[1] يَا إِنْتَ التُّقُودْ ذُرِّيَّةْ يُوسُفْ // مِثِلْ غَنَمْ، يَا رَاعِي إِسْرَائِيلْ، أَسْمَعْ! يَا إِنْتَ الْقَاعِدْ فَوْق الْمَخْلُوقِينْ السَّمَاوِيِّينْ، بَيِّنْ نَفْسَكْ!
[2] قِدَّامْ قَبَايِلْ أَفْرَايِمْ وَ بَنْيَامِينْ وَ مَنَسَّى، قُمّ بِكُلَّ قُوَّتَكْ وَ تَعَالْ نَجِّينَا!
[3] يَا رَبّ، قَبِّلْنَا عَلَيْك! وَجِّهْ عَلَيْنَا نُورْ وِجْهَكْ وَ بَيْدَا، أَنِحْنَ نَنْجَوْا.
[4] يَا اللّٰهْ الْإِلٰـهْ الْقَادِرْ! لَحَدِّي مَتَى يِقَبِّضْ غَضَبَكْ ضِدّ صَلَاةْ شَعَبَكْ؟
[5] إِنْتَ تِأَكِّلْهُمْ خُبْزَةْ مَعْجُونَةْ بِدُمُوعْ. وَ تِشَرِّبْهُمْ تَلَاتَةْ مِكْيَالْ هَنَا دُمُوعْ.
[6] وَ إِنْتَ سَوَّيْتنَا سَبَبْ هَنَا هُرَاجْ لِجِيرَانَّا وَ عُدْوَانَّا يِشَّمَّتَوْا فَوْقنَا.
[7] يَا الْإِلٰـهْ الْقَادِرْ، قَبِّلْنَا عَلَيْك! وَجِّهْ عَلَيْنَا نُورْ وِجْهَكْ وَ بَيْدَا، أَنِحْنَ نَنْجَوْا.
[8] مِنْ بَلَدْ مَصِرْ، إِنْتَ مَرَقْت شَدَرَةْ الْعِنَبْ. وَ طَرَدْت الْأُمَمْ وَ مَقَّنْت شَدَرَةْ الْعِنَبْ دِي.
[9] إِنْتَ جَهَّزْت لَيْهَا الْأَرْض وَ هِي دَسَّتْ عُرُوقْهَا وَ مَلَتْ الْبَلَدْ.
[10] ضُلَّهَا غَطَّى الْجِبَالْ وَ فُرُوعْهَا طُوَالْ // مِثِلْ الْأَرْز الْكُبَارْ.
[11] هِي مَدَّتْ فُرُوعْهَا // لَحَدِّي الْبَحَرْ الْأَبْيَضْ أَيْوَى، مَقَنْهَا // لَحَدِّي بَحَرْ الْفُرَاتْ.
[12] مَالَا سَوَّيْت خُرَمْ كَتِيرِينْ فِي زَرِيبِتْهَا الْبَيْهُمْ النَّاسْ الْفَايْتِينْ يَقْطَعَوْا الْعِنَبْ؟
[13] وَ حَلُّوفْ الْغَابَةْ يَخْرِبْهَا وَ حَيْوَانَاتْ الْكَدَادَةْ // يَرْتَعَوْا فَوْقهَا.
[14] يَا الْإِلٰـهْ الْقَادِرْ، قَبِّلْ وَ مِنْ السَّمَاءْ فَوْق، أَنْظُرْ وَ شِيفْ! قُمّ وَ فَكِّرْ لِشَدَرَةْ الْعِنَبْ دِي.
[15] أَحْمِي الْمَقَّنَتْهَا إِيدَكْ الزَّيْنَةْ أَيْوَى، أَحْفَضْ الْمَقَنْ الْعَدَّلْتَهْ لِنَفْسَكْ.
[16] النَّاسْ قَطَعَوْه وَ حَرَّقَوْه فِي النَّارْ. خَلِّي يِدَّمَّرَوْا // قِدَّامْ غَضَبَكْ.
[17] خُطّ إِيدَكْ فِي النَّادُمْ الْقَاعِدْ بِزَيْنَايْتَكْ، فِي الْإِنْسَانْ الْإِنْتَ ذَاتَكْ أَنْطَيْتَهْ قُدْرَةْ.
[18] خَلَاصْ، أَنِحْنَ مَا نِكِسُّوا مِنَّكْ أَبَداً. أَنْطِينَا الْحَيَاةْ وَ بَيْدَا، // أَنِحْنَ نِنَادُوا أُسْمَكْ.
[19] يَا اللّٰهْ الْإِلٰـهْ الْقَادِرْ، قَبِّلْنَا عَلَيْك! وَجِّهْ عَلَيْنَا نُورْ وِجْهَكْ وَ بَيْدَا، أَنِحْنَ نَنْجَوْا.