[1] Achkuru Allah achaan hu rahiim wa rahmatah daayme ila l-abad.
[2] Khalli Bani Israaʼiil yuguulu : «Rahmatah daayme ila l-abad.»
[3] Khalli zurriiyit Haaruun yuguulu : «Rahmatah daayme ila l-abad.»
[4] Khalli al-yakhaafo min Allah yuguulu : «Rahmatah daayme ila l-abad.»
[5] Fi l-diige, ana naadeet Allah wa hu simiʼni wa najjaani.
[6] Allah maʼaayi, ana ma nakhaaf min cheyy. Al-naas yagdaro yisawwu leyi chunu ?
[7] Allah maʼaayi wa hu yafzaʼni wa ana ninnasir fi udwaani.
[8] Akheer al-insaan yaljaʼ le Allah min yintakil ale l-naas.
[9] Akheer al-insaan yaljaʼ le Allah min yintakil ale l-salaatiin.
[10] Kulla l-umam hawwagooni wa be usum Allah, // ana dammartuhum.
[11] Al-umam hawwagooni min kulli jiihe wa be usum Allah, // ana dammartuhum.
[12] Hawwagooni misil nahale wa maato misil naar al-gechch wa be usum Allah, // ana dammartuhum.
[13] Humman darabooni be chidde le yarmuuni wa laakin Allah fazaʼni.
[14] Gudurti hu Allah wa fiyah hu, ana nikhanni. Hu bas al-najjaani.
[15] Korooraak al-farah wa l-naja ansamaʼ fi fariig al-saalihiin. «Iid Allah al-zeene wassafat gudurtah.
[16] Allah rafaʼ iidah al-zeene, iidah al-zeene wassafat gudurtah.»
[17] La, ana ma numuut laakin niʼiich le nihajji be aʼmaal Allah.
[18] Aywa, Allah aakhabni wa laakin ma sallamni le l-moot.
[19] Aftaho leyi biibaan al-saalihiin le nadkhul wa nachkur Allah.
[20] Wa dool biibaan Allah al-yadkhulu beehum al-saalihiin.
[21] Ya Allah, ana nachkurak achaan inta raddeet leyi // wa anteetni al-naja.
[22] Al-hajar al-bannaayiin al-beet // awwal ma dawwarooh bigi al-hajar al-muhimm // fi buna al-beet.
[23] Al-cheyy da jaayi min Allah wa chifnaah ajiib !
[24] Al-yoom da, yoom aʼmaal Allah wa fi l-yoom da, khalli ninbastu wa nafraho.
[25] Ya Allah, najjiina ! Ya Allah, ansurna !
[26] Mabruuk le l-naadum al-jaayi // be usum Allah wa min beetah, aniina nantuuku barakat Allah.
[27] La ilaah illa Allah wa hu yantiina al-nuur. Chiilu furuuʼ fi iideeku wa hawwugu al-madbah // wa garrubu le guruunah.
[28] Ya Allah ! Inta Ilaahi wa ana nachkurak. Inta Ilaahi wa ana niʼazzimak.
[29] Achkuru Allah achaan hu rahiim wa rahmatah daayme ila l-abad.