[1] Haaggi noole walaasseenti Fiibi layadeehe too Kiriistee miinsane an atin icheeko a jira. Iche laka urur Kiriistoki ilkerengeetti Kenkereeya ifassa.
[2] A atin daaha, jeenteti atin ichoow Kamur ba wohoo kalday itahiin u, nyaama soodowweesda toro la wihi iche atin ka'doonto kagargaara. I'da yeela i'di 'doo'di Waakh isiyeeluu. I'di tahe Fiibi rubeyche 'doo'di ittaawenye gargaarte, toro la ani laka a igargaarte.
[3] Birisiila ichoow Akiila bariitoteey eleelicha. Hil Yeesso Kiriisto ka a iswalhinna.
[4] Lammacho ba la goorat a igargaareene ichoowka jeentetaas u liigaasan leheet. Ani kalday la menye, ururre Kiriistoti yaafohi Ya'huud ieheynan tuumman icho weyti kalanneestaan.
[5] Urur Kiriistoki minkicho ka is'helo bariiticha. Aaleeyki an weyti 'doono Ebeeneta layadeeh bariiticha. Us a eti oraate ili Aassiya ka Kiriisto rummeeste.
[6] Maariyati goorat jeentetiin u weyti hol dowte bariiticha.
[7] Andirooniko ichoow Yuuniya bariiticha. Icho goorat jeela ikaleejireene toro la a yaaftaaya. Lammacheba la a ergaanoti weyti lagarti, toro la ortaaya Kiriisto rummeesteen.
[8] Aaleeyki an weyti 'doono Kamur ka ani ichoow usu ba wohoo kalday nahe, Ambiliyaanto layadeeh bariiticha.
[9] Urbaanohi ullaka hil Kiriisto ka inno walhicho bariiticha. Aaleeyki an weyti 'doono Isitaaku layadeeh bariiticha.
[10] Abeelehi kakhuufnaanki us Kiriisto kakhuufo ka lakaje bariiticha. Goob Ariistobulo bariitoteey eleelicha.
[11] Heroodiyonhi yaafteeye bariitoteey eleelicha. 'Doo'di goob Narkiise Kamur rummeeste bariiticha.
[12] Tirafeenna ichoow Tirafoossa bariiticha. Deyyehota weyti Kiriisto hol idowta. Beersiti weyti aaleeyenye hili buure Kamur ihaaggisse bariitoteey eleelicha.
[13] Ruufohi Kamur soobahsate kiis kayeesse ichoow abartiisti ani laka saggi weeliche iwoywoyte bariiticha.
[14] Assinkiriito ichoow Fileegon ichoow Hermes ichoow Baatirooba ichoow Hermas ichoow 'doo'di Kiriisto rummeeste icho iskhabaan tuumman bariiticha.
[15] Filoologaas ichoow Yuuliya ichoow Neereya ichoow walaassiis ichoow Oliimbaas ichoow 'doo'di Waakhe tuummane icho iskhabaan bariitoteey eleelicha.
[16] Taba 'doonin Kiriisto iskabariiticha. Urur Kiriisto tuumman a atin soobariitiche.
[17] 'Doo'd Kiriistokaaw, a atin hawwaasdee taba, 'doo'di seley atin fido ichoow 'doo'di halgo atin gelo, wihi icho atin idowaan wihi atin laabche buusanyahiin yuubsada. 'Doo'da dakkhan kaseeha.
[18] A mehe 'doo'daas Kiriistohi Kamureene ma ifalaane, awtichooda on ifalaan. 'Doo'daas afe chinniyahe, enenyet af on kakoolichaan. Jita ka la malassi 'doo'di dowwa luhlo lakakhaato ekkeestaan.
[19] Enenyet tuumman saggi atin Kamur iraahtaan a garta. Anna weyti atin kahamaada. I'daasenyi wihi an atin ka'doono kallaayo, taba gi'de, wihi haaggan ka kharaawa, anki suujoon ka la, i'di eti wohoo igaran ateeha.
[20] Waakkhi nebey tuumman leh Seytaan a baabiicha, ulla luhlohiin ilicho ka yabta. Yeesso Kiriistohi Kamureene ba atin imaala.
[21] Timootihi ullaka hil Kiriisto ka iwalhicho a atin soobariitiche. Luukiyo ichoow Yaason ichoow Soosibatiro laka a atin soobariiticheen. Icho a yaaftaaya.
[22] Anihi magaheey Teertiyo yahe, wihi Baawulo cheeke dahanteey ka khadaaba kachiire, bariitoti Kamur ka weyti atin soobariiticha.
[23] Gaayohi an leefiddiye urur Kiriisto minkiis ka kulmo a atin soobariitiche. Eraastahi chilimmeti ilkerengeeteet khuccho ichoow eteenki koo Kiriisteenye Kuwaarto layadeeh a atin soobariiticheen.
[25] Waakh saa'dno! Us kakhuufnaanki atin Kiriisto kakhuuftaan ka atin miigoon a yabuu'd. Ulla Wori Haaggane Yeesso Kiriisto miinsane an cheeko ka waha yeelin a yabuu'd. Wora Haaggan la a ki inno awteen u iabanne, Waakh kalday on inno isoofura. Runta la a ti Waakh gu'hassi ittaawe dagche.
[26] I'daasenyi runta dagsan toolla weyti lasoobabbakkaahiche. Runtaas la Chiirnaanneti Waakhe 'doo'di Waákh íyeyyeedo ka a lacheeke. Waha la saggi Waakkhi jirtuu tuumman jiro i'doono inno isoocheeke, iche liiyeele. Amuri us inno ibahche la a mehe ya, nyaama runtaas yaafohi harra tuumman abcha, 'dee Kiriisto a kakhuufeene, toro la a raaheen.
[27] Yeesso Kiriisto ka, Waakkhi kaldaye khara tuumman leh, jirtuu tuumman a lakoolicho. Aamiin.