[1] او زامان اَیّوب جاواب ورئب ددی:
[2] «کاشکی دردئم بئر چکئله‌یدی! بوتون فلاکتئم تَره‌زئیه قویولایدی!
[3] او زامان دهنز قوموندان آغیر گلردی؛ اونا گؤره ده، سؤزلرئم دئقّتسئزدئر.
[4] چونکی قادئری-موطلقئن اوخلاری ائچئمده‌دئر؛ روحوم اونلارین زهرئنی ائچئر، تارینین دهشتلری منئمله موحارئبه‌یه دوزولور.
[5] اوت اولاندا وحشی اِششَک مگر آنقیرار؟ یِمی اولان اؤکوز مگر باغیرار؟
[6] دوزسوز شئت یِمه‌یی مگر یمک اولار؟ یومورتا آغینین مگر بئر دادی وار؟
[7] جانیم اونلارا توخونماغی بله ائسته‌مئر، اونلار منه ائیرنج یمک کئمی‌دئر.
[8] کاش آرزوما چاتایدیم! تاری منه حسرتئنده اولدوغومو وره‌یدی!
[9] لوطف ادئب منی اَزسَیدی، اَلئنی جَلد اولوب منی کَسسَیدی ده.
[10] بو منه بئر تسلّی اولاردی، آمانسیز عذابین ائچئنده شادلیقلا اویناردیم، چونکی موقدّس اولانین سؤزلرئنی دانمامیشام.
[11] نه گوجوم وار کی، گؤزله‌یئم؟ آخیریم نه‌دئر کی، حیاتیمی اوزادیم؟
[12] مگر قووّتئم داشلارین قووّتی‌دئر؟ مگر جئسمئم بورونجدندئر؟
[13] ائندی کی، باجاریق جانیمدان چیخیب گدئب، مگر اؤزومه کؤمک اتمه‌یه بئر قودرتئم وار؟
[14] فلاکته دوشموش آداما دوستونون وفاسی گرک، حتّا قادئری-موطلقئن قورخوسونو بوراخمیش اولسا بِله.
[15] قارداشلاریم خیانت اتدئلر؛ بئر وادی کئمی، آخیب گدن چایلار کئمی.
[16] او چایلار کئمی کی، بوزلارلا قارالیرلار، قاری اؤزلرئنده گئزله‌دئرلر.
[17] اَرئیَن زامان گؤزدن ائتئرلر، سیجاغین چوخلوغوندا یرلرئندن یوخ اولورلار.
[18] اونلارین یولوندان کاروانلار آزیرلار، کؤشَنه چیخیب اورادا هلاک اولورلار.
[19] تِیمانین کاروانلاری باخیرلار، شِبانین موسافئرلری اونا اومئد باغلاییرلار.
[20] پرئشاندیرلار، چونکی اعتئماد اتمئشدئلر؛ اورایا گلدئلر و مات قالدیلار.
[21] سئز ده ائندی منه بله اولوبسونوز؛ موصئبتی گؤرجک قورخدونوز.
[22] هچ اولوب سئزه دئیَم: ”منه بئر شی ورئن؟“ و یا ”مال-دؤولَتئنئزدن منه روشوَت گؤندَ‌رئن؟“
[23] و یا ”منی دوشمن اَلئندن قورتارین؟“ و یا ”منی ظالئم اَلئندن گری آلین؟“
[24] منه اؤیرَدئن، من ده ساکئت قالارام؛ هارادا سهو اتدئیئمی منه بئلدئرئن.
[25] صادئق سؤزلر نه آجی‌دیر! لاکئن سئزئن دانلاغینیز نه‌یی دانلاییر؟
[26] سؤزلرئمی دانلاماق ائسته‌یئرسئنئز؟ چاره‌سئز بئر آدامین سؤزلرئنی یل کئمی حساب ادئرسئنئز؟
[27] دوغرودان دا کی، یِتئملر اوچون بله پوشک آتیرسینیز، و دوستونوزو ساتیرسینیز.
[28] آمّا ائندی کَرَم ادئب منه بئر باخین؛ چونکی من اوزونوزه یالان دئیَن آدام دیئلم.
[29] یالواریرام دؤنون، قویون حاقسیزلیق اولماسین. آتین حاقسیزلیغی. دوشونون: بو داعوادا من حاقلی‌یام.
[30] مگر دئلئمده بئر حاقسیزلیق وار؟ مگر آغزیم یامان شیلری آنلایا بئلمئر؟