[1] نئیه قادئری-موطلق حؤکم اوچون زامان تعیئن اتمئر؟ نئیه اونو تانی‌یانلار حؤکم گونلرئنی گؤرمورلر؟
[2] بعضئلر حودودلاری یرلرئندن قالدیریرلار؛ سورولری قصب ادئب اوتاریرلار.
[3] یِتئملرئن اِششَکلرئنی سوروب آپاریرلار؛ دول آروادین اؤکوزونو گئروو گؤتورولر.
[4] مؤحتاجلاری یولدان چیخاردیرلار؛ اؤلکه‌ده‌کی فاغیرلارین هامیسی گئزلَنمَیه مجبور اولور.
[5] باخ، کاسیبلار چؤل اِششَکلری کئمی، یمک آختارماق اوچون اِرته‌دن ائشه چیخیرلار؛ اؤولادلاری اوچون چؤلده چؤرک آختاریرلار.
[6] یِملرئنی زَمئده بئچئرلر، پئس آدامین اوزوم باغیندان اوزوم قالیقلارینی ییغیرلار.
[7] گجه‌نی پالتارسیز لوت کچئردئرلر، سویوقدا اوستلرئنی اؤرتمَیه بئر شی تاپمیرلار.
[8] داغلارا یاغان یاغیشدان ائسلانیرلار، پناهسیزلیقدان قایانی قوجاقلاییرلار.
[9] یِتئم کؤرپه‌لری دؤشدن آییریرلار، فاغیرین کؤرپه‌سئنی گئروو آلیرلار.
[10] بو یازیقلار پالتارسیز لوت دولانیرلار، آج اولا-اولا تاخیل دسته‌لرئنی داشی‌ییرلار.
[11] پئسلرئن چَپَرلری آراسیندا زیتون یاغی سیخیرلار، شراب اوچون اوزوم سیخیرلار، آمّا اؤزلری سوسوزلوقدان یانیرلار.
[12] شهرلردن ائنسان ناله‌‌سی قالخیر، یارالی جانلار کؤمک اوچون باغیریرلار، آمّا تاری حله ده حاقسیزلیغی نظره آلمیر.
[13] آداملار وار کی، ائشیغین ضئدّئنه عوصیان ادئرلر؛ اونون یوللارینی تانیمیرلار، طرئقلرئنده ده قالمیرلار.
[14] قاتئل گون باتاندا قالخیر؛ فاغیر و مؤحتاجی اؤلدورور، گجه واختی بئر اوغرویا بَنزه‌یئر.
[15] زئناکارین گؤزو آخشام واختینی گؤزله‌یئر؛ دوشونور: ”هچ بئر گؤز منی گؤرمَز.“ اوز-گؤزونو گئزله‌دئر.
[16] قارانلیقدا اِولری یاریرلار، لاکئن گوندوزده گئزله‌نئرلر. بونلار ائشیغی تانیمیرلار.
[17] چونکی اونلارین سحری قالین قارانلیقدیر، ظولمتئن دهشتلری ائله آشنادیرلار.
[18] آمّا سولارین اوزونده کؤپویه بَنزه‌رلر، اونلارین پایی یر اوزونده ملعوندور؛ اوزوم باغلارینا قاییتمازلار.
[19] نجه قوراقلیق و ائستئلئک قار اَرئدئب اودار، اؤلولر دئیاری دا گوناهکارلاری اله گؤتوروب آپارار.
[20] آنا بطنی اونو یاددان چیخاردار، قوردلار اوچون لذئذ یِم اولارلار. ائنصافسیز آدام آرتیق یادلارا دوشمَز، آمّا آغاج کئمی سینار.
[21] سونسوز آروادا یامانلیق اِدَرلر، دول آروادا هچ یاخشیلیق اتمَزلر.
[22] آمّا تاری قودرتی ائله گوجلولری آشاغی چکر؛ اؤزو قالخار، لاکئن هچ کس حیاتیندان آرخایین اولماز.
[23] تاری اونلارا امئن-آمانلیق یارادیر، و اونا آرخایین اولورلار. و گؤزلری اونلارین یوللاریندادیر.
[24] قیسا بئر مودّت اوچون اوجالیرلار، بئر آز سونرا یوخ اولورلار؛ آلچادیلیرلار، و باشقا هر شی کئمی آلینیب گؤتورولورلر؛ سونبول‌لرئن باشی کئمی کَسئلئرلر.
[25] ائندی اگر بله دیئل، کئم منی یالانچی چیخاردا بئلر؟ کئم سؤزومو دَیَرسئز اده بئلر؟»