[1] Ya Rabb ! Anti chariiʼtak le l-malik wa adaaltak le wileed al-malik.
[2] Hu yichaariʼ chaʼabak be l-adaala wa masaakiinak hasab al-chariiʼa.
[3] Wa min al-jibaal, yanzil al-salaam wa min al-hujaar, tanzil al-adaala le l-chaʼab.
[4] Wa l-malik yahkim be l-adaala fi l-chaʼab al-masaakiin. Wa yinajji iyaal al-taʼbaaniin wa yarhak al-zaalimiin.
[5] Kan al-harraay wa l-gamar gaaʼidiin, al-naas yakhaafo min al-malik min zurriiye le zurriiye.
[6] Hu yanzil misil matara fi gechch al-marʼa wa misil almi al-yuruchch al-ard.
[7] Wa fi ayyaam hukmah, al-adaala tiziid wa kan al-gamar gaaʼid da, al-salaam yiziid.
[8] Wa khalli hu yahkim min al-bahar al-Mayyit // lahaddi l-bahar al-Abyad wa min bahar al-Furaat // lahaddi aakhir al-ard.
[9] Wa sukkaan al-sahara // yaburku giddaamah wa udwaanah yisiffu al-turaab.
[10] Wa muluuk Tarchiich // wa jazaayir al-bahar yijiibu leyah hadaaya. Wa muluuk Chaba wa Saba yikaffu miiri.
[11] Wa kulla l-muluuk yasjudu giddaamah wa kulla l-umam yakhdumu leyah.
[12] Achaan hu yinajji al-taʼbaaniin al-yikooruku wa l-masaakiin al-ma induhum fazaʼ.
[13] Hu yihinn fi l-daʼiif wa l-taʼbaan wa yinajji hayaat al-taʼbaaniin.
[14] Wa min al-zulum wa l-unuf, yafdaahum wa hayaathum di khaaliye leyah.
[15] Khalli al-malik yiʼiich wa yantuuh dahab Saba. Wa yisallu leyah daayman wa yibaarukuuh kulla yoom.
[16] Wa khalli al-gameh yabga katiir fi l-balad wa ganaadiilah yinhazzo // fi ruuse al-jibaal misil fi jibaal Lubnaan // wakit yinawwuru. Wa khalli al-mudun yittawwaro misil gechch al-kadaade.
[17] Khalli usmah yagood ila l-abad wa yuduum misil al-harraay. Wa beyah hu, khalli al-naas yilbaarako wa kulla l-umam yinaaduuh mubaarak.
[18] Baarak Allah al-Rabb al-hu Ilaah Israaʼiil, hu wiheedah bas yisawwi ajaayib !
[19] Baarak Allah al-usmah majiid ila l-abad wa khalli kulla l-ard // tinmali be majdah. Aamiin ! Aamiin !
[20] Da kumaalit salaat Dawuud wileed Yassa.