[1] Ana nahmud Allah fi kulla wakit wa daayman khachmi yachkurah.
[2] Ana nimajjid Allah wa l-masaakiin yasmaʼo // wa yafraho.
[3] Taʼaalu ! Niʼazzumu Allah wa niʼallu usmah sawa.
[4] Ana saʼalt Allah wa hu radda leyi wa najjaani min kulla khoofi.
[5] Al-rafaʼo uyuunhum aleyah raaro wa l-eeb ma yinchaaf // fi wujuuhhum.
[6] Wakit al-miskiin yinaadi, Allah yasmaʼah wa yinajjiih min kulla taʼabah.
[7] Wa malak Allah yahris hawaale al-yakhaafo minnah wa hu yikhallishum.
[8] Duukhu wa chiifu Allah rahiim. Mabruuk le l-naadum al-hu maljaʼah.
[9] Akhaafo min Allah, intu al-hu khassasaaku, achaan cheyy ma yigassir le l-yakhaafo minnah.
[10] Furuukh al-duud yaʼarfu gillit al-akil wa l-juuʼ wa laakin al-yifattuchu Allah, ma yigassir leehum cheyy // min al-kheer.
[11] Ya iyaali, taʼaalu wa asmaʼo wa ana niʼallimku al-khoof min Allah.
[12] Inta tidoor al-haya walla ? Wa tidoor tiʼiich ayyaam saʼiidiin ?
[13] Khalaas, ahfad lisaanak // min al-kalaam al-fasil wa khachmak // min al-kalaam al-kidib.
[14] Baʼʼid min al-fasaala // wa sawwi al-kheer, fattich al-salaam // wa taabiʼah be niiye waahide.
[15] Een Allah tiraakhib al-saalihiin wa hu yasmaʼ siraakhhum.
[16] Allah yugumm didd al-fasliin le yuguchch zikirhum min al-ard.
[17] Wakit al-saalihiin yinaadu, Allah yasmaʼhum wa hu yinajjiihum // min kulla diigithum.
[18] Allah gariib le l-naas // al-guluubhum mutahayyiriin wa yinajji al-fikirhum mubarjal.
[19] Al-saalih yiwaajih bala katiir wa min kulli waahid, Allah yinajjiih.
[20] Hu yahfad kulla udaamah wa waahid minhum ma yinkasir.
[21] Al-bala yaktul al-aasi wa l-yakraho al-saalihiin yilʼaakhabo.
[22] Wa laakin Allah yafda hayaat abiidah wa l-yaljaʼo leyah ma yilʼaakhabo.