[1] يَا شَعَبِي! أَسْمَعَوْا تَوْرَاتِي وَ خُطُّوا أُدْنَيْكُو // لِكَلَامْ خَشْمِي.
[2] أَنَا نَفْتَحْ خَشْمِي بِمَثَلْ وَ نِحَجِّي حِجَيْ هَنَا الزَّمَنْ الْفَاتْ
[3] السِّمِعْنَاهْ وَ عِرِفْنَاهْ وَ الْحَجَّوْه لَيْنَا أَبَّهَاتْنَا.
[4] أَنِحْنَ مَا نِلَبُّدُوهْ مِنْ عِيَالْهُمْ وَ لَاكِنْ لِذُرِّيِّتْهُمْ // التَّجِي بَعَدْهُمْ، نِحَجُّوا لَيْهُمْ بِحَمْد اللّٰهْ وَ قُدُرْتَهْ وَ عَجَايْبَهْ // الْهُو سَوَّاهُمْ.
[5] هُو أَنْطَى فَرَايِضْ لِذُرِّيَّةْ يَعْقُوبْ أَيْوَى، أَنْطَى تَوْرَاتَهْ // لِبَنِي إِسْرَائِيلْ وَ أَمَرْ جُدُودْنَا يِعَرُّفُوهُمْ لِعِيَالْهُمْ.
[6] أَشَانْ يِعَرُّفُوهُمْ // لِلذُّرِّيَّةْ التَّجِي بَعَدَيْن يَعْنِي عِيَالْهُمْ الْيَلْدَوْهُمْ.
[7] وَ يِتْوَكَّلَوْا عَلَيْ الرَّبّ وَ مَا يَنْسَوْا عَمَلَهْ وَ يَحْفَضَوْا قَوَانِينَهْ.
[8] أَشَانْ مَا يَبْقَوْا مِثِلْ جُدُودْهُمْ، ذُرِّيَّةْ حَرَامِيَّةْ وَ عَاصِيَةْ، ذُرِّيَّةْ الْقَلِبْهَا مَا ثَابِتْ وَ مَا عِنْدَهَا إِيمَانْ بِالرَّبّ.
[9] وَ نَاسْ قَبِيلَةْ أَفْرَايِمْ الْمُسَلَّحِينْ وَ يَعَرْفُوا زَرِقِينْ النُّشَّابْ، هُمَّنْ عَرَّدَوْا فِي يَوْم الْحَرِبْ.
[10] وَ دَا أَشَانْ مَا حَفَضَوْا // مُعَاهَدَةْ الرَّبّ وَ أَبَوْا مَا يِتَابُعُوا تَوْرَاتَهْ.
[11] هُمَّنْ نِسَوْا عَمَلَهْ وَ عَجَايْبَهْ الْوَصَّفَاهُمْ لَيْهُمْ.
[12] قِدَّامْ جُدُودْهُمْ الرَّبّ سَوَّى عَجَايِبْ، فِي مَنْطَقَةْ صُعَانْ فِي بَلَدْ مَصِرْ.
[13] الرَّبّ شَقَّ الْبَحَرْ إِتْنَيْن لِيِقَطِّعْهُمْ وَ الْأَلْمِي وَقَفْ جَايْ جَايْ لَيْهُمْ مِثِلْ دُرْدُرْ.
[14] بِالنَّهَارْ، هُو يُقُودْهُمْ بِسَحَابَايْ وَ بِاللَّيْل، بِنُورْ هَنَا نَارْ.
[15] هُو شَقَّ الْحُجَارْ فِي الصَّحَرَاء لِيَزْقِيهُمْ أَلْمِي بِكَتَرَةْ مِثِلْ أَلْمِي الْغَرِيقْ تِحِتْ الْأَرْض.
[16] وَ مِنْ الْجَبَلْ، هُو مَرَقْ أَلْمِي وَ دَا سَالْ مِثِلْ أَلْمِي الْبُحُورْ.
[17] وَ هُمَّنْ قَمَّوْا بَتَّانْ يَذْنُبُوا وَ عِصَوْا اللّٰهْ الْعَالِي فِي أَرْض جَفَافْ.
[18] هُمَّنْ حَجَّوْا فِي قَلِبْهُمْ // وَ جَرَّبَوْا الرَّبّ وَ طَلَبَوْا مِنَّهْ // أَكِلْهُمْ الْيِدَوْرُوهْ.
