؤزومون نورو قارالیب، بوتون عوضولرئم کؤلگه کئمی‌دئر.
[8] دوز آداملار بونا حیراندیرلار، و گوناهسیزلار اؤزلرئنی دئنسئزلرئن ضئدّئنه قالدیریرلار.
[9] آمّا گئنه ده صالح آدام اؤز یولونو توتور، اَلی تمئز اولان دا گتدئکجه قووّتله‌نئر.
[10] لاکئن ائندی سئز هامینیز گئنه گلئن، و آرانیزدا حئکمتلی بئر آدام تاپمارام.
[11] گونلرئم کچئب، نئیّتئنده اولدوقلاریم، اوره‌یئمئن ائستَکلری پَرَن-پَرَن دوشوب.
[12] اونلار گجه‌نی گوندوزه دؤندَرئرلر، ظولمته «ائشیق یاخیندیر» دیئرلر.
[13] اگر اؤلولر دئیارینی اِوئم کئمی گؤزله‌سم، یاتاغیمی قارانلیقدا سَرسَم،
[14] اگر قبئره «سن آتامسان»، قوردا دا «آنام-باجیم سنسن» دِسَم،
[15] اوندا بس اومئدئم هانی؟ کئم منه بئر اومئد گؤرَر؟
[16] مگر اومئد منئمله اؤلولر دئیارینا دوشَر؟ بئرلئکده تورپاغا اِنه‌رئک؟»