[1] Ya l-saalihiin ! Zakhrutu le Allah // min al-farah ! Hamd Allah yiwaafig // maʼa l-naas al-adiiliin.
[2] Achkuru Allah be jigindiiye wa khannu leyah be amsibeybe al-indaha achara habil !
[3] Khannu leyah khine jadiid ! Khannu adiil be aalaat wa zakhraat.
[4] Achaan kalaam Allah adiil wa kulla khidimtah be sidikh.
[5] Hu yihibb al-hagg wa l-adaala wa rahmat Allah malat al-ard.
[6] Be kilmitah, Allah khalag al-samaawaat wa be nafkha waahide, khalag kulla khuwwaathum.
[7] Hu jamaʼ almi al-bahar // fi bakaan waahid wa lamma almi al-muhiitaat // fi khazzaan.
[8] Khalli kulla sukkaan al-ard // yakhaafo Allah wa kulla naas al-dunya // yarjufu giddaamah !
[9] Achaan be kilmitah, kulla cheyy kaan wa be amrah, kulla cheyy bigi.
[10] Allah nagad kharaar al-umam wa fachchal khittat al-chuʼuub.
[11] Kharaar Allah gaaʼid ila l-abad wa khittitah min zurriiye le zurriiye.
[12] Mabruuk le l-umma // al-Ilaahha Allah wa l-chaʼab al-hu azalah // misil warasatah.
[13] Min al-samaawaat, Allah yanzur wa yichiif kulla l-naas.
[14] Wa min archah, hu yichiif kulla sukkaan al-ard.
[15] Hu bas al-khalag guluubhum kulluhum wa gaaʼid yafham kulla khidmithum.
[16] Katarat al-deech // ma tafzaʼ al-malik wa l-khuwwa al-chadiide // ma tinajji al-fahal.
[17] Al-kaddaab yuguul : «Al-juwaad yijiib al-nasur !» Wa laakin gudurtah al-ziyaada kula ma tinajji siidah.
[18] Wa laakin een Allah gaaʼide tichiif // al-yakhaafo minnah, humman al-induhum acham // fi rahmatah.
[19] Wa da, le yinajjiihum min al-moot wa yahfad hayaathum fi wakt al-juuʼ.
[20] Wa aniina kula narjo Allah achaan hu musaaʼidna wa daragatna.
[21] Achaan minnah hu, // jaayi farah guluubna wa ale usmah al-mukhaddas, // atwakkalna.
[22] Ya Allah, khalli rahmatak // tukuun foogna misil achamna gaaʼid foogak !