[1] يَا رَبّ! أَنْطِي شَرِيعْتَكْ لِلْمَلِكْ وَ عَدَالْتَكْ لِوِلَيْد الْمَلِكْ.
[2] هُو يِشَارِعْ شَعَبَكْ بِالْعَدَالَةْ وَ مَسَاكِينَكْ حَسَبْ الشَّرِيعَةْ.
[3] وَ مِنْ الْجِبَالْ، يَنْزِلْ السَّلَامْ وَ مِنْ الْحُجَارْ، تَنْزِلْ الْعَدَالَةْ لِلشَّعَبْ.
[4] وَ الْمَلِكْ يَحْكِمْ بِالْعَدَالَةْ فِي الشَّعَبْ الْمَسَاكِينْ. وَ يِنَجِّي عِيَالْ التَّعْبَانِينْ وَ يَرْحَكْ الظَّالِمِينْ.
[5] كَنْ الْحَرَّايْ وَ الْقَمَرْ قَاعِدِينْ، النَّاسْ يَخَافَوْا مِنْ الْمَلِكْ مِنْ ذُرِّيَّةْ لِذُرِّيَّةْ.
[6] هُو يَنْزِلْ مِثِلْ مَطَرَةْ فِي قَشّ الْمَرْعَى وَ مِثِلْ أَلْمِي الْيُرُشّ الْأَرْض.
[7] وَ فِي أَيَّامْ حُكْمَهْ، الْعَدَالَةْ تِزِيدْ وَ كَنْ الْقَمَرْ قَاعِدْ دَا، السَّلَامْ يِزِيدْ.
[8] وَ خَلِّي هُو يَحْكِمْ مِنْ الْبَحَرْ الْمَيِّتْ // لَحَدِّي الْبَحَرْ الْأَبْيَضْ وَ مِنْ بَحَرْ الْفُرَاتْ // لَحَدِّي آخِرْ الْأَرْض.
[9] وَ سُكَّانْ الصَّحَرَاء // يَبُرْكُوا قِدَّامَهْ وَ عُدْوَانَهْ يِسِفُّوا التُّرَابْ.
[10] وَ مُلُوكْ تَرْشِيشْ // وَ جَزَايِرْ الْبَحَرْ يِجِيبُوا لَيَّهْ هَدَايَا. وَ مُلُوكْ شَبَا وَ سَبَأ يِكَفُّوا مِيرِي.
[11] وَ كُلَّ الْمُلُوكْ يَسْجُدُوا قِدَّامَهْ وَ كُلَّ الْأُمَمْ يَخْدُمُوا لَيَّهْ.
[12] أَشَانْ هُو يِنَجِّي التَّعْبَانِينْ الْيِكَوْرُكُوا وَ الْمَسَاكِينْ الْمَا عِنْدُهُمْ فَزَعْ.
[13] هُو يِحِنّ فِي الضَّعِيفْ وَ التَّعْبَانْ وَ يِنَجِّي حَيَاةْ التَّعْبَانِينْ.
[14] وَ مِنْ الظُّلُمْ وَ الْعُنُفْ، يَفْدَاهُمْ وَ حَيَاتْهُمْ دِي غَالِيَةْ لَيَّهْ.
[15] خَلِّي الْمَلِكْ يِعِيشْ وَ يَنْطُوهْ دَهَبْ سَبَأ. وَ يِصَلُّوا لَيَّهْ دَايْماً وَ يِبَارُكُوهْ كُلَّ يَوْم.
[16] وَ خَلِّي الْقَمَحْ يَبْقَى كَتِيرْ فِي الْبَلَدْ وَ قَنَادِيلَهْ يِنْهَزَّوْا // فِي رُوسَيْ الْجِبَالْ مِثِلْ فِي جِبَالْ لُبْنَانْ // وَكِتْ يِنَوُّرُوا. وَ خَلِّي الْمُدُنْ يِطَّوَّرَوْا مِثِلْ قَشّ الْكَدَادَةْ.
[17] خَلِّي أُسْمَهْ يَقْعُدْ إِلَى الْأَبَدْ وَ يُدُومْ مِثِلْ الْحَرَّايْ. وَ بَيَّهْ هُو، خَلِّي النَّاسْ يِلْبَارَكَوْا وَ كُلَّ الْأُمَمْ يِنَادُوهْ مُبَارَكْ.
[18] بَارَكْ اللّٰهْ الرَّبّ الْهُو إِلٰـهْ إِسْرَائِيلْ، هُو وِحَيْدَهْ بَسْ يِسَوِّي عَجَايِبْ!
[19] بَارَكْ اللّٰهْ الْأُسْمَهْ مَجِيدْ إِلَى الْأَبَدْ وَ خَلِّي كُلَّ الْأَرْض // تِنْمَلِي بِمَجْدَهْ. آمِينْ! آمِينْ!
[20] دَا كُمَالَةْ صَلَاةْ دَاوُدْ وِلَيْد يَسَّى.