[1] گؤزلرئمله عهد باغلامیشام؛ باکئره بئر قیزا نجه گؤز دئکه بئله‌رم؟
[2] ائنسانین پایی یوخاریدا اولان تاریدان نه‌دئر؟ مئراثی اوجالاردا اولان قادئری-موطلقدن نه‌دئر؟
[3] مگر حاقسیزلارین باشینا فلاکت گلمئر؟ مگر فئتنه‌کارلارین باشینا موصئبت گلمئر؟
[4] مگر او، یوللاریمی گؤرمور؟ مگر او، هر قدمئمی سایمیر؟
[5] اگر یالانچیلیقلا یرئمئشم، اگر آیاغیم حئیله اوچون تَله‌سئب،
[6] قوی تاری منی دوز بئر تَره‌زئده چکسئن، کامئل اولدوغومو گؤرسون.
[7] اگر قدملرئم یولدان آزیب، اگر اوره‌یئم گؤزلرئمئن دالینجا گدئب، یا دا اَللرئم لکه‌لی اولوب؛
[8] قوی اوندا اَکدئیئمی یادلار یِسئن؛ اَکئنئم کؤکوندن چیخاریلسین.
[9] اگر اوره‌یئم بئر آروادا توولانیب، اگر قونشومون قاپیسیندا گئزلَنمئشم،
[10] قوی اوندا آروادیم اؤزگه بئر آدامین دَیئرمانینی دارتسین، اونونلا اؤزگه کئشئلر یاتسینلار.
[11] چونکی بو بئر خباثت اولاردی؛ اله بئر فساد کی، حاکئملر اونو جزالاندیراردیلار.
[12] چونکی او، هلاکت یرئنه‌جک یاندیریب یاخان بئری اولاردی؛ بوتون محصولومو کؤکوندن چیخارداردی.
[13] اگر نؤکرلرئم و کنئزلرئمئن حاقّینی، منئمله داعوالی اولان زامان دانمیشام،
[14] تاری آیاغا قالخاندا، من نه اده بئله‌رم؟ تفتئش ادنده اونا نه جاواب وره بئله‌رم؟
[15] مگر آنا بطنئنده منی یارادان، اونلاری دا یاراتماییب؟ مگر ائکئمئزی ده بطنده بَزه‌یَن او دیئل؟
[16] اگر فاغیر آداملارین ائسته‌دئکلرئنه مانع اولموشام، اگر دول آروادین گؤزلرئنئن نورونو سؤندورموشم،
[17] اگر چؤره‌یئمی تک باشینا یِمئشَم، یِتئملرله اونو پایلاشمامیشام -
[18] حال بو کی، جاوانلیغیمدان بَری یِتئملره آتالیق اتمئشم، دوغولاندان بَری دول آروادا یول گؤرستمئشم -
[19] اگر بئر آدامی پالتارسیزلیقدان اؤلوم حالیندا گؤرموشم، یا دا اؤرتویه مؤحتاج اولان بئر آدامی.
[20] اگر اونون بِلی منه خیئر-دوعا ورمه‌یئب، اگر قویونلاریمین یونو ائله قیزیشماییب؛
[21] اگر محکمه‌ده حامئلرئم اولدوغو اوچون، اَلئمی یِتئمئن ضئدّئنه قالدیرمیشام؛
[22] قوی اوندا چئینئم یرئندن دوشسون و قولوم لوله‌سئندن سینسین.
[23] چونکی تارینین بلاسیندان قورخورام، شؤوکتئنئن قاباغیندا دایانا بئلمه‌رم.
[24] اگر قیزیلا اومئد باغلامیشام، یا دا خالئص قیزیلا ”اومئدئم سنسن“ دِمئشَم؛
[25] اگر ثروتئمئن چوخلوغونا گؤره، یا دا اَلئمئن چوخ قازاندیغینا گؤره سِوئنمئشَم؛
[26] اگر گونه ائشیغینی شاخاندا، یا دا آیا شؤوکتی ائچئنده گِدنده باخمیشام؛
[27] و اوره‌یئم گئزلئجه آلدانیب و آغزیم اَلئمی اؤپوب؛
[28] بو دا اله بئر فساددیر کی، حاکئملر اونو جزالاندیراردیلار، چونکی یوخاریدا اولان تارینی دانمیش اولاردیم.
[29] اگر دوشمنلرئمئن بدبختلئیئنه سِوئنمئشَم، زحمت آلتینا دوشَنده فرحلَنمئشم -
[30] حال بو کی، هچ کئمئن جانینا قارقیش اتمکله دئلئمه گوناه اتمه‌یه یول ورمه‌مئشم -
[31] اگر چادیریمین خالقی هچ واخت دمه‌یئبلر کی، اَیّوبون وردئیی اَتئندن دویمایان کئم وار؟ -
[32] هچ بئر قرئب گجه‌نی چؤلده سحر اتمَزدی، قاپیم همئشه یولدان کِچَنلرئن اوزونه آچیق ائدی -
[33] اگر تقصئرئمی گئزلَتمئشم، آدم کئمی عوصیانیمین اوستونو اؤرتموشم.
[34] بؤیوک جاماعاتدان قورخدوغوم اوچون، اِلئن حقارتئندن دهشته گلدئیئم اوچون، دئنمه‌یئب قاپیدان اِشئیه چیخمامیشام؛
[35] کاشکی منی اشئدن بئری اولسایدی! بو سؤزومو تصدئق ادئرم؛ قوی قادئری-موطلق جاوابیمی ورسئن! ضئدّئمه بونو طومارا یازیب اَلئمه ورسئن.
[36] شوبهه‌سئز بو طوماری چئینئمده داشییاردیم؛ تاج کئمی باشیما قویاردیم.
[37] بوتون قدملرئمئن حسابینی اونا خبر وِرَردئم؛ امئر کئمی اونا یاخینلاشاردیم.
[38] اگر اَکئن تورپاغیم منئم ضئدّئمه فریاد ادئر، جوتون آچدیغی یاریقلار اَلئمدن بئرلئکده آغلاییر؛
[39] اگر پولونو ورمه‌دن محصولونو یِمئشم، صاحئبلرئنئن اؤلومونه باعئث اولموشام؛
[40] قوی اوندا بوغدا یرئنه تئکان، آرپا یرئنه خار-خاشاک بئتسئن.» اَیّوبون سؤزلری باشا گلئر.