[1] يَا اللّٰهْ! أَنَا نِحِبَّكْ، إِنْتَ قُدُرْتِي!
[2] اللّٰهْ هُو مَلْجَئِي يَحْمِينِي وَ يِنَجِّينِي. إِلٰـهِي هُو مَلْجَئِي وَ الْبَكَانْ النِّلَّبَّدْ فَوْقَهْ. هُو دَرَقَتِي وَ الْقُدْرَةْ التِّنَجِّينِي. هُو مَسْكَنِي الْقَوِي.
[3] أَنَا صَرَخْت وَ قُلْت: // «الْحَمْدُ للّٰهْ! اللّٰهْ نَجَّانِي مِنْ عُدْوَانِي.»
[4] قُيُودْ الْمَوْت كَرَبَوْنِي وَ سَيْل الْهَلَاكْ خَوَّفْنِي.
[5] قُيُودْ الْهَاوِيَةْ حَوَّقَوْنِي وَ شُرُكَّ الْمَوْت // قَاعِدِينْ قِدَّامِي.
[6] فِي الضِّيقَةْ، نَادَيْت اللّٰهْ أَيْوَى، صَرَخْت لِإِلٰـهِي وَ مِنْ بَيْتَهْ الْمُقَدَّسْ هُو سِمِعْنِي، هُو سِمِعْ حِسّ صِرَاخِي.
[7] الْأَرْض أَنْهَزَّتْ وَ رَجَفَتْ وَ أَسَاسْ الْجِبَالْ أَنْهَزَّ // وَ بَرْجَلْ أَشَانْ مَا حِمْلَوْا غَضَبْ اللّٰهْ الشَّدِيدْ.
[8] مِنْ مَنَاخِرَهْ يَطْلَعْ دُخَّانْ وَ مِنْ خَشْمَهْ // تَمْرُقْ نَارْ التَّاكُلْ الْعِنْدَهَا جَمُرْ الْيَحْرِقْ.
[9] اللّٰهْ فَلَّ السَّمَاوَاتْ وَ دَلَّى مَعَ سَحَابَايْ ضَلْمَةْ // تِحِتْ رِجِلَيْنَهْ.
[10] هُو رِكِبْ فِي مَخْلُوقْ سَمَاوِي // وَ طَارْ وَ بِجَنَاحَيْ الرِّيحْ، حَامْ.
[11] وَ أَلَّبَّدْ فِي ضَلَامْ الْمُحَوِّقْ مِثِلْ خَيْمِتَهْ وَ دَا ضَلَامْ أَلْمِي وَ السَّحَابْ الْأَزْرَقْ الشَّايِلْ.
[12] قِدَّامَهْ نُورْ شَدِيدْ الْيَمْرُقْ مِنَّهْ سَحَابْ وَ بَرَدْ وَ جَمُرْ الْيَحْرِقْ.
[13] فِي السَّمَاءْ، اللّٰهْ دَقْدَقْ. هُو الْعَالِي وَ حِسَّهْ أَنْسَمَعْ بِبَرَدْ وَ جَمُرْ يَحْرِقْ.
[14] هُو زَرَّقْ نَشَاشِيبَهْ لِعُدْوَانِي وَ شَتَّتَاهُمْ بِكَتَرَةْ الْبَرْق الشَّدِيدْ وَ هَزَمَاهُمْ.
[15] مِنْ شِدَّةْ زَعَلَكْ، يَا اللّٰهْ، وَ مِنْ حَمُو رِيحْ الْجَايَةْ مِنَّكْ، قَعَرْ الْبَحَرْ بَانْ وَ أَسَاسْ الدُّنْيَا أَنْكَشَفْ.
[16] وَ مِنْ فَوْق، مَدَّ إِيدَهْ رَفَعْنِي وَ مِنْ الْأَلْمِي الْكَتِيرْ، // مَرَقَانِي.
[17] نَجَّانِي مِنْ عُدْوَانِي الشُّدَادْ وَ مِنْ خُصْمَانِي الْقَوِيِّينْ مِنِّي.
[18] وَ يَوْم الْمَصِيبَةْ وَقَعَتْ فَوْقِي، هُمَّنْ هَجَمَوْنِي لَاكِنْ اللّٰهْ فَزَعْنِي.
[19] وَ هُو مَرَقَانِي مِنْ الْخُطُورَةْ // وَ حَرَّرَانِي، هُو نَجَّانِي أَشَانْ يِرِيدْنِي.
[20] اللّٰهْ يِعَامِلْنِي حَسَبْ عَدَالْتِي وَ يِكَافِينِي حَسَبْ سَلَامَةْ إِيدَيْنِي.
[21] أَشَانْ أَنَا تَابَعْت دَرِبْ اللّٰهْ وَ مَا عِصِيتْ إِلٰـهِي.
[22] أَيْوَى، أَنَا طَبَّقْت كُلَّ شُرُوطَهْ وَ أَبَداً مَا طَرَّفْت مِنْ قَوَانِينَهْ.
[23] أَنَا بِقِيتْ نَادُمْ تَمَامْ قِدَّامَهْ وَ حَفَضْت نَفْسِي مِنْ الْخَطَا.
[24] وَ خَلَاصْ، اللّٰهْ أَنْطَانِي أَجُرْ // حَسَبْ عَدَالْتِي وَ حَسَبْ سَلَامَةْ إِيدَيْنِي // الْهُو شَافْهَا قِدَّامَهْ.
[25] يَا اللّٰهْ! إِنْتَ صَادِقْ // مَعَ الصَّادِقِينْ وَ مَا تُلُومْ النَّاسْ التَّمَامِينْ.
[26] مَعَ الطَّاهِرِينْ، تُكُونْ طَاهِرْ وَ مَعَ الْعُوُجْ، تُكُونْ أَعْوَجْ.
[27] أَشَانْ إِنْتَ بَسْ التِّنَجِّي الْمَظْلُومِينْ وَ تِدَلِّي رَاسْ الْمُسْتَكْبِرِينْ.
[28] يَا اللّٰهْ! إِنْتَ بَسْ تِوَلِّعْ فَانُوسِي. اللّٰهْ إِلٰـهِي يِضَوِّي لَيِّ فِي الضَّلَامْ.
[29] يَا إِلٰـهِي! بَيْك إِنْتَ، نَهْجِمْ دُيُوشْ وَ بَيْك إِنْتَ، نُنُطّ دَرَادِرْ الْحِلَّةْ.
[30] الرَّبّ، دَرْبَهْ عَدِيلْ، كَلَامْ اللّٰهْ دَايْماً كَامِلْ. هُو دَرَقَةْ لِلنَّادُمْ الْيَلْجَأْ لَيَّهْ.
[31] أَشَانْ لَا إِلٰـهْ إِلَّا اللّٰهْ وَ لَا مَلْجَأْ إِلَّا إِلٰـهْنَا.
[32] إِلٰـهِي يِحَزِّمْنِي بِقُدْرَةْ وَ يِسَوِّي دَرْبِي عَدِيلْ.
[33] وَ أَنْطَانِي رِجْلَيْ خَفِيفِينْ نَجْرِي مِثِلْ الْغَزَالْ وَ رَفَعْنِي فِي الْبَكَانْ الْعَالِي.
[34] هُو بَسْ عَلَّمَانِي كِكَّيْف نِحَارِبْ وَ كِكَّيْف إِيدَيْنِي يَجْبُدُوا // نُبَّالْ النَّحَاسْ.
[35] يَا اللّٰهْ! أَنْطَيْتنِي دَرَقَةْ نَجَاتَكْ وَ بِإِيدَكْ الْقَوِيَّةْ، سَاعَدْتِنِي وَ بِمُسَاعَدَتَكْ، قَوَّيْتنِي.
[36] وَ سَهَّلْت لَيِّ دَرْبِي وَ ثَبَّتّْ رِجِلَيْنِي.
[37] نِطَارِدْ عُدْوَانِي وَ نَلْحَقْهُمْ وَ مَا نِقَبِّلْ لَحَدِّي نِكَمِّلْهُمْ.
[38] نِدَمِّرْهُمْ وَ يَقَعَوْا فِي الْأَرْض وَ نِفَجِّقْهُمْ.
[39] وَ قُدْرَةْ لِلْحَرِبْ، إِنْتَ أَنْطَيْتنِي وَ دَنْقَرْت عُدْوَانِي قِدَّامِي.
[40] وَ فِي إِيدَيْنِي، سَلَّمْتُهُمْ وَ لِخُصْمَانِي، // أَنَا دَمَّرْتُهُمْ.
[41] يِعِيطُوا لِلْفَزَعْ وَ مَا فِي مُنَجِّي، يَسْأَلَوْا اللّٰهْ وَ مَا يُرُدّ لَيْهُمْ.
[42] أَنَا رِحِكْتُهُمْ مِثِلْ عَجَاجْ لِلرِّيحْ، مِثِلْ طِينَةْ الشَّوَارِعْ نُقُشُّهُمْ.
[43] وَ إِنْتَ تِنَجِّينِي // مِنْ مُعَارَضَةْ الشَّعَبْ وَ تُخُطِّنِي كَبِيرْ فِي الْأُمَمْ وَ شَعَبْ الْمَا نَعَرِفْهُمْ // يَخْدُمُوا لَيِّ.
[44] وَ يُخُطُّوا أُدْنَيْهُمْ لِيَسْمَعَوْنِي وَ الْأَجَانِبْ يِمَسْكُنُوا نُفُوسْهُمْ لَيِّ.
[45] الْأَجَانِبْ كِسْلَوْا وَ مَرَقَوْا مِنْ مَلْجَئْهُمْ بِرَجِفِينْ.
[46] الْحَيّ هُو اللّٰهْ وَ بَارَكْ اللّٰهْ مَلْجَئِي! الْعَالِي هُو إِلٰـهْ الْيِنَجِّينِي.
[47] إِلٰـهِي هُو الْيِشِيلْ لَيِّ التَّارْ وَ يِسَلِّمْ لَيِّ الشُّعُوبْ // تِحِتْ سُلْطِتِي.
[48] وَ يِنَجِّينِي مِنْ إِيدْ عُدْوَانِي وَ بَتَّانْ يَنْصُرْنِي فَوْقهُمْ وَ يِنَجِّينِي مِنْ النَّاسْ الْيِسَوُّوا الْعُنُفْ.
[49] وَ بِسَبَبْ دَا، يَا اللّٰهْ، فِي أُسْط الْأُمَمْ، نَشْكُرَكْ وَ بِغِنَيْ، نَمْدَحْ أُسْمَكْ.
[50] اللّٰهْ أَنْطَى النَّصُرْ لِلْمَلِكْ الْهُو دَرَّجَهْ. أَيْوَى، وَصَّفْ خَيْرَهْ لِلنَّادُمْ الْهُو مَسَحَهْ، لِدَاوُدْ وَ ذُرِّيّتَهْ إِلَى الْأَبَدْ.