[1] Ya chaʼabi ! Asmaʼo Tawraati wa khuttu udneeku // le kalaam khachmi.
[2] Ana naftah khachmi be masal wa nihajji hije hana l-zaman al-faat
[3] al-simiʼnaah wa irifnaah wa l-hajjooh leena abbahaatna.
[4] Aniina ma nilabbuduuh min iyaalhum wa laakin le zurriiyithum // al-taji baʼadhum, nihajju leehum be hamd Allah wa gudurtah wa ajaaybah // al-hu sawwaahum.
[5] Hu anta faraayid le zurriiyit Yaakhuub aywa, anta Tawraatah // le Bani Israaʼiil wa amar juduudna yiʼarrufuuhum le iyaalhum.
[6] Achaan yiʼarrufuuhum // le l-zurriiye al-taji baʼadeen yaʼni iyaalhum al-yaldoohum.
[7] Wa yitwakkalo ale l-Rabb wa ma yanso amalah wa yahfado gawaaniinah.
[8] Achaan ma yabgo misil juduudhum, zurriiye haraamiiye wa aasiye, zurriiye al-galibha ma saabit wa ma indaha iimaan be l-Rabb.
[9] Wa naas gabiilat Afraayim al-musallahiin wa yaʼarfu zarigiin al-nuchchaab, humman arrado fi yoom al-harib.
[10] Wa da achaan ma hafado // muʼaahadat al-Rabb wa abo ma yitaabuʼu Tawraatah.
[11] Humman niso amalah wa ajaaybah al-wassafaahum leehum.
[12] Giddaam juduudhum al-Rabb sawwa ajaayib, fi mantagat Suʼaan fi balad Masir.
[13] Al-Rabb chagga al-bahar itneen le yigattiʼhum wa l-almi wagaf jaay jaay leehum misil durdur.
[14] Be l-nahaar, hu yuguudhum be sahaabaay wa be l-leel, be nuur hana naar.
[15] Hu chagga al-hujaar fi l-sahara le yazgiihum almi be katara misil almi al-khariig tihit al-ard.
[16] Wa min al-jabal, hu marag almi wa da saal misil almi al-buhuur.
[17] Wa humman gammo battaan yaznubu wa iso Allah al-Aali fi ard jafaaf.
[18] Humman hajjo fi galibhum // wa jarrabo al-Rabb wa talabo minnah // akilhum al-yidooruuh.
[19] Wa hajjo didd al-Rabb wa gaalo : «Allah yagdar yantiina akil // fi l-sahara walla ?
[20] Sahiih, hu darab al-hajar wa l-almi jara minnah be katara wa bigi wudyaan katiiriin. Wa laakin hu yagdar yanti khubza wa yigaddim laham le chaʼabah walla ?»
[21] Khalaas wakit Allah simiʼ kalaamhum, hu khidib wa naar khadabah gammat // didd zurriiyit Yaakhuub aywa, ziʼil chadiid // didd Bani Israaʼiil.
[22] Achaan humman ma atwakkalo ale l-Rabb wa ma aamano kadar hu yinajjiihum.
[23] Wa khalaas, al-Rabb amar // al-sahaab al-foog wa fatah biibaan al-samaawaat.
[24] Hu nazzal matara hana manna // le yiʼakkilhum wa antaahum gameh min al-sama.
[25] Wa ayyi naadum akal khubz // misil khubz al-malaaʼika wa l-Rabb rassal leehum akil be katara.
[26] Wa min al-sama, al-Rabb gawwam riih al-sabaah wa be gudurtah, jaab riih al-wati.
[27] Wa misil yinazzil al-matar be katara, hu nazzal leehum laham katiir misil ajaaj al-ard. Aywa, nazzal tuyuur be katara misil ramla hana khachum al-bahar.
[28] Hu nazzalaahum leehum fi ust al-fariig wa hawaale khiyamhum.
[29] Humman akalo wa chibʼo marra waahid wa hu antaahum al-cheyy al-atmannooh.
[30] Wa laakin munaahum ma tamma hatta kan khuchuumhum malaaniin kula.
[31] Wa tawwaali khadab al-Rabb gamma didduhum wa katal fi usuthum al-naas al-chudaad aywa, kammal subyaan Israaʼiil.
[32] Wa be da kula, humman gaaʼidiin yaznubu daayman wa ma aamano be ajaaybah.
[33] Khalaas, hu kammal ayyaamhum // fi l-riih saakit wa siniinhum fi l-khoof.
[34] Wa wakit al-Rabb yaktulhum, humman yifattuchuuh wa yigabbulu yifattuchuuh be niiye.
[35] Wa yizzakkaro kadar al-Rabb, hu maljaʼhum wa yifakkuru kadar Allah al-Aali, hu al-yafdaahum.
[36] Wa laakin be khuchuumhum, yukhuchchuuh wa be lisneehum, yakdubu leyah.
[37] Wa guluubhum ma saabtiin foogah wa ma yitwakkalo ale muʼaahadatah.
[38] Wa laakin hu al-Rahiim // khafar khataahum wa ma dammaraahum wa iddat marraat, hu ma khidib leehum wa ma gawwam kulla zaʼalah.
[39] Wa fakkar kadar // humman makhluugiin bas wa ruuhhum tamrug wa abadan ma tigabbil.
[40] Iddat marraat, humman isooh fi l-sahara wa khaddabooh fi bakaan jafaaf.
[41] Wa battaan gammo jarrabo al-Rabb wa khaddabo Khudduus Israaʼiil.
[42] Humman niso al-sawwatah iidah, fi l-yoom al-hu fadaahum min al-adu.
[43] Hu sawwa alaamaatah fi Masir aywa, ajaaybah fi mantagat Suʼaan.
[44] Fi Masir, Allah chaglab al-buhuur damm wa rujuulhum al-jaariyiin kula, al-Masriyiin ma gidro chirbo minhum.
[45] Wa rassal didduhum dubbaan akalhum wa difdeʼ bachtanhum.
[46] Hu sallam intaaj ziraaʼithum le l-jaraad wa natiijat khidmithum // le saar al-leel.
[47] Wa tallaf inabhum be l-barad wa jimmeezhum be l-barid al-chadiid.
[48] Wa sallam maalhum le l-barad wa bahaayimhum le l-raʼad.
[49] Hu nazzal fi l-Masriyiin // zaʼalah al-chadiid wa khadab wa zaʼal wa taʼab wa rassal malaaʼikatah hana l-damaar.
[50] Wa sahhal al-derib le khadabah wa ma dahar minhum al-moot wa sallam hayaathum le l-waba.
[51] Wa katal kulla awlaad al-bikir // hana l-Masriyiin al-humman zurriiyit Haam aywa, chaal awwal intaaj gudrithum.
[52] Hu wadda chaʼabah misil khanam wa gaadaahum misil bahaayim fi l-sahara.
[53] Hu gaadaahum be amaan wa humman ma rajafo wa l-bahar khatta udwaanhum.
[54] Hu wadda chaʼabah // ale l-ard al-mukhaddasa, ale l-jabal al-iidah al-zeene galaʼatah.
[55] Hu tarad umam giddaamhum wa kaal al-ard be hubaal wa gassamaaha leehum warasa wa sakkan gabaayil Bani Israaʼiil // fi buyuuthum.
[56] Wa be da kula, jarrabo al-Rabb al-Aali // wa isooh wa ma tabbago faraaydah.
[57] Humman khallooh wa khaanooh misil juduudhum wa gabbalo misil al-nuchchaab al-yakhta hadafah.
[58] Humman khaddabooh be bakaanaathum al-aaliyiin hana l-ibaada wa be asnaamhum, gawwamo khiirtah.
[59] Al-Rabb simiʼ wa khidib chadiid wa rafadaahum marra waahid // le Bani Israaʼiil.
[60] Hu aba maskan al-ibaada fi Chiilooh wa di l-kheema al-hu sakan foogha // fi ust al-naas.
[61] Hu sallam sanduug al-muʼaahada al-hu alaamat gudurtah wa jalaalah fi iid al-udwaan.
[62] Hu khidib didd warasatah wa sallam chaʼabah le l-harib.
[63] Al-naar akalat al-subyaan wa l-banaat al-udriiyaat, ma chakkaroohin battaan.
[64] Wa rujaal al-diin maato fi l-harib wa araamilhum ma bakan.
[65] Al-Rabb gamma misil al-naayim al-gamma. Wa misil al-faaris al-lazzatah al-khamar fi l-harib,
[66] hu darab udwaanah min wara wa dassaahum fi eeb abadi.
[67] Hu rafad zurriiyit Yuusuf wa ma azal gabiilat Afraayim.
[68] Laakin azal gabiilat Yahuuza wa jabal Sahyuun al-hu yihibbah.
[69] Wa bana beetah al-mukhaddas aali misil al-sama wa gawi misil al-ard al-hu assasah ila l-abad.
[70] Hu azal abdah Dawuud malik wa chaalah min zariibit al-khanam.
[71] Min wara l-khanam hu jaabah wa sawwaah raaʼi le chaʼabah zurriiyit Yaakhuub wa le warasatah Bani Israaʼiil.
[72] Wa Dawuud raʼaahum be galib mukhlis wa gaadaahum be ilim.