[19] وَ حَجَّوْا ضِدّ الرَّبّ وَ قَالَوْا: «اللّٰهْ يَقْدَرْ يَنْطِينَا أَكِلْ // فِي الصَّحَرَاء وَلَّا؟
[20] صَحِيحْ، هُو ضَرَبْ الْحَجَرْ وَ الْأَلْمِي جَرَى مِنَّهْ بِكَتَرَةْ وَ بِقِي وُدْيَانْ كَتِيرِينْ. وَ لَاكِنْ هُو يَقْدَرْ يَنْطِي خُبْزَةْ وَ يِقَدِّمْ لَحَمْ لِشَعَبَهْ وَلَّا؟»
[21] خَلَاصْ وَكِتْ اللّٰهْ سِمِعْ كَلَامْهُمْ، هُو غِضِبْ وَ نَارْ غَضَبَهْ قَمَّتْ // ضِدّ ذُرِّيَّةْ يَعْقُوبْ أَيْوَى، زِعِلْ شَدِيدْ // ضِدّ بَنِي إِسْرَائِيلْ.
[22] أَشَانْ هُمَّنْ مَا أَتْوَكَّلَوْا عَلَيْ الرَّبّ وَ مَا آمَنَوْا كَدَرْ هُو يِنَجِّيهُمْ.
[23] وَ خَلَاصْ، الرَّبّ أَمَرْ // السَّحَابْ الْفَوْق وَ فَتَحْ بِيبَانْ السَّمَاوَاتْ.
[24] هُو نَزَّلْ مَطَرَةْ هَنَا مَنَّةْ // لِيِأَكِّلْهُمْ وَ أَنْطَاهُمْ قَمَحْ مِنْ السَّمَاءْ.
[25] وَ أَيِّ نَادُمْ أَكَلْ خُبْز // مِثِلْ خُبْز الْمَلَائِكَةْ وَ الرَّبّ رَسَّلْ لَيْهُمْ أَكِلْ بِكَتَرَةْ.
[26] وَ مِنْ السَّمَاءْ، الرَّبّ قَوَّمْ رِيحْ الصَّبَاحْ وَ بِقُدُرْتَهْ، جَابْ رِيحْ الْوَطِي.
[27] وَ مِثِلْ يِنَزِّلْ الْمَطَرْ بِكَتَرَةْ، هُو نَزَّلْ لَيْهُمْ لَحَمْ كَتِيرْ مِثِلْ عَجَاجْ الْأَرْض. أَيْوَى، نَزَّلْ طُيُورْ بِكَتَرَةْ مِثِلْ رَمْلَةْ هَنَا خَشُمْ الْبَحَرْ.
[28] هُو نَزَّلَاهُمْ لَيْهُمْ فِي أُسْط الْفَرِيقْ وَ حَوَالَيْ خِيَمْهُمْ.
[29] هُمَّنْ أَكَلَوْا وَ شِبْعَوْا مَرَّةْ وَاحِدْ وَ هُو أَنْطَاهُمْ الشَّيّءْ الْأَتْمَنَّوْه.
[30] وَ لَاكِنْ مُنَاهُمْ مَا تَمَّ حَتَّى كَنْ خُشُومْهُمْ مَلَانِينْ كُلَ.
[31] وَ طَوَّالِي غَضَبْ الرَّبّ قَمَّ ضِدُّهُمْ وَ كَتَلْ فِي أُسُطْهُمْ النَّاسْ الشُّدَادْ أَيْوَى، كَمَّلْ صُبْيَانْ إِسْرَائِيلْ.
[32] وَ بَيْدَا كُلَ، هُمَّنْ قَاعِدِينْ يَذْنُبُوا دَايْماً وَ مَا آمَنَوْا بِعَجَايْبَهْ.
[33] خَلَاصْ، هُو كَمَّلْ أَيَّامْهُمْ // فِي الرِّيحْ سَاكِتْ وَ سِنِينْهُمْ فِي الْخَوْف.
[34] وَ وَكِتْ الرَّبّ يَكْتُلْهُمْ، هُمَّنْ يِفَتُّشُوهْ وَ يِقَبُّلُوا يِفَتُّشُوهْ بِنِيَّةْ.
[35] وَ يِذَّكَّرَوْا كَدَرْ الرَّبّ، هُو مَلْجَئْهُمْ وَ يِفَكُّرُوا كَدَرْ اللّٰهْ الْعَالِي، هُو الْيَفْدَاهُمْ.
[36] وَ لَاكِنْ بِخُشُومْهُمْ، يُغُشُّوهْ وَ بِلِسْنَيْهُمْ، يَكْدُبُوا لَيَّهْ.
[37] وَ قُلُوبْهُمْ مَا ثَابْتِينْ فَوْقَهْ وَ مَا يِتْوَكَّلَوْا عَلَيْ مُعَاهَدَتَهْ.
[38] وَ لَاكِنْ هُو الرَّحِيمْ // غَفَرْ خَطَاهُمْ وَ مَا دَمَّرَاهُمْ وَ عِدَّةْ مَرَّاتْ، هُو مَا غِضِبْ لَيْهُمْ وَ مَا قَوَّمْ كُلَّ زَعَلَهْ.
[39] وَ فَكَّرْ كَدَرْ // هُمَّنْ مَخْلُوقِينْ بَسْ وَ رُوحْهُمْ تَمْرُقْ وَ أَبَداً مَا تِقَبِّلْ.
[40] عِدَّةْ مَرَّاتْ، هُمَّنْ عِصَوْه فِي الصَّحَرَاء وَ غَضَّبَوْه فِي بَكَانْ جَفَافْ.
[41] وَ بَتَّانْ قَمَّوْا جَرَّبَوْا الرَّبّ وَ غَضَّبَوْا قُدُّوسْ إِسْرَائِيلْ.
[42] هُمَّنْ نِسَوْا السَّوَّتَهْ إِيدَهْ، فِي الْيَوْم الْهُو فَدَاهُمْ مِنْ الْعَدُو.
[43] هُو سَوَّى عَلَامَاتَهْ فِي مَصِرْ أَيْوَى، عَجَايْبَهْ فِي مَنْطَقَةْ صُعَانْ.
[44] فِي مَصِرْ، اللّٰهْ شَقْلَبْ الْبُحُورْ دَمّ وَ رُجُولْهُمْ الْجَارِيِينْ كُلَ، الْمَصْرِيِّينْ مَا قِدْرَوْا شِرْبَوْا مِنْهُمْ.
[45] وَ رَسَّلْ ضِدُّهُمْ دُبَّانْ أَكَلْهُمْ وَ ضِفْدَعْ بَشْتَنْهُمْ.
[46] هُو سَلَّمْ إِنْتَاجْ زِرَاعِتْهُمْ لِلْجَرَادْ وَ نَتِيجَةْ خِدْمِتْهُمْ // لِسَارْ اللَّيْل.
[47] وَ تَلَّفْ عِنَبْهُمْ بِالْبَرَدْ وَ جِمَّيْزهُمْ بِالْبَرِدْ الشَّدِيدْ.
[48] وَ سَلَّمْ مَالْهُمْ لِلْبَرَدْ وَ بَهَايِمْهُمْ لِلرَّعَدْ.
[49] هُو نَزَّلْ فِي الْمَصْرِيِّينْ // زَعَلَهْ الشَّدِيدْ وَ غَضَبْ وَ زَعَلْ وَ تَعَبْ وَ رَسَّلْ مَلَائِكَتَهْ هَنَا الدَّمَارْ.
[50] وَ سَهَّلْ الدَّرِبْ لِغَضَبَهْ وَ مَا دَحَرْ مِنْهُمْ الْمَوْت وَ سَلَّمْ حَيَاتْهُمْ لِلْوَبَاءْ.
[51] وَ كَتَلْ كُلَّ أَوْلَادْ الْبِكِرْ // هَنَا الْمَصْرِيِّينْ الْهُمَّنْ ذُرِّيَّةْ حَامْ أَيْوَى، شَالْ أَوَّلْ إِنْتَاجْ قُدْرِتْهُمْ.
[52] هُو وَدَّى شَعَبَهْ مِثِلْ غَنَمْ وَ قَادَاهُمْ مِثِلْ بَهَايِمْ فِي الصَّحَرَاء.
[53] هُو قَادَاهُمْ بِأَمَانْ وَ هُمَّنْ مَا رَجَفَوْا وَ الْبَحَرْ غَطَّى عُدْوَانْهُمْ.
[54] هُو وَدَّى شَعَبَهْ // عَلَيْ الْأَرْض الْمُقَدَّسَةْ، عَلَيْ الْجَبَلْ الْإِيدَهْ الزَّيْنَةْ قَلَعَتَهْ.
[55] هُو طَرَدْ أُمَمْ قِدَّامْهُمْ وَ كَالْ الْأَرْض بِحُبَالْ وَ قَسَّمَاهَا لَيْهُمْ وَرَثَةْ وَ سَكَّنْ قَبَايِلْ بَنِي إِسْرَائِيلْ // فِي بُيُوتْهُمْ.
[56] وَ بَيْدَا كُلَ، جَرَّبَوْا الرَّبّ الْعَالِي // وَ عِصَوْه وَ مَا طَبَّقَوْا فَرَايْضَهْ.
[57] هُمَّنْ خَلَّوْه وَ خَانَوْه مِثِلْ جُدُودْهُمْ وَ قَبَّلَوْا مِثِلْ النُّشَّابْ الْيَخْطَا هَدَفَهْ.
[58] هُمَّنْ غَضَّبَوْه بِبَكَانَاتْهُمْ الْعَالِيِينْ هَنَا الْعِبَادَةْ وَ بِأَصْنَامْهُمْ، قَوَّمَوْا غِيرْتَهْ.
[59] الرَّبّ سِمِعْ وَ غِضِبْ شَدِيدْ وَ رَفَضَاهُمْ مَرَّةْ وَاحِدْ // لِبَنِي إِسْرَائِيلْ.
[60] هُو أَبَى مَسْكَنْ الْعِبَادَةْ فِي شِيلَوْه وَ دِي الْخَيْمَةْ الْهُو سَكَنْ فَوْقهَا // فِي أُسْط النَّاسْ.
[61] هُو سَلَّمْ صَنْدُوقْ الْمُعَاهَدَةْ الْهُو عَلَامَةْ قُدُرْتَهْ وَ جَلَالَهْ فِي إِيدْ الْعُدْوَانْ.
[62] هُو غِضِبْ ضِدّ وَرَثَتَهْ وَ سَلَّمْ شَعَبَهْ لِلْحَرِبْ.
[63] النَّارْ أَكَلَتْ الصُّبْيَانْ وَ الْبَنَاتْ الْعُدْرِيَّاتْ، مَا شَكَّرَوْهِنْ بَتَّانْ.
[64] وَ رُجَالْ الدِّينْ مَاتَوْا فِي الْحَرِبْ وَ أَرَامِلْهُمْ مَا بَكَنْ.
[65] الرَّبّ قَمَّ مِثِلْ النَّايِمْ الْقَمَّ. وَ مِثِلْ الْفَارِسْ اللَّزَّتَهْ الْخَمَرْ فِي الْحَرِبْ،
[66] هُو ضَرَبْ عُدْوَانَهْ مِنْ وَرَاءْ وَ دَسَّاهُمْ فِي عَيْب أَبَدِي.
[67] هُو رَفَضْ ذُرِّيَّةْ يُوسُفْ وَ مَا عَزَلْ قَبِيلَةْ أَفْرَايِمْ.
[68] لَاكِنْ عَزَلْ قَبِيلَةْ يَهُوذَا وَ جَبَلْ صَهْيُون الْهُو يِحِبَّهْ.
[69] وَ بَنَى بَيْتَهْ الْمُقَدَّسْ عَالِي مِثِلْ السَّمَاءْ وَ قَوِي مِثِلْ الْأَرْض الْهُو أَسَّسَهْ إِلَى الْأَبَدْ.
[70] هُو عَزَلْ عَبْدَهْ دَاوُدْ مَلِكْ وَ شَالَهْ مِنْ زَرِيبَةْ الْغَنَمْ.
[71] مِنْ وَرَاءْ الْغَنَمْ هُو جَابَهْ وَ سَوَّاهْ رَاعِي لِشَعَبَهْ ذُرِّيَّةْ يَعْقُوبْ وَ لِوَرَثَتَهْ بَنِي إِسْرَائِيلْ.
[72] وَ دَاوُدْ رَعَاهُمْ بِقَلِبْ مُخْلِصْ وَ قَادَاهُمْ بِعِلِمْ.