[1] Ya Ilaahi, asmaʼ salaati // wakit nachhadak wa ma taabaani !
[2] Fakkir foogi wa rudd leyi. Ana aayir min chakwiti wa ganitiini
[3] achaan korooraak al-adu wa mudaayagat al-aasiyiin. Achaan humman sabbo foogi charruhum wa be zaʼal, hajamooni.
[4] Galbi rajjaf fi daakhili wa l-khoof min al-moot karabaani.
[5] Al-khoof wa l-rajafaan karabooni wa bahiite chadiide karabatni.
[6] Wa gult : «Kan indi janaahe al-gimriiye, nitiir wa nifattich maskan.
[7] Aywa ! Niʼarrid baʼiid wa naskun fi l-kadaade. Wagfa.
[8] «Wa be surʼa, nalga maskan al-yahfadni min al-riih al-chadiide.»
[9] Ya Rabb ! Barjilhum wa chattit kalaamhum. Achaan ana chift al-unuf wa l-huraaj fi l-madiina
[10] leel wa nahaar muhawwigiin daraadirha wa l-fasaala wa l-taʼab fi lubbaha.
[11] Al-damaar gaaʼid fi lubbaha wa l-khachch wa l-zulum abadan ma yikissu min chawaariʼha.
[12] Kan adu yiʼayyirni, nahmalah wa kan khasiim yugumm diddi, nillabbad minnah.
[13] Wa laakin da inta, raajil misli wa inta bas siid amaani wa rafiigi al-niriidak !
[14] Wa inta al-ichna maʼaak sawa fi halu wa amaan. Wa macheena sawa fi beet Allah maʼa jamaaʼat al-aabidiin.
[15] Wa khalli al-moot yifaajiʼ udwaani wa yanzulu hayyiin fi l-khubuur achaan al-charr gaaʼid maʼaahum fi usuthum.
[16] Wa laakin ana ninaadi al-Rabb wa hu bas Allah al-yinajjiini.
[17] Wa be fajur wa gaayle wa achiiye, ana nachki wa nagnit wa hu simiʼ hissi.
[18] Hu fadaani be l-salaama wakit gaaʼidiin yihaarubuuni achaan katiiriin gaaymiin diddi.
[19] Khalli al-Rabb yasmaʼ wa yihiinhum, hu al-gaaʼid fi archah min zamaan. Wagfa. Humman wa la yikhayyuru wa la yakhaafo min al-Rabb.
[20] Al-khaayin rafaʼ iidah // didd naas al-salaam wa ma ahtaram muʼaahadatah.
[21] Wa lisaanah halu min al-asal wa laakin galbah khattat al-harib. Wa kalaamah maarin min al-zibde wa laakin misil al-seef al-masluul.
[22] Khutt hammak fi Allah wa hu yisaaʼidak. Wa hu abadan ma yikhalli // al-saalih yittartaʼ.
[23] Wa inta, ya Ilaahi, inta tinazzilhum fi l-khabur. Kattaaliin al-dimam wa l-khachchaachiin ma yiʼiichu nuss umurhum. Wa laakin ana nitwakkal aleek